ဈင်ဝါဒီ ချွမ်ဇူးက သူသည် လိပ်ပြာလေးတစ်ကောင်ဖြစ်ပြီး ပန်းခြံတွင်း ပျံဝဲပျော်မြူးနေသည်ဟု အိပ်မက်မက်နေခဲ့သည်။ နိုးလာသောအခါ သူက ဤသို့စဉ်းစားမိ၏။ “ငါဟာ လိပ်ပြာလေးတစ်ကောင် ဖြစ်သွားတဲ့အကြောင်း အိပ်မက်မက်နေတဲ့ လူသားတစ်ယောက်လား၊ ဒါမှမဟုတ် အခုလောလောဆယ်မှာ လူသားတစ်ယောက်ဖြစ်ကြောင်း အိပ်မက်မက်နေတဲ့ တကယ့် လိပ်ပြာတစ်ကောင်ပဲလား” ဟု တွေးမိပါသတဲ့...။ ထိုအချိန်မှစ၍ ဒွိဟသံသရာ စတင်လည်ပတ်ခဲ့ပါသည်။
§ § § § § § §
တကယ်တော့ ဘ၀ဆိုသည်မှာ အိပ်မက်ဆန် လွန်းလှပြီး အိပ်မက်ဆိုသည်မှာလည်း ဘ၀ပေးအသိကို ပေးနိုင်စွမ်း ရှိပါသည်။ အိပ်မက်ထဲမှ ချစ်ခြင်းမုန်းခြင်း၊ လိပ်ပြာငယ်ခြင်းများ အားလုံးကို နှလုံးသားက လက်တွေ့ကျကျ ခံစားရသည်။ တစ်ခါတရံ အိပ်မက်ထဲမှ မနိုင်ဝန်များကို ပုန်းရှောင်ရင်း ကယောင်ကတမ်း နိုးထလာမိသည်အထိ ဖြစ်တတ်သည်ကို ကြုံဖူးကြ ပါလိမ့်မည်။ ဘ၀ဆိုသည်ကရော အိပ်မက်နှင့်ဘာများ ထူးခြားကွာဟမှု ရှိပါသလဲ။ မျက်စိတစ်ဆုံးသာ မြင်နိုင်ပြီး အသံလှိုင်း၏ တုန်ခါမှုများ ဆိတ်သုန်းမသွားခင်လေးသာ ကြားရ၏။ တဖြည်းဖြည်းတရိပ်ရိပ် ရုပ်ပျက်ဆင်းပျက် ဖြစ်လာနေသော အတိတ်များဆီသို့ ကြိုးစားပမ်းစား အလည်သွားရပြီး မမွေးဖွားသေးသည့် (တကယ်မရှိသည့်) အနာဂတ်ကို စိတ်ကူးဖြင့် ပုံဖော်ကြည့်ရသည်။ ဘ၀ဆိုသည်မှာ လူ့ဦးနှောက်၏ Function ရှိသလောက်သာ သိမှတ်ခံစားနိုင်သည့် အရာ ဖြစ်ပါသည်။ ဤသို့လျှင် အိပ်ခြင်းနှင့် နိုးခြင်းကြား အလွှာပါးသလောက် အိပ်မက်နှင့် ဘ၀သည် ကျောချင်းကပ်လျှက်သားဖြစ်သည့်တိုင် ဒွန်တွဲမတည်ရှိနိုင်သော အရာနှစ်ခုသာဖြစ်၏။အရှိတရားအကြောင်း တွေးမိတိုင်း မိမိကိုယ်ကို သစ်ပင်တစ်ပင်သဖွယ်သာ ထင်မှတ်လာရ၏။ အရှိတရား၏ သဘာဝကို “ခံစားသိမှတ်မှု” “နားလည်မှု” “တွေ့ကြုံမှု” “ဘာသာပြန်မှု” နှင့် အရှိတရားအပေါ် “တုန့်ပြန်ချက်” တို့ဖြင့်သာ ထင်ဟပ်ရသည်။ ထိုအရာအားလုံးတို့မှာ ဦးနှောက်၏ လုပ်ငန်းဆောင်တာများသာ ဖြစ်ပါသည်။ စင်စစ် ဦးနှောက်၏ အလိုအလျောက် ကျင့်သားရ လုပ်ဆောင်ချက်များသာ ဖြစ်သည်။ လမ်းပေါ်တွင် လျှောက်သွားသည့် ချောမောလှပသော မိန်းကလေးငယ်တစ်ယောက်၏ အရှိတရားကို ထင်ဟပ်သော ကျွန်တော်တို့၏ အသိတွင် အတိတ်က တွေ့ခဲ့ဖူးသည့် မိန်းမချောများအားလုံး၏ စုပေါင်းရုပ်ပုံလွှာတစ်ခု ပါမည်။ လိင်ပိုင်းဆိုင်ရာ ဆန္ဒတချို့ပါမည်။ ယောက်ျားတစ်ယောက်၏ အရည်အသွေးပါမည်။ စသည့် ဦးနှောက်၏ တဇွတ်ထိုး ဖြစ်စဉ်များအရသာ ၎င်းအရှိတရားကို ကျွန်တော်တို့ လက်ခံလိုက်ရခြင်း ဖြစ်ပါသည်။ အရှိတရားနှင့်ပတ်သက်၍ မိမိဦးနှောက်၏ ချုပ်ချယ်ကန့်သတ်ချက် ဘောင်အတွင်းမှသာ ကျွန်တော်တို့ သိနိုင်ခြင်းဖြစ်ပါသည်။ အရှိတရားတစ်ခုအပေါ် ရှုမြင်ရာတွင် လူတစ်ရာရှိသော် အမြင် (၁၀၀) ကွဲခဲ့ပါလျှင် အစစ်အမှန်အရှိတရားသည် အဘယ်နည်း။ လမ်းမပေါ်မှ ကောင်မလေးတစ်ယောက်၏ Identity အစစ်အမှန်ကို ကာလသားများအားလုံး အတိအကျမသိနိုင်ခြင်းသည် လွန်စွာဝမ်းနည်းဖွယ် ကောင်းလှသည်။ လွန်လွန်ကျွံကျွံဆိုရလျှင် လူနှင့်သက်မဲ့တို့အကြား အဓိကကွာခြားချက်ကြီးဖြစ်သော “သိမှု” ၏ ဂုဏ်ရည်ကို ပြောင်ပြောင်တင်းတင်း ထိခိုက်စေခြင်း ဖြစ်ပါသည်။
ချွမ်ဇူး၏ လိပ်ပြာငယ်နှင့် လိပ်ပြာငယ်၏ ချွမ်ဇူးတို့သည် တစ်လှည့်စီ ရှင်သန်နေကြ၏။ ချွမ်ဇူးအနေဖြင့် လိပ်ပြာကို လိုက်ဖမ်း၍ မမိနိုင်သလို လိပ်ပြာငယ်မှာလည်း ချွမ်ဇူး၏ ကိုယ်ပေါ်တွင် နားနေခွင့် မည်သည့်အခါမျှ ရှိနိုင်လိမ့်မည် မဟုတ်တော့။ အတူတကွ ဆုံတွေ့နိုင်ခွင့်မရှိသည့် အနီးကပ်တည်ရှိနေသော အရာနှစ်ခုမှာ အစဉ်ထာဝရ လက်တစ်လုံးခြား လှည့်စားခံနေရပေတော့မည်။ ချွမ်ဇူး၏ ဒွိဟသည် လိပ်ပြာတစ်ကောင်၏ ဒွိဟနှင့် တူညီပါလိမ့်မည်။ ဤသို့လျှင် အရှိတရားလိပ်ပြာငယ်ကို မည်သူမျှ ဖမ်းဆုပ်နိုင်ခြင်း မရှိခဲ့ကြ။ သို့မဟုတ် အရှိတရားလူသားကို မည်သည့်လိပ်ပြာမျှ မတွေ့ရှိခဲ့ကြ။ လိပ်ပြာတစ်ကောင်ကို လိုက်ဖမ်းရန်ကြိုးစားရင်း လူသားသည် ပျောက်ဆုံးလာရသည်။ လူသားကို ရှာဖွေရန်အားထုတ်သော လိပ်ပြာသည်လည်း ပျောက်ဆုံးရပေမည်။ အရှိတရား၏ မရေရာမှုကို ရုပ်လုံးဖော်ရန်ကြိုးစားမိသော သူသည် ၎င်းကိုယ်တိုင်၏ အရှိတရားကိုပါ ဒွိဟပွားမိခြင်းအားဖြင့် စတေးလိုက်ရပေတော့မည်။ ထို့ကြောင့် တည်ရှိခြင်းအကြောင်းကို စပ်စပ်စုစု မစူးစမ်းမိခဲ့ခြင်းသည် ပို၍ကောင်းပါလိမ့်မည်။
ယခုသော် ကျွန်တော် အဆုံးသတ်ပါတော့မည်။ မကြာခင် အိပ်ယာဝင်ရပါတော့မည်။ ကျွန်တော်ဆိုသည့် အရာတစ်ခု ဒီအချိန်၊ ဒီနေရာတွင် ရှိခဲ့ကြောင်း ယခုစာသားများက သက်သေအထင်အရှား ပြသနိုင်လိမ့်မည် မဟုတ်ပါ။ နောင်နှစ်ပေါင်းများစွာကြာသော် ဤသို့ရေးခဲ့သော လူတစ်ယောက် ရှိကောင်းရှိနိုင်ခဲ့သည်ဟု ကျွန်တော်၏ အရှိတရားအပေါ် လူတချို့သည် ဤစာလုံးများမှတဆင့် မှန်းဆတွေးခေါ်ရုံသာ အများဆုံးအားဖြင့် တတ်နိုင်ကြပါလိမ့်မည်။ သို့သော် သူတို့ မှန်းဆသည့် “ပုံရိပ်” သည် ကျွန်တော်၏ တည်ရှိမှုနှင့် ထပ်တူကျလိမ့်မည် မဟုတ်ပါ။ ဤနည်းအားဖြင့် ကျွန်တော်၏ နောက်ဆုံးမျှော်လင့်ချက် လက်ကျန်သည်လည်းေ၀၀ါးသွားခဲ့ပါပြီ။ တည်ရှိခြင်းအကြောင်း သွေးတိုးစမ်းခြင်းအားဖြင့် ကျွန်တော်သည် အရှင်လတ်လတ်ပျောက်ဆုံးခဲ့ပြီ ဖြစ်သည်။ ဤစာသားများသည် လိပ်ပြာတစ်ကောင်၏ အိပ်မက်ထဲမှ စကားလုံးများမျှသာ ဖြစ်နေနိုင်ပါသည်။ မည်သို့ပင်ဖြစ်စေ တည်ရှိခြင်းအကြောင်း တွေးခေါ်မှုမပြုရန် နောက်ဆုံးအားဖြင့် အလေးအနက် တိုက်တွန်းလိုပါသည်။ ယခု ကျွန်တော့်ကိုယ်ကျွန်တော် ထားခဲ့ရပါတော့မည်။
◄ တေဇာ ► ဇန်န၀ါရီ (၅) ၂၀၁၀
Comments
Post a Comment