ကွန်ဒိုထဲက ထွက်လို့ လမ်းမပေါ် စလျှောက်လိုက်ချင်းချင်းပဲ ရင်ထဲ ဟာခနဲဖြစ်သွားတယ်။ ဘာလို့ ငါက တစ်ယောက်တည်းဖြစ်နေရတာလဲဆိုတဲ့ အတွေးမှာ ကာလအတန်ကြာ တိမ်မြှုပ်နေတဲ့ ရင်ထဲက အထီးကျန်မှုဟာ ဘယ်ဆီကမှန်းမသိ ရုတ်တရက်ဆိုသလို ပြန်ပေါ်လာတယ်။ ရထားလမ်းပေါ်မှာ တွေဝေမိန်းမော ထိုင်နေမိတဲ့လူတစ်ယောက် တဖြည်းဖြည်းနီးကပ်ကျယ်လောင်လာတဲ့ ရထားခုတ်သံကို ရုတ်တရက် သတိပြုမိလိုက်သလိုမျိုး၊ အသည်းငယ်ချင်စရာ ထိတ်လန့်မှုမျိုးပေါ့။ ခုန အပေါ်ထပ်ဝရန်တာမြင့်မြင့်ကနေ ဒီလမ်းပေါ်မှာ သွားလာနေတဲ့ လူတွေကို ငါ ငုံ့ကြည့်နေသလို အခုငါ့ကို ငုံ့ကြည့်နေသူ တစ်ယောက်ယောက်ရှိမလား။ မရှိဖို့ များတယ်လို့ တွေးမိလိုက်တော့ ပိုပြီးတုန်လှုပ်သွားတယ်။ ကိုယ့်ခြေလှမ်းတွေကို ကိုယ်ပြန်ကြည့်နေတုန်းပဲ အခုလို လမ်းလျှောက်လေ့ရှိတဲ့ လူတစ်ယောက်ကို သတိရလာတယ်။ သူ အခုဘယ်မှာလဲ သူလည်း အခုချိန် ငါ့လို တစ်ယောက်တည်း လမ်းလျှောက်နေမလား။ လျှောက်နေတယ်ဆိုရင် သူလည်း အထီးကျန်နေမလား၊ ဒါမှမဟုတ် ဘာတွေကို တွေးနေမလဲ။ ဒီလိုနဲ့ ဖုန်းခေါ်ပြီး အကြောင်းအရင်းကို အရေးတကြီး ရှင်းပြလိုက်မိတယ်။ သူက ပြန်ပြောတယ်။ ကျွန်တော် အခု လမ်းတော့လျှောက်မနေဘူး၊ တစ်ယောက်တည်းတော့ တစ်ယောက်တည်းပဲတဲ့။ ဈေးဝယ်စင်တာကြီးတစ်ခုရဲ့ ပေါ်တီကိုရှေ့နားလေးကနေ ခေါင်းမော့ရင်း တိမ်တွေကို ငေးငေးကြည့်နေတယ်ဆိုပဲ။ ကျွန်တော်လည်း ရယ်လိုက်မိတယ်။ အခုတော့ ကျွန်တော်ဖုန်းဆက်လိုက်တဲ့အတွက် ခင်ဗျားနည်းနည်းတော့ ဂုဏ်တက်သွားတာပေါ့၊ ကိုယ့်ကို ဂရုမစိုက်တဲ့ ရေးကြီးသုတ်ပြာလူအုပ်ကြီး ကြားထဲမှာ တစ်ယောက်တည်း တိမ်တွေကိုငေးငေးနေတာထက်စာရင်၊ စပ်ဖြဲဖြဲရုပ်နဲ့ ဖုန်းပြောတဲ့ လူတစ်ယောက်က ပိုပြီးတော့ အဆီအငေါ်တည့်မှာ၊ အနည်းဆုံးတော့ သူဟာ တစ်ယောက်တည်းမဟုတ်ဘူး၊ တစ်ယောက်ယောက်နဲ့ အဆက်အသွယ်ရှိနေပြီး ပြောစရာအကြောင်းတစ်ခုခုရှိနေတဲ့ လူ့အဖွဲ့အစည်းဝင်တစ်ဦးနဲ့ ပိုတူလာတယ် မဟုတ်လား။ ကျွန်တော်လည်း အခု ရင်ဘတ်ကိုကော့ပြီး လမ်းလျှောက်နေတယ်၊ အနည်းဆုံးတော့ ကျွန်တော့်မှာ တစ်ယောက်ယောက်နဲ့ ပြောစရာကိစ္စတစ်ခုခု ရှိနေတယ်ဆိုတာ ဘေးနားကလူတွေသိစေရမယ်လို့ ပြောရင်း ဖုန်းထဲကနေ ရယ်သံချင်း ဖလှယ်လိုက်ကြတယ်။ ဖုန်းချလိုက်ပြီးနောက်တော့ ကျွန်တော်လည်း အရင်အတိုင်း ခြေလှမ်းတွေကိုကြည့်ရင်း လမ်းဆက်လျှောက်နေမိတယ်။ ဟုတ်တယ်၊ ငါ တစ်ယောက်တည်းတော့ တစ်ယောက်တည်းပဲ၊ ဒါပေမဲ့ ငါ့လို လမ်းလျှောက်မနေပေမယ့်၊ တိမ်တွေကိုငေးငေးနေတဲ့ လူတစ်ယောက်လည်း တစ်နေရာမှာ ရှိနေတယ်၊ အဲဒီလူရဲ့ အတွေးထဲမှာ ငါရှိနေတယ် ဆိုတဲ့အသိမှာ ကျွန်တော့်ရဲ့ တည်ရှိမှုကို ကိုယ့်ကိုယ်ကိုယ် သက်သေထူလိုက်နိုင်တယ်။ ဒီတော့လည်း ရထားခုတ်သံကို လန့်သွားတဲ့ သံလမ်းပေါ်ကလူဟာ ရထားကြီး တခြားစင်္ကြန်ဘက် လမ်းလွဲသွားတာ မြင်လိုက်ရသလို၊ အဲဒီသံလမ်းပေါ်မှာပဲ နောက်တစ်ခါ ရထားသံကို ရုတ်တရက် မကြားရခင်အထိ ဆက်လက်တွေဝေမိန်းမောနေရုံပဲ။
Dedicated to ဇာတိ (အန္တိမ)
Image: kikiandtea.com
တေဇာ (လရောင်လမ်း)
မတ် ၂၀၁၄
http://wunzinminraja.blogspot.sg/
ReplyDelete