အိပ်မက်ဆန်ဆန် နာရီသံတချို့မှာ...

ပြောင်းလဲဖို့ အသင့်ပြင်နေတဲ့ ကျောက်ရိုင်းတုံး...။  ~လေးဖြူ~

ပန်းပေါင်းစုံ ဝေဆာဖူးပွင့်နေဟန်တူတဲ့ ဥယျာဉ်လေးတစ်ခုထဲ ညက ကျွန်တော် ရောက်သွားဖြစ်တယ်။ ထူးခြားတာက ခုတစ်ကြိမ်မှာ ကျွန်တော့်ဘေးမှာ မိန်းကလေးငယ်တစ်ယောက် ပါနေတာပဲ။ ဒီလို နေရာဒေသနဲ့ ဒီလိုတွဲဖက်မှုမျိုး ကျွန်တော် တစ်ခါမျှ (ဘယ်တုန်းကမျှ) မကြုံဖူးဘူး။ မိန်းကလေးက သာယာလိုက်တဲ့အချိန်ပဲနော်လို့ ကျွန်တော့်ကိုကြည့်ရင်း ပြောလိုက်တယ်။

တကယ်တော့ အခုအချိန်ဟာ ညီမနဲ့ကိုယ် ချစ်သူတွေမဖြစ်ခင်က သာယာလှပတဲ့ အတိတ်တစ်ချိန်ပေါ့ကွယ် လို့ ကျွန်တော်က ပြန်ပြောလိုက်မိတယ်။ ဟွန် လို့ သူမဆီက အာမေဋိတ်အသံ ထွက်လာတယ်။ သူက ကျွန်တော်နဲ့ အဲဒီအချိန်တုန်းက (အတိတ်က) အထိ ချစ်သူတွေမဟုတ်ကြသေးမှန်း ခုမှ သတိပြုမိဟန် တူတယ်။ ကျွန်တော် ကိုယ်တိုင်လည်း ကိုယ့်စကားသံ ကိုယ်ပြန်ကြားမှ အဲဒါကို သတိရသွားသလိုပဲ။ ဒါပေမဲ့ ကျွန်တော့်စကားဟာ အကြွင်းမဲ့မှန်ကန်ပါတယ်လို့ သူရောကျွန်တော်ရော အဲဒီအခိုက်အတန့်မှာ ထူးထူးဆန်းဆန်း ယုံကြည်နေကြတယ်။ ဒါမှမဟုတ် ကျွန်တော်ဟာ သူ့ရဲ့ချစ်သူ ဖြစ်လာမယ့်သူလို့ ရုတ်တရက်သိလိုက်ရလို့ အံ့သြသွားပုံမျိုးနဲ့လည်း တူတယ်။

ဒီတော့ အစ်ကိုက ညီမကို ချစ်တယ်လို့ ပြောတော့မယ်ပေါ့ လို့ သူက ချစ်စဖွယ်ပြုံးရင်း မေးလိုက်တယ်။ ကျွန်တော်က ခေါင်းခါပြလိုက်မိတယ်။ အဲဒါက ညီမက ကိုယ့်ကိုအရင်ပြောခဲ့တာလေ လို့ ပြုံးရင်း ပြန်ပြောလိုက်တယ်။ အဲဒီတော့ အစ်ကိုက ဘာပြန်ပြောလဲ လို့ သူက မဆိုင်းမတွ မေးတယ်။ အစ်ကိုက ညီမကိုချစ်တဲ့အကြောင်း ပြန်ပြောခဲ့တာပေါ့ လို့ ကျွန်တော်ကဖြေပြီးတော့ နှစ်ယောက်သား ပြိုင်တူ ရယ်မောလိုက်မိကြတယ်။

§ § § § § § §

တကယ်တော့ ဒါဟာ အိပ်မက်ပဲ...။

တကယ်တော့ ဒါတွေအားလုံးဟာ သိစိတ်အတွင်းက သိသိသာသာ လစ်ဟာနေတဲ့ ကွက်လပ်တွေကို နက်ရှိုင်းလှတဲ့ မသိစိတ်ထောင့်တစ်နေရာက အိပ်မက်အတွင်းမှာ လှစ်ပြလိုက်သလိုမျိုးပဲ။ ဒီလို အိပ်မက်မျိုး ကျွန်တော် မမက်ဖူးဘူး။ ဒီလို ကြည်နူးဖွယ်ရာအိပ်မက်မျိုး ကျွန်တော် မက်လေ့မက်ထ မရှိခဲ့ဘူး။ ကိုယ့်ထက် အင်အားအဆမတန်သာလွန်နေတဲ့ သတ္တ၀ါဆန်းကြီးတွေနဲ့ မနိုင်မှန်းသိရက် တိုက်နေရ သလိုမျိုး၊ နိုးနေပြီလို့ ကိုယ့်ကိုယ်ကို သိတာတောင် မျက်နှာကိုခေါင်းအုံးနဲ့ တကယ်ဖိထားတာကို အစွမ်းကုန် ရုန်းကန်ရနေသလို အမေပြောတဲ့ ဘီလူးစီးခြင်းမျိုး၊ တကယ်တော့ ဒါဟာ အိပ်မက်ပါလို့ အိပ်မက်ထဲမှာတင် ထူးထူးဆန်းဆန်း သိနေတဲ့ ခံစားချက်မျိုး... အဲဒီလို ဂယောက်ဂယက်နဲ့ ဒုစရိုက်ဆန်ဆန် အိပ်မက်တွေနဲ့သာ ကျွန်တော် ကျင်လည်ခဲ့ရတယ်။ ခုတော့ အဲဒါတွေနဲ့ အရောင်အသွေးမတူတဲ့ အိပ်မက်တစ်ခုကို မက်ခဲ့မိတယ်။

ဘာပဲပြောပြော လူစီအိပ်မက် (Lucid Dreaming) လိုမျိုး အိပ်မက်တွေကို ထိန်းချုပ်နိုင်ဖို့ ကျွန်တော် ဘယ်တုန်းကမျှ မကြိုးစားခဲ့ဖူးပါဘူး။ မက်ချင်တဲ့အိပ်မက်ဆိုးမက်စမ်း... အိပ်မက်ထဲမှာတောင် (သို့) အိပ်မက်ထဲမှာမို့လို့ မိုက်သွေးပြချင်တဲ့ဗီဇကလေးက ရှိခဲ့တော့...။ ဒါပေမဲ့ ကိုယ့်အကြောင်းကိုကိုယ် အတော်အတန်သိသူဆိုတော့ နိုးနိုးချင်းပြုံးတော့ ပြုံးမိခဲ့တယ်။ ချစ်တယ်လို့စပြောဖို့ကို အိပ်မက်ထဲမှာတောင် ၀န်လေးခဲ့တာကိုး။ ချစ်တယ်လို့ ၀န်ခံရမှာတောင် သူရဲဘောကြောင်နေတဲ့ သူကိုး...။ အဲဒီလို အခြောက်တိုက်မြင့်နေတဲ့ ဘ၀င်တစ်စွန်းတစ်စကို မြင်ရတော့လည်း ကိုယ့်ကိုယ်ကို သရော်တော်တော် ပြုံးမိပြန်တယ်။ မိန်းကလေးတစ်ယောက် အထင်ကြီးလေးစားစရာ အရည်အချင်းတွေ ချို့တဲ့ပါလျှက်နဲ့ ခခယယ လုပ်ရမှာ ရှက်နေတဲ့ကောင်ပဲ။ ဒီတော့လည်း မတတ်နိုင်ဘူး...။ တစ်စုံတစ်ယောက်ကို ကျွန်တော် ရှာဖွေမတွေ့ရှိသေးသလို တစ်စုံတစ်ယောက်ကမှလည်း ကျွန်တော့်ကို ရှာဖွေမတွေ့ရှိသေးဘူးလို့ အရင်လိုပဲ စိတ်ထဲက ကြွေးကျော် လိုက်မိတယ်။

ဒါနဲ့ အိပ်မက်ထဲကချစ်သူရဲ့ ပုံပန်းသွင်ပြင်ကို ကျွန်တော် မမှတ်မိခဲ့ဘူး...။ သေချာတာက သူက ချစ်စရာကောင်းတယ်။ ပြီးတော့ အဲဒီအိပ်မက်မှာ ကျွန်တော်ဟာ သူက စတင်ရှာဖွေတွေ့ရှိခဲ့တဲ့ ကျောက်ရိုင်းတုံးပဲ။

◄ တေဇာ ► နိုဝင်ဘာ (၂၆) ၂၀၀၉