ပါပါရာဇီလာနေပြီ ဒီဘက်တိုးနေ

တစ်ဘို့တည်းဝါဒ ကူးစက်ပြန့်ပွားခြင်း 

(The Narcissism Epidemic)

၂၀၀၉ ခုနှစ်အတွင်းက “တစ်ကိုယ်ကောင်းဝါဒ ကူးစက်ပြန့်ပွားခြင်း” (The Narcissism Epidemic) ဟု အမည်ရသည့်စာအုပ် ထွက်ပေါ်လာသောအခါ ပထမဆုံးအနေဖြင့် “ကူးစက်ပြန့်ပွား” နေပြီဟု မည်သို့ဆိုနိုင်သနည်း ဟူသော မေးခွန်း ထွက်ပေါ်လာသည်။ ဤအတွက် အထောက်အထားမှာ ပုံသဏ္ဍာန်နှစ်ရပ်အနေဖြင့် တည်ရှိနေသည်။ လူပုဂ္ဂိုလ် တစ်ဦးချင်းအရ ပြောင်းလဲမှုနှင့် ယဉ်ကျေးမှုအရ ပြောင်းလဲမှုတို့ ဖြစ်ကြသည်။

ထိုစာအုပ် ရေးသားသူ South Alabama တက္ကသိုလ်မှ John Foster နှင့် Jean M. Twenge ဟူသော စိတ်ပညာရှင်နှစ်ဦးတို့က ထင်ထားသည်ထက်ပင် ပိုမိုမြင့်မားနေသော တစ်ကိုယ်ကောင်းဝါဒ စရိုက်လက္ခဏာများကို ဖော်ပြထားသည့် လေ့လာဆန်းစစ်ချက် တစ်ရပ်ကို ထုတ်ပြန်ခဲ့ပါသည်။ ၂၀၀၂ မှ ၂၀၀၇ ခုနှစ်အတွင်း ကောလိပ်ကျောင်းသားများ၏ “တစ်ကိုယ်ကောင်းစိတ် ကိုယ်ရည်ကိုယ်သွေး စာရင်း” (Narcissism Personality Inventory)  NPI သည် ၁၉၈၂ မှ ၂၀၀၆ ခုနှစ်အကြား အစောပိုင်းပြုလုပ်ခဲ့သော စာရင်းထက် နှစ်ဆခန့် ပိုမိုမြင့်တက် မြန်ဆန်လာသည်ကို တွေ့ရှိရသည်။ NIP သည် ပုံမှန်လူများ၏ တစ်ကိုယ်ကောင်းစရိုက်ကို တိုင်းတာခြင်းသာဖြစ်ပြီး ရောဂါတစ်ရပ်အဖြစ် စစ်ဆေးကုသပေးရမည့် အဆင့်သို့ မရောက်ပါ။

လေ့လာတွေ့ရှိချက် နှစ်ရပ်လုံးအရ တစ်ကိုယ်ကောင်းစိတ် မြင့်တက်လာမှုသည် အမျိုးသမီးများတွင် ပိုမိုအားကောင်းကြောင်း တွေ့ရှိရသည်။ ယေဘုယျအားဖြင့် အမျိုးသားများသည် အမျိုးသမီးများထက် တစ်ကိုယ်ကောင်းစိတ် ပိုမိုများပြားနေသေးသော်လည်း အမျိုးသမီးများသည်လည်း လျင်မြန်စွာ အမီလိုက်လာနေပြီ ဖြစ်သည်။ ဤသည်မှာလည်း တစ်ကိုယ်ကောင်းစိတ် ဖြစ်ပေါ်စေသည့် ယဉ်ကျေးမှုဆိုင်ရာ သက်ရောက်အား များစွာသည် အမျိုးသမီးများနှင့် မိန်းကလေးငယ်များထံသို့ ပိုမိုကြီးမားစွာ ရိုက်ခတ်နေခြင်းကြောင့်ဖြစ်၍ ဖြစ်သင့်ဖြစ်ထိုက်သည်ဟု ဆိုနိုင်ပါသည်။

အံအားသင့်စရာအချက်ကို အမျိုးသားကျန်းမာရေးအဖွဲ့မှ သုတေသီများက မကြာသေးခင်က ထုတ်ပြန်ခဲ့သည်။ “တစ်ကိုယ်ကောင်းစိတ် ကိုယ်ရည်ကိုယ်သွေး စံလွဲမှု” (Narcissism Personality Disorder) NPD ဟူသည့် ကုသရမည့် ရောဂါလက္ခဏာတစ်ရပ်အဖြစ် သတ်မှတ်နိုင်သော အခြေအနေတွင်ရှိသည့် အမေရိကန်လူမျိုး ၃၅၀၀၀ ၏ စရိုက်လက္ခဏာတို့ကို ကိုယ်စားပြု၍ လေ့လာစစ်ဆေးခဲ့ခြင်း ဖြစ်သည်။ ဘ၀တစ်လျှောက် ထိုသို့သော လက္ခဏာမျိုး ကြုံတွေ့ခဲ့ရဖူးသလောဟု မေးမြန်းရာတွင် အသက်ကြီးသူများသည် အချိန်ပိုမိုကြာရှည်စွာ အသက်ရှင်နေထိုင်ခဲ့သူများ ဖြစ်သည့်အလျောက် အသက်ငယ်ရွယ်သူများထက် ကြုံတွေ့ခဲ့နိုင်ချေ ပိုများသည်ဟု ယူဆနိုင်ပါသည်။ သို့ရာတွင် တွေ့ရှိချက်သည် ပြောင်းပြန်ဇောက်ထိုး ဖြစ်နေသည်ကို တွေ့ရပေသည်။ အသက် ၆၅ နှစ်အထက် လူများ၏ ၃% ခန့်သာလျှင် NPD ရှိခဲ့ဖူးပြီး အသက် ၂၀ ကျော်အရွယ်များက ၁၀% နီးပါးရှိသည်ကို နှိုင်းယှဉ်တွေ့ရှိရသည်။ အသက်ကြီးသူများအနေဖြင့် မိမိတို့၏ ငယ်စဉ်ဘ၀ စရိုက်လက္ခဏာများကို မေ့လျော့သွားခြင်းကြောင့်ဟု ယူဆနိုင်သော်လည်း ဤမျှလောက် ကွာဟချက်ကြီးမားစေရန်မှာ အတော်များများ မေ့လျော့မှသာ ဖြစ်နိုင်ပေသည်။ လူ ၁၀ ယောက်လျှင် ၁ ယောက်နှုန်းနီးနီးသည် အသက် ၂၀ ကျော်အရွယ်တွင်ပင် NPD ရရှိနေပြီဖြစ်ပြီး အဆိုပါနှုန်းမှာ လာမည့် ဆယ်စုနှစ်တွင် မည်မျှအထိ မြင့်တက်လာမည် ဆိုသည်မှာ မတွေးဝံ့စရာပင် ဖြစ်နေပေသည်။

အပြုအမူပိုင်းဆိုင်ရာ ကြီးမားသောပြောင်းလဲမှုများလည်း ရှိနေသည်။ တစ်ကိုယ်ကောင်းစိတ် ပိုမိုများပြားသူများတွင် စတင်ပြီး သိပ်မများသူများအပေါ် ကူးစက်ရောက်ရှိသွားတတ်သည့် ယဉ်ကျေးမှုဆိုင်ရာ အပြောင်းအလဲများကို ဆိုလိုသည်။ ဥပမာအားဖြင့် အရေပြားခွဲစိတ်ပြုပြင်ခြင်း (Plastic Surgery) သည် ဆယ်နှစ်အတွင်း ခြောက်ဆခန့် မြင့်တက်လာသည်။ ရုပ်ပိုင်းဆိုင်ရာ သဘောထားများ ပိုမိုတိုးပွားလာပြီး လူတို့သည် အကောင်းဆုံးကို လောလောဆယ် အသုံးပြုနိုင်ရန်အတွက် ကြွေးတင်ခံလိုစိတ် ပိုမိုလာခဲ့သည်။ ကျော်ကြားသူများ၏ အတင်းအဖျင်း စာမျက်နှာများပါဝင်သော မဂ္ဂဇင်းများမှာ ပိုမိုလူကြိုက်များလာခဲ့ပြီး အခြားသော မဂ္ဂဇင်းနှင့် သတင်းစာများ၏ စောင်ရေများ ထိုးကျခဲ့သည်။ ပါးစပ်အဟောင်းသားဖြစ်စရာ သာဓကတစ်ခုအနေဖြင့် ကျော်ကြားသူတစ်ဦးအဖြစ် ဟန်ဆောင်နိုင်ရန် ညအချိန်အပြင်ထွက်လျှင် မိမိနောက် တကောက်ကောက်လိုက်ပြီး ဓာတ်ပုံရိုက်စေမည့် ပါပါရာဇီ အတုများကို ယနေ့အချိန်တွင် ငှားရမ်းအသုံးပြုနိုင်နေပြီ ဆိုခြင်းပင် ဖြစ်သည်။ (ပါပါရာဇီလာနေပြီ ဒီဘက်တိုးနေဟူသည့် သီချင်းစာသားတွင်လည်း တစ်ဘို့တည်းဝါဒ (Narcissistic) အငွေ့အသက်တချို့ကို ရှူရှိုက်မိပါသည်) လွန်ခဲ့သော ငါးနှစ်အတွင်းက ဤသို့သောအရာများ နားနှင့်မျှ မကြားခဲ့ရသေးပါ။

ထို့ကြောင့် လူ့အဖွဲ့အစည်းတစ်ရပ်လုံးမှာ ယခင်ကထက်ပိုမို အတ္တကြီး၊ တစ်ကိုယ်ကောင်းဆန်ပြီး တစ်ဘို့တည်းဝါဒီများ များပြားလာနေပြီဟု ယူဆနိုင်ပါသည်။ လူတို့တွင်သာမက လူ့တန်ဖိုးသတ်မှတ်ချက်စနစ် (Value System) တစ်ရပ်လုံးဟုပင် ဆိုနိုင်ပါသည်။

◄ တေဇာ ► ဇန်န၀ါရီ (၂၇)

Ref:

Narcissismepidemic

The Narcissism Epidemic