ပုထုဇဉ်များ အိပ်စက်စဉ် (၂)

ဆုံးဖြတ်ချက်ချမယ်ဆိုတဲ့နေ့မတိုင်မီ တစ်ပတ်အလိုကတည်းက ပြိုင်ပွဲမှာ အနိုင်ရမယ့်သူတစ်ဦးဦးကို ကြိုတင်ရှာဖွေနေဆိုတာက ကျွန်တော်တို့အတွက် အနားရနိုင်အောင်ပါ။ ဒီလိုဆိုရင် ဒိုင်လူကြီးတွေနဲ့ ကျွန်တော့်လို လက်ထောက်တွေပါ ခရစ္စမတ်အကြိုနေ့မှာ မိသားစုနဲ့အတူ ပျော်နေနိုင်တယ်လေ။ နာရီပေါင်းများစွာ တစ်မြို့လုံးကားပတ်စီးပြီး မတိမ်းမယိမ်းလှပတဲ့၊ အကောင်းဆုံးပြိုင်ပွဲဝင်အယောက်နှစ်ဆယ်ကို အချိန်ကပ်ကာမှ ကြိုးစားရွေးထုတ်နေရမယ့် အစားပေါ့။ အခုတော့ ကျွန်တော်တို့လုပ်စရာဆိုလို့ ဆုပေးနေ့ကျရင် ဂရစ်ဘွန်ရဲ့ ခြံဝန်းဆီ မောင်းသွားရုံပဲ ရှိတော့တယ်၊ မီးရောင်တွေနဲ့ဆူညံသံတွေကြားမှာ မျက်လုံးကန်းနားကွဲခံမယ်၊ ၀မ်းသာအားရလက်ဆွဲနှုတ်ဆက်ပြီး ဆုရစာချွန်လွှာလေး သူ့လက်ထဲထည့်ပေးလိုက်မယ်၊ ပြီးတာနဲ့ ခရစ္စမတ်သစ်ပင်တိ၊ ပစ္စည်းလေးတွေချိတ်၊ ဘီယာသောက်ပြီးနှပ်နေဖို့ အိမ်ကို အချိန်မီပြန်ပြေးလာရုံပဲ။
ခရစ္စမတ်ဆိုတဲ့အတွေးလေးနဲ့ ဟက္ကမန်ရဲ့ ဂမူးရှူးထိုးဉာဉ်နည်းနည်းအနည်ထိုင်ပြီး စိတ်ကောင်းဝင်နေချိန်မှာ သူဟာ စိတ်နှလုံးကောင်းမွန်သူကြီးရယ်လို့ မဟုတ်မဟတ်ပါးစပ်သတင်းတွေလည်း တော်တော်လေး ပြန့်နှံ့နေတယ်။ ဟက္ကမန်ကတော့ အားလပ်ရက်ပီပီ နေပါတယ်။ ဘယ်သတင်းထောက်မှ သတိမထားမိဘဲ ခွေးရူးဂရစ်ဘွန်တစ်ယောက် ထောင်ကထွက်လာတာ တစ်နှစ်တောင်ကြာပြီဆိုတော့ လူတကာခေါင်းငဲ့ကြည့်ရမယ့် သတင်းထူးတစ်ခုတော့ ဖြစ်လာတော့မယ်လို့ သူက ကြွေးကြော်နေပါသေးတယ်။


"အမလေး၊ ငါလည်း လမ်းပေါ်ပြန်ထွက်ဦးမှပဲ။ မဟုတ်ရင်တော့ တိုက်လည်း သတင်းမရှိတာနဲ့ ပိတ်ပစ်ရတော့မယ်"
သူ ဒီလိုပြောပြီး တစ်ရက်နှစ်ရက်အကြာမှာပဲ၊ သတင်းစာတိုက်က သူပြောသလို တကယ်ပိတ်ပစ်ရမယ့် ကိန်းဆိုက်သွားတယ်၊ လေလှိုင်းထဲကလာတဲ့ သတင်းလေးတွေ ရှိသေးပေလို့ပဲတော်ပါတော့တယ်။ သတင်းရှားပါးရတဲ့ အကြောင်းရင်းကတော့ ဂရစ်ဘွန်ဘာတွေလုပ်နေလဲဆိုတာကို စုံစမ်းဖို့ တိုက်မှာရှိသမျှသတင်းထောက်တွေကို ဟက္ကမန်က အပြင်ကိုလွှတ်နေလို့ပါပဲ။
ဟက္ကမန်လုပ်လို့ ကျွန်တော်တို့တွေ အသည်းအသန်ဖြစ်နေကြပေမယ့် ထောင်ကထွက်လာပြီးကတည်းက ဂရစ်ဘွန်ရဲ့ အနေအထိုင်နဲ့ပတ်သက်လို့ မသင်္ကာစရာသဲလွန်စတစ်ခုမှ ရှာမတွေ့ဘူး။ ဒီတော့ ကောက်ချက်ချနိုင်စရာက တစ်ခုတည်းရှိတော့တယ်၊ ရာဇ၀တ်မှုကျူးလွန်တာဟာ လစာကောင်းကောင်းရတဲ့အတွက် ဂရစ်ဘွန်ဟာ အသက်လေးဆယ်စွန်းစွန်းမှာပဲ အငြိမ်းစားယူလိုက်နိုင်ပြီး၊ ကျန်ရှိနေသေးတဲ့ သူ့ဘ၀အချိန်တွေကို စည်းစိမ်အပြည့်နဲ့ ဥပဒေဘောင်အတွင်းကနေ ဖြတ်သန်းနေရုံပဲလို့လေ။
ဒုတိယမြောက်နေ့အကုန်မှာတော့ ကျွန်တော်က ဟက္ကမန်ကို စိတ်ပျက်အားလျော့ပြီး ပြောလိုက်တယ်။
"သူပိုင်ဆိုင်တဲ့ ငွေတွေက တကယ်တော့ စတော့ဈေးကွက်နဲ့ စာချုပ်တွေကရတာဆိုတာ အမှန်ပါဗျာ။ လူလိမ္မာလေးတစ်ယောက်လို အခွန်လည်းမှန်မှန်ဆောင်ပါတယ်၊ ပြီး အရင်က သူ့ဆိုးဖော်ဆိုးဖက်တွေနဲ့လည်း သူ ပြန်မတွေ့တော့ပါဘူး"
"ဟုတ်ပါပြီ၊ ဟုတ်ပါပြီ၊ ဟုတ်ပါပြီ။ ထားလိုက်တော့၊ ကိစ္စမရှိဘူး" လို့ ဟက္ကမန်က မကျေမနပ် ပြောတယ်။ ကျွန်တော်အရင်က မြင်ဖူးတာထက်ကို ဟက္ကမန်တစ်ယောက် ပိုပြီး သွေးလေခြောက်ခြားနေသလိုပဲ။ သူ့ စားပွဲခုံပေါ် လက်ချောင်းလေးတွေနဲ့ တီးနေတတ်တယ်၊ အသံတစ်ခုခု ဗြုန်းခနဲ ကြားလိုက်ရရင် ထခုန်တယ်။
"သူ့ကို စွဲချက်တင်နိုင်လောက်စရာ ထူးခြားမှုတစ်ခုခု ဆရာ့မှာရှိလို့လား" လို့ ကျွန်တော်က မေးလိုက်တယ်။ ဒီလောက် စိတ်ပါဝင်စားမှုအပြည့်နဲ့ လူတစ်ယောက်နောက်ကို လိုက်နေတာဟာ ဟက္ကမန်ရဲ့ ပုံစံတော့မဟုတ်ပါဘူး။ ပုံမှန်အတိုင်းဆိုရင် ရာဇ၀တ်မှုကနိုင်နိုင်၊ တရားမျှတမှုကနိုင်နိုင် သူကတော့ သိပ်ဂရုစိုက်တဲ့ပုံ ပြတာမဟုတ်ဘူး။ သူစိတ်ဝင်စားတတ်တာမျိုးက အကြပ်အတည်းတွေဆီက ထွက်လာတဲ့ သတင်းဆောင်းပါးကောင်းကောင်းတွေပဲ။ "ဘာပဲဖြစ်ဖြစ်၊ ဒီလူဟာ မှန်မှန်ကန်ကန် နေနေပါတယ်ဗျာ" လို့ ကျွန်တော်ပြောလိုက်တယ်။
"ထားလိုက်တော့" လို့ပဲ ဟက္ကမန်က ပြန်ပြောတယ်။ ပြီးရုတ်တရက်ပဲ၊ သူ့ခဲတံကို ထက်ပိုင်းချိုးလိုက်ပြီး မတ်တပ်ထရပ်၊ ခြေလှမ်းကျဲကြီးတွေနဲ့ အပြင်ထွက်သွားတော့တယ်၊ သူပြန်နေကျအချိန်ထက် အများကြီးစောတယ်။
နောက်တစ်နေ့ကတော့ ကျွန်တော့်ရဲ့ နားရက်။ နေ့လည်အထိ ကျွန်တော်အိပ်နေကျပေမယ့်၊ ကျွန်တော့်အိပ်ခန်းပြတင်းပေါက်နားမှာ သတင်းစာရောင်းတဲ့ကောင်လေးက သတင်းစာအချပ်ပိုတွေ ဆူညံဆူညံလာရောင်းနေတယ်။ ခေါင်းကြီးသတင်းမဲမဲပြူးပြူးကြီးကို အရုပ်ဆိုးဆိုး စကားလုံးတစ်ခုနဲ့ရေးထားတယ်၊ ပြန်ပေးဆွဲခံရခြင်းတဲ့။ အောက်မှာရေးထားတာကတော့ မစ္စတာဂျေ စပရူး ဖှလီးဝုဒ်အိမ်မှ ယေရှုခရစ်၊ အပျိုစင်မေရီနှင့် ဂျိုးဆက်ပလာစတာအရုပ်များ ခိုးယူခံရပြီး၊ ခရစ္စမတ်အကြိုညတွင် ပြုလုပ်မည့် ခရစ္စမတ်ဆိုင်ရာပြင်ပမီးပန်းမီးဆိုင်းပြိုင်ပွဲကြီး၏ ဆုရွေးချယ်ပွဲမတိုင်မီ အရုပ်များပြန်လည်ရရှိရန် သတင်းပေးနိုင်သူ မည်သူကိုမဆို ဆုကြေးငွေဒေါ်လာတစ်ထောင်ပေးအပ်မည် ဆိုတာပါပဲ။
မိနစ်အနည်းငယ်အကြာမှာ ကျွန်တော့်ဆီကို ဟက္ကမန် ဖုန်းဆက်ပါတယ်။ ၀င်လာမစဲဖြစ်နေတဲ့ သဲလွန်စတွေကို ကူညီအစကောက်ဖို့ ရုံးကို ချက်ချင်းလာခဲ့ပါတဲ့။ ရဲတွေကတော့ ပြောပါတယ်၊ သဲလွန်စတစ်ခုခု ရှိခဲ့ရင်လည်း အပျော်တမ်းအလွတ်စုံထောက်တွေ တစ်လှေကြီးက ဖျက်ဆီးပစ်ပြီးပြီတဲ့။ ဒါပေမဲ့ ဒီခိုးဆိုးမှုကို တပူတပြင်းဖြေရှင်းရမယ်ဆိုတဲ့ ဖိအားမျိုးတော့ ရဲတွေမှာ မရှိပါဘူး။ အဲဒီညနေမှာပဲ ယေရှုခရစ်ရှာပုံတော်ဟာ လူတိုင်းလက်မလွတ်သင့်တဲ့ အပျော်တမ်းဝါသနာတစ်ခုဖြစ်သွားပါတော့တယ်။ ဒီတော့လည်း ရှာပုံတော်ဟာ ရဲတွေလုပ်ရမယ့်အလုပ်မဟုတ်တော့ဘူး၊ အရပ်သားတွေရဲ့ အလုပ်ပဲ။
လူအုပ်ကြီးဟာ တစ်အိမ်တက်တစ်အိမ်ဆင်းနဲ့ တောက်တောက်သွားယေရှုခရစ်ကလေးလေးများ တွေ့မိသလားလို့ လိုက်မေးကြတယ်။ ရုပ်မြင်သံကြားဇာတ်လမ်းတွေက ကြည့်မယ့်လူမရှိတဲ့အိမ်တွေကို လွှင့်နေရတယ်၊ မြို့တော်ရေဒီယိုက အိမ်တွေမှာ တယ်လီဖုန်းဖြေမယ့်လူ တစ်ယောက်မှမရှိဘူးလို့ ညည်းညည်းညူညူ ကြေငြာတယ်။ ဒီမြို့လေးမှာ တစ်ခုတည်းရှိတဲ့ မြင်းဇောင်းမှာ သွားရှာဖို့ လူထောင်ပေါင်းများစွာက အဆိုပြုကြတယ်၊ မြင်းဇောင်းပိုင်ရှင်လည်း ရှာပုံတော်ဖွင့်တဲ့လူအုပ်ကြီးကို ချောကလက်နဲ့ ဒိုးနပ်မုန့်တွေရောင်းပြီး မြိုးမြိုးမြက်မြက်လေး ရလိုက်သေးတယ်။ ဟိုတယ်လုပ်ငန်းအုပ်စုကြီးတစ်ခုကများဆိုရင်၊ ယေရှုခရစ်တောက်တောက်သွား၊ အပျိုစင်မေရီနဲ့ ဂျိုးဆက်တို့ကို ရှာတွေ့သူအား မေတ္တာဖြင့် အခန်းပေးတည်းမည်လို့တောင် စာမျက်နှာပြည့် ကြော်ငြာထည့်တယ်။ သတင်းစာအမျိုးမျိုးမှာ ခေါင်းကြီးသတင်းကလည်း ရှာပုံတော်သတင်းတွေပဲ၊ သတင်းစာအားလုံးလည်း ရောင်းမလောက်ပဲ။
ဘယ်လိုပဲဖြစ်နေနေ ဟက္ကမန်ကြီးတစ်ယောက်ကတော့ အရင်လိုပဲ အရွဲ့တိုက်မပြတ်၊ အဆိုးမြင်မပြတ်၊ မလိုအပ်ဘဲ အားမစိုက်တဲ့ဂိုက်နဲ့။
"ဘုရားရေ။ ဒီဇာတ်လမ်းလေးကို ယူပြီး၊ အကြီးကြီးဖြစ်အောင် ပုံကြီးချဲ့ပြီး ခရစ္စမတ်ကို အသက်ဝင်လာအောင် ခင်ဗျားလုပ်လိုက်တာပဲ" လို့ ကျွန်တော် သူ့ကိုပြောလိုက်တယ်။
ဟက္ကမန်ကတော့ စိတ်မ၀င်စားဘဲ ပုခုံးပဲ တွန့်ပြတယ်။
"သတင်းပါးနေချိန်မှာ အချိန်ကိုက် ဖြစ်လာတာလောက်ပါ။ ဒီထက်ပိုကောင်းတာတစ်ခု ရောက်လာရင်၊ ဒီသတင်းတွေဟာ ချက်ချင်းမျက်စိရှေ့က ပျောက်သွားမှာလို့ ငါတော့ မျှော်လင့်တာပဲ။ တစ်ယောက်ယောက် အော်တိုမစ်တစ်ဂျောက်ဂျက်သေနတ်ကြီးကိုင်ပြီး မူကြိုကျောင်းထဲ ၀င်သောင်းကျန်းတဲ့ အခါမျိုးမဟုတ်လား" တဲ့။
"ကျွန်တော်ပြောမိတာ ကျွန်တော့်အမှားပါ"
"သြော် မင်းကို ပျော်ရွှင်စရာဆာတန်နလီးယားပွဲလို့ ငါဆုတောင်းပေးပြီးပြီလား"
"ဆာတန်နလီးယားဆိုတာက..."
"အင်း။ ဒီဇင်ဘာလကုန်လောက်မှာ ကျင်းပတဲ့ ဓမ္မ န္တရာယ်တွေရဲ့ ပေါက်တတ်ကရရှေးဟောင်းပွဲတော်တစ်ခုပေါ့။ ရောမတွေလေ၊ ကျောင်းတွေပိတ်၊ ယမကာတွေ ရူးကြောင်မူးကြောင်ဖြစ်အောင်သောက်၊ လူသားအားလုံးကို မေတ္တာထားပါတယ်လို့ ပြောကြ၊ အချင်းချင်း လက်ဆောင်တွေပေးကြပေါ့"
ပြောရင်းဆိုရင်း သူက ဖုန်းကောက်ကိုင်လိုက်တယ်။
"ဟင့်အင်း၊ ကျွန်တော်တို့ ကိုယ်တော်ဘုရားကို ရှာမတွေ့သေးပါဘူး အစ်မရေ။ ဟုတ်ကဲ့ အစ်မ၊ ရှာတွေ့ရင်တော့ အချပ်ပိုမှာ ထည့်ပေးမှာပါ။ ဟုတ်ကဲ့ အစ်မ၊ မြင်းဇောင်းကိုတော့ တော်တော်လေး စေ့စေ့စပ်စပ်ရှာပြီးပါပြီ။ ကျေးဇူးးးပါ။ ဒါပဲနော်.."
****
ရှာပုံတော်က ပိုပြီး လူတွေစုပြုံလာတယ်၊ ပျောက်နေတဲ့အရုပ်တွေကို အလေးအနက်ရှာတာထက်စာရင် အပျော်တမ်းဇာတ်ကနေကြသလိုပါပဲ။ လက်တွေ့ကျကျပြောရရင်တော့ စုံထောက်ကျော်ကြီးတွေအတွက် ရှာတွေ့နိုင်ဖို့ အခွင့်အလမ်းက သိပ်မရှိလှပါဘူး။ သူတို့က အာကျယ်အာကျယ်နဲ့၊ သူတို့သွားချင်တဲ့နေရာ၊ ဒါမှမဟုတ် သွားချင်စရာနေရာတွေကိုသာ ရွေးပြီး လိုက်ရှာနေကြတာကိုး။ ဂေါက်ကြောင်မှန်းသိသာတဲ့ အရုပ်သူခိုးအဖို့တော့ ဒီလို ကမောက်ကမ ခိုးရာပါပစ္စည်းတွေကို လူမမြင်အောင်သိမ်းထားဖို့ သိပ်ခက်လှတာမှမဟုတ်တာ။
ဒါပေမဲ့ ရှာဖွေသူတွေရဲ့ စိတ်က သူတို့ ၀င်ရောက်သရုပ်ဆောင်နေတဲ့ ပုံဆောင်ပြဇာတ်ထဲမှာ လှောင်ပိတ်မိနေကြတယ်၊ သတင်းစာတွေရဲ့ ကူညီဝါဒဖြန့်မှုမပါဘဲ ခိုင်မာတဲ့မျှော်လင့်ချက်တစ်ခုက သူ့အလိုလို ဖြစ်ထွန်းနေတယ်။ တော်ဝင်မိသားစုကိုတော့ ခရစ္စမတ်အကြိုနေ့မတိုင်မီမှာ မုချရှာတွေ့ရမယ်လို့ပေါ့။ ဒါပေမဲ့ ခိုးဆိုးမှုရဲ့ တန်ဆာခံ၊ ဂျေ စပရူး ဖှလီးဝုဒ် (ခေါ်) ခွေးရူးဂရစ်ဘွန်ရဲ့ ခြံကျယ်ကြီးကနေ ချိတ်ဆွဲထားတဲ့ ငါးရာဝပ်ဒ်အား မီးဆိုင်းတွေမှအပ၊ အဲဒီအကြိုနေ့မှာ ကြယ်အသစ်တစ်လုံးတလေတောင် တောက်ပမနေခဲ့ပါဘူး။
ထုတ်လုပ်ရေးကုမ္ပဏီကြီးတစ်ခုရဲ့ ဥက္ကဋ္ဌ၊ အိမ်ခြံမြေဘုတ်အဖွဲ့ရဲ့ သဘာပတိနဲ့ မြို့တော်ဝန်ကြီးတို့ဟာ ဇိမ်ခံကားကြီးရဲ့ နောက်ဆုံးမှာထိုင်ရင်း၊ ကျွန်တော်နဲ့ ဟက္ကမန်က သူ့ရှေ့က ခုန်ဆွဆွအခန်းမှာထိုင်ရင်း ပထမဆုစာချွန်လွှာကို ဂရစ်ဘွန်ဆီသွားပေးဖို့ လမ်းမှာ ရောက်နေကြပါတယ်။ ဂရစ်ဘွန်က ပျောက်သွားတဲ့ အရုပ်တွေနေရာမှာ ပုံစံတူအသစ်ထပ်လုပ်ပြီး အစားထိုးပြီးသွားပြီ။
"ဒီလမ်းအတိုင်း ဆင်းသွားရမှာလား" လို့ ယာဉ်မောင်းက မေးတယ်။
"ကြယ်တွေနောက်ပဲ လိုက်မောင်းသွားပါ" လို့ ကျွန်တော်က ပြောလိုက်တယ်။
"အဲဒါ မီးရောင်တွေပါကွာ။ ပိုက်ဆံရှိရင် ဘယ်သူမဆို အိမ်ထဲမှာ ချိတ်ထားလို့ရတဲ့ သောက်လျှပ်စစ်မီးရောင်တွေပါ" လို့ ဟက္ကမန်က ၀င်ပြောတယ်။
"အဲဒီ သောက်လျှပ်စစ်မီးရောင်တွေနောက် လိုက်မောင်းသွား" လို့ ကျွန်တော်လည်း ပြောလိုက်တယ်။
ဖဲပြားတပ်ဝတ်စုံပြည့် ၀တ်ပြီး ကျွန်တော်တို့ကို မျှော်နေတဲ့ ဂရစ်ဘွန်က သူကိုယ်တိုင် ကားတံခါးလာ ဖွင့်ပေးတယ်။
"ပျော်ရွှင်စရာခရစ္စမတ်ပါ လူကြီးမင်းများခင်ဗျား"
သူက မျက်လွှာကိုချ၊ သူ့ရဲ့ဝမ်းဗိုက်လုံးလုံးကြီးပေါ်မှာ လက်တွေကို ဂါရ၀အပြည့်နဲ့ယှက်ထားပြီး မီးဆိုင်းတွေတပ်ထားတဲ့နေရာနဲ့ လမ်းဆီကိုဆက်သွယ်ထားတဲ့၊ ကြိုးခွေတွေနဲ့ ကာရံထားတဲ့လမ်းလေးအတိုင်း ကျွန်တော်တို့ကို ဦးဆောင်ခေါ်သွားတယ်။ "ဒါဟာ နတ်ကွန်းတစ်ခုနဲ့တောင်တူနေမှာလို့ ကျွန်တော်တွေးနေတာ၊ ဒီအနားပတ်ချာလည်မိုင်ပေါင်းများစွာက လူတွေက ကြယ်စင်တွေကိုမျှော်ကြည့်ပြီး ဒီနေရာကို လာကြမှာဆိုတော့လေ" ပြောရင်းဆိုရင်း သူက ဘေးကပ်ပြီး ကျွန်တော်တို့ကို ရှေ့ဆက်သွားဖို့ ညွှန်ပြတယ်။
အဲဒီနောက်မှာတော့ ကြက်သေသေစရာမြင်ကွင်းကြီးဟာ ကျွန်တော်တို့ကို မူးနောက်နောက်ဖြစ်စေပြန်ပါတော့တယ်၊ အိမ်ပြင်ကိုယ်ကာယလေ့ကျင့်ခန်းသင်တန်းလုပ်နေကြသလို၊ ခံစားချက်ကင်းမဲ့တဲ့မျက်နှာနဲ့ အရုပ်တွေက လှုပ်တုတ်လှုပ်တုတ်နဲ့ အတောင်တွေကို တဖျပ်ဖျပ်ခတ်နေကြတယ်။
"မူးယစ်ဂိုဏ်းရဲ့ နိဗ္ဗာန်ဘုံပဲ" လို့ ဟက္ကမန်က တီးတိုးပြောတယ်။
"အောင်မလေးးးး" မြို့တော်ဝန်က လန့်ပြီး ယောင်တယ်။
အိမ်ခြံမြေသဘာပတိကြီးခမြာ အတော်အထင်ကြီးသွားပုံပဲ၊ ဒါပေမဲ့ သူက ချောင်းဟန့်ပြီး သူ့ကိုယ်သူ ရဲဆေးတင်လို့ အိနြေ္ဒပြန်ဆယ်လိုက်တယ်။
"သြော်.. ဒီလိုအပြင်အဆင်မျိုးကိုး" သူ့ကာအိနြေ္ဒကို ကျားကုတ်ကျားခဲလိုက်ဖမ်းပြီး ပြောလိုက်တယ်။
"အရုပ်အသစ်တွေကို မင်းဘယ်ကရတုံး" လို့ ဟက္ကမန်က မေးတယ်။
"ကုန်တိုက် ပစ္စည်းသိုလှောင်ခန်းထဲက လက်ကားဈေးနဲ့ဝယ်တာပေါ့" လို့ ဂရစ်ဘွန်က ဖြေတယ်။
"ပြောင်မြောက်တဲ့ အင်ဂျင်နီယာပညာပါပဲ" ထုတ်လုပ်ရေးမှူးက ၀င်ပြောတယ်။
"ဒါကိုလုပ်ဖို့ အင်ဂျင်နီယာလေးယောက်တောင် သုံးလိုက်ရတယ်လေ" လို့ ဂရစ်ဘွန်က ဂုဏ်ယူစွာပြောတယ်။
"ဘုရားမလို့၊ အရုပ်တွေခိုးသွားတဲ့လူက နီယွန်ရောင်ခြည်စက်ဝိုင်းတွေကိုတော့ ထားခဲ့တယ်။ အနောက်မှာထားထားတယ်၊ ပိုပြီးလှသွားအောင်ကြည့်ချင်ရင် ကျွန်တော် အဲဒါကို ဖွင့်ပြီး မှိတ်တုတ်မှိတ်တုတ် လုပ်ပြမယ်လေ"
"နေပါစေ နေပါစေ။ ပြင်လွန်းလို့ဖင်ချွန်းဆိုသလို ဖြစ်သွားပါ့မယ်" လို့ မြို့တော်ဝန်က ကပြာကယာတားတယ်။
"ဒါနဲ့ ကျွန်တော် နိုင်မှာလားဟင်" ဂရစ်ဘွန်က ယဉ်ယဉ်ကျေးကျေးမေးလိုက်တယ်။
"အင်း.. ခင်ဗျားအနိုင်ရမှာလားလို့ မေးတာလား။ ဒါတော့ ကျွန်တော်တို့ သေချာအောင်ဆွေးနွေးရဦးမှာပေါ့။ ဒီညနေကျရင် ခင်ဗျားကို အသိပေးပါ့မယ်"
အခုတော့ ဘယ်သူ့ဆီမှာမှ ပြောစရာစကားရှာမရတော့သလို ဖြစ်သွားတယ်၊ ဒါနဲ့ ကျွန်တော်တို့လည်း ဇိမ်ခံကားကြီးဆီ ပြန်လာခဲ့ကြတယ်။
"လျှပ်စစ်မော်တာ သုံးဆယ့်နှစ်လုံး၊ စုစုပေါင်းဝါယာကြိုးအရှည်က နှစ်မိုင်၊ မီးသီးပေါင်း ကိုးရာခွန်နစ်ဆယ့်ခြောက်လုံး၊ နီယွန်မီးတွေ မပါသေးဘူး" လို့ ကျွန်တော်တို့ ကားမောင်းထွက်စဉ်မှာပဲ ဂရစ်ဂွန်က လှမ်းပြောလိုက်သေးတယ်။
"အခုဒီနေရာမှာပဲ အနိုင်ရစာချွန်လွှာကို သူ့လက်ထဲ ထည့်လိုက်ရတော့မှာ၊ အဲဒီလိုပဲ စီစဉ်ထားတာမဟုတ်ဘူးလား" အိမ်ခြံမြေသဘာပတိက မေးတယ်။
"အဲဒါလုပ်ဖို့တော့ ကျုပ်ဘာသာ ဒီရောက်အောင်မလာနိုင်ပါဘူး။ တစ်ခွက်တစ်ဖလားလောက်ချဖို့ တစ်နေရာရာမှာများ ရပ်ကြဦးမလား"
"သူ နိုင်နေတာအသိသာကြီးပဲ" ထုတ်လုပ်ရေးမှူးက ပြောလိုက်တယ်။ "သူ မဟုတ်ဘဲ တခြားလူတစ်ယောက်ကို ဆုဘယ်လိုလုပ်ပေးရဲမလဲ။ ကြည့်ရတာအတော်လေးဆိုးပေမယ့် အပြင်းထန်ဆုံး အင်အား၊ ဒေါ်လာနဲ့ ကီလိုဝပ်တွေသုံးပြီး သူနိုင်သွားပြီလေ"
"နောက်ထပ်သွားကြည့်စရာ နေရာတစ်ခု ကျန်သေးတယ်" လို့ ဟက္ကမန်က ပြောလိုက်တယ်။
"ကျွန်တော်က ဒီတစ်နေရာတည်းကြည့်ဖို့ လာကြတယ်ထင်နေတာ။ အဲဒီလို သဘောတူပြီးသားမဟုတ်ဘူးလား"
ဟက္ကမန်က ကတ်ပြားတစ်ကတ်ကို ထုတ်ပြလိုက်တယ်။ "အင်း.. ဒါက လုပ်ထုံးလုပ်နည်းအရပါ။ တရားဝင်ပိတ်ချိန်က ဒီနေ့နေ့လည်လေ။ ဒီပြိုင်ပွဲဝင်က ပိတ်ချိန်မတိုင်မီ နှစ်စက္ကန့်အလိုမှာ အမြန်ချောပို့နဲ့ ရောက်လာတယ်။ ကျွန်တော်တို့ သူ့ကို စစ်ဆေးဖို့အချိန်မရလိုက်ဘူးလေ"
"ဘာပဲဖြစ်ဖြစ် ဖလီးဝုဒ်ရဲ့ဟာကိုတော့ မီမှာမဟုတ်ပါဘူး။ ဘာလိုဟာမျိုးက မီနိုင်မှာလဲ၊ လိပ်စာက ဘယ်မှာလဲ" လို့ မြို့တော်ဝန်က မေးလိုက်တယ်။
ဟက္ကမန်က လိပ်စာကိုပြောလိုက်တယ်။
"မြို့စွန်က ချောင်ကလောင်ထဲမှာပါလား။ ကျွန်တော်တို့မိတ်ဆွေကြီး ဖလီးဝုဒ်နဲ့တော့ ပြိုင်ဘက်မဟုတ်ပါဘူး" လို့ အိမ်ခြံမြေသဘာပတိက ဆိုတယ်။
"ဒီတစ်အိမ်ကိုတော့ ချန်ထားလိုက်ပါတော့။ ကျွန်တော့်မှာလည်း ဧည့်သည်တွေနဲ့ တွေ့စရာရှိသေးတယ်။ ပြီးတော့...."
"လူတွေကမလေးမစား ဖြစ်မှာပေါ့" လို့ ဟက္ကမန်က တည်ကြည်လေးနက်စွာ ပြောလိုက်တယ်။ ဟက္ကမန့်ပါးစပ်က အခုလို တလေးတစားစကားတွေထွက်လာတာ ကြားရတာ ဂွတော့ကျပါတယ်။ အော်ဂလီဆန်စရာအကောင်းဆုံး ဘ၀ပုံစံတွေကတော့ ကြွက်၊ မျှော့နဲ့ လူလေးစားခံရအောင်လုပ်နေသူတွေပဲတဲ့၊ တစ်ခါတုန်းက သူပြောခဲ့ဖူးတာပဲ။
ကားနောက်ခုံမှာထိုင်နေတဲ့ ဂုဏ်သရေရှိပုဂ္ဂိုလ်သုံးဦးအတွက်တော့ ဟက္ကမန်ပြောလိုက်တဲ့စကားက အထင်ကြီးစရာဖြစ်နေသလို အကြပ်လည်းရိုက်စေတယ်။ မရိုးမရွနဲ့ မပီမသညည်းတွားလိုက်ကြပေမယ့် ပြန်လည်ချေပဖို့အတွက်တော့ သတ္တိမရှိကြပြန်ဘူး။
"မြန်မြန်တော့ လုပ်ကြမှ" လို့ပဲ မြို့တော်ဝန်က ပြောလိုက်ရတော့တယ်၊ ဒါနဲ့ ဟက္ကမန်လည်း ယာဉ်မောင်းဆီ ကတ်ပြားလေးကို လှမ်းပေးလိုက်တယ်။
ကျွန်တော်တို့မီးပွိုင့်မိနေစဉ်မှာပဲ ခရစ်တော်လေးကို ရှာပုံတော်ဖွင့်နေတဲ့ ဟေးလားဝါးလားလူတစ်အုပ်နဲ့ တည့်တည့်လာတိုးတယ်။ တော်ဝင်မိသားစုကို ဘယ်မှာဖွက်ထားသလဲ သိကြလားလို့ ကျွန်တော်တို့ဆီ အော်ဟစ်မေးမြန်းနေတယ်။ သူ့ကိုယ်သူ ဘာဖြစ်သွားမှန်းတောင် သိလိုက်ပုံမရဘဲ မြို့တော်ဝန်က ကားတံခါးကနေ ခေါင်းပြူပြီး၊ ဂရစ်ဘွန့်အိမ်အထက်က လျှပ်စစ်မီးတွေဆီ လက်ညှိုးထိုးပြီး "အဲဒီမီးရောင်တွေအောက်မှာတော့ ခင်ဗျားတို့ ရှာတွေ့မှာမဟုတ်ဘူး" လို့ လှမ်းပြောလိုက်တယ်။ အဲဒီအချိန်မှာပဲ တခြားလူတစ်အုပ် သီချင်းဆိုရင်း ကျွန်တော်တို့ရှေ့က ဖြတ်လျှောက်သွားတယ်။
မေရီကမွေးလို့ အားလုံးကိုဘ၀ဂ်ထိခေါ်ဆောင်ပေးမယ့် ခရစ်တော်ပါ
နှစ်လိုဖွယ်မေတ္တာနဲ့ စောင့်ကြပ်တဲ့ နတ်ဒေ၀တာ
ပုထုဇဉ်များအိပ်စက်စဉ်မှာ
မီးပွိုင့်အရောင်ပြောင်းသွားတာနဲ့ ကျွန်တော်တို့လည်း ဆက်မောင်းခဲ့တယ်၊ အိမ်ကြီးအိမ်ကောင်းတွေ တရိပ်ရိပ်နောက်မှာကျန်ခဲ့တဲ့တစ်လျှောက် စကားသံတွေလည်း စဲသွားတယ်။ ဂရစ်ဘွန်ရဲ့ ခြံကျယ်ကြီးဆီကထွက်နေတဲ့ လျှပ်စစ်မီးရောင်တွေက စက်ရုံတစ်ခုရဲ့ အနက်ရောင် မီးခိုးခေါင်းတိုင်နောက်မှာ ပျောက်ကွယ်သွားတယ်။
"လိပ်စာတော့ မှန်ပါတယ်နော်" လို့ ယာဉ်မောင်းက မသင်္ကာသလိုမေးတယ်။
"ဒီလူ ကိုယ့်လိပ်စာတော့ ကိုယ်သိမယ်ထင်တာပဲ" ဟက္ကမန်က ပြန်ပြောတယ်။
"လာမိတာမှားပြီ" လို့ ထုတ်လုပ်ရေးမှူးက သူ့လက်ပတ်နာရီကို ကြည့်ရင်းပြောလိုက်တယ်။ "ဂရစ်ဘွန်ဖြစ်ဖြစ်၊ ဖလီးဝုဒ်ဖြစ်ဖြစ် သူ့နာမည်ဘာပဲဖြစ်ဖြစ် သူ့ဆီကို ဖုန်းဆက်ပြီး ခင်ဗျားထိုက်ထိုက်တန်တန် အနိုင်ရသွားပြီလို့ ပြောလိုက်တာပဲကောင်းမယ်။ အခုလို ချော်တောငေါ့နေမှာထက်စာရင်"
"ဟုတ်ပါတယ်။ ဒါပေမဲ့ ဒီလောက်ထိလာပြီးမှတော့လည်း ဘာပဲဖြစ်ဖြစ် ကြည့်လိုက်ဦးစို့" လို့ မြို့တော်ဝန်က ပြောတယ်။
မှောင်နေတဲ့လမ်းသွယ်လေးတစ်ခုဆီ ဇိမ်ခံကားကြီးကို ကွေ့ဆင်းလိုက်စဉ်မှာပဲ ချိုင့်ခွက်တစ်ခုထဲ ဆောင့်ကျသွားပြီး ကားက ရပ်သွားတယ်။ "ရောက်ပါပြီ လူကြီးမင်းများခင်ဗျား" လို့ ယာဉ်မောင်းက ပြောတယ်။
ဗလာကျင်းနေပြီး အမိုးမပါတဲ့ ယိုင်နဲ့နဲ့အိမ်ကလေးတစ်လုံးရှေ့မှာ ကျွန်တော်တို့ကားကို ပါကင်ထိုးလိုက်တယ်။ အိမ်ရဲ့ အတောင့်တင်းဆုံးနေရာကတော့ ဖွာလန်ကျဲနေတဲ့ အကာတွေပါပဲ။ လူနေဖို့မသင့်တော်တော့တဲ့ အခြေအနေဆိုတာ ကြေငြာထားသလိုပဲ။
"ကြွက်တွေ ခြတွေရော ပြိုင်ပွဲဝင်ဖြစ်ခွင့်ရှိသလား" လို့ မြို့တော်ဝန်က ပြောတယ်။
"ကျွန်တော့်ကိုပေးတဲ့လိပ်စာကတော့ ဒါအမှန်ပဲ" လို့ ယာဉ်မောင်းက ကာကွယ်ပြောဆိုတယ်။
"ကားလှည့်ပြီး အိမ်ပဲ ပြန်တော့မယ်" လို့ မြို့တော်ဝန်က ပြောလိုက်တယ်။
"ခဏနေပါဦး။ အနောက်က ကျီထဲမှာ အလင်းရောင်တွေ့တယ်။ အမလေး၊ ဒီလောက်အဝေးကြီးလာပြီးတော့ စစ်ဆေးရဦးမှာပါလား" လို့ အိမ်ခြံမြေသဘာပတိက ပြောလိုက်တယ်။
"ကျီးထဲမှာ ဘယ်သူရှိလဲလို့ သွားကြည့်စမ်း" မြို့တော်ဝန်က ယာဉ်မောင်းကို ပြောလိုက်တယ်။
ယာဉ်မောင်းက ပုခုံးတွန့်ပြပြီး ကားထဲကထွက်လို့ နှင်းဖုံးနေတဲ့ အမှိုက်သရိုက်တွေကိုဖြတ်ပြီး ကျီဆီ လျှောက်သွားတယ်။ သူ့လက်သီးနဲ့ ထုလိုက်လို့ တံခါးက အလိုလိုလျှောပြီး ပွင့်သွားတယ်။ အတွင်းက မှိန်ပြပြထွက်ကျလာတဲ့ အလင်းရောင်မှာ အရိပ်တစ်ခုလိုထင်နေတဲ့ ယာဉ်မောင်းဟာ တဖြည်းဖြည်းဒူးထောက်ကျသွားတာကို ကျွန်တော်တို့တွေ့လိုက်ရပါတော့တယ်။
"သူ အရက်များမူးနေသလား" လို့ ဟက္ကမန်က ပြောလိုက်တယ်။
"မဟုတ်လောက်ပါဘူး" လို့ မြို့တော်ဝန်က တီးတိုးပြောတယ်။ သူ့ နှုတ်ခမ်းတွေကို သပ်နေတယ်။ "ငါထင်တာတော့ သူ ၀တ်ပြုနေတာထင်တယ်၊ သူ့ဘ၀မှာ ပထမဆုံးအကြိမ်အဖြစ်.." ပြောရင်းဆိုရင်း မြို့တော်ဝန်က ကားထဲကထွက်သွားတော့ ကျွန်တော်တို့လည်း သူ့နောက်ကနေ ကျီရှိရာဆီ စကားတစ်ခွန်းမှမပြောဘဲ လိုက်ခဲ့ကြတယ်။ ယာဉ်မောင်းဆီရောက်ချိန်မှာပဲ ကျွန်တော်တို့ကိုယ်တိုင်လည်း သူ့ဘေးမှာ ကိုယ်စီဒူးထောက်ကျသွားကြပါတယ်။
ကျွန်တော်တို့ရှေ့မှာတော့ ပြင်ပကလေလှိုင်းတွေရန်ကနေ ခိုလှုံနေကြတဲ့ အပျိုစင်မေရီနဲ့ ဂျိုးဆက်၊ ကောက်ရိုးအိပ်ယာမှာ အိပ်စက်နေတဲ့ ခရစ်တော်ကလေး။ တစ်ခုတည်းရှိနေတဲ့ အလင်းရောင်ကတော့ ဆီမီးအိမ်တစ်ခုက ဖြာကျနေတယ်၊ ဖြာကျနေပုံကလည်း သူတို့ကို ကြည်နူးမေတ္တာတွေနဲ့ အသက်ဝင်နေစေပုံမျိုး။
****
ခရစ္စမတ်နေ့ နံနက်ခင်းမှာတော့ တော်ဝင်မိသားစု ဘယ်နေရာမှာ ရှာတွေ့တယ်ဆိုတဲ့အကြောင်း သတင်းစာခေါင်းကြီးပိုင်းက ပါလာတယ်။ အေးစက်အထီးကျန်နေတဲ့ ကျီဆီကို ခရစ္စမတ်နေ့ တစ်နေ့လုံး လူတွေအလုံးအရင်းနဲ့ ၀တ်ပြုဖို့ တဖွဲဖွဲရောက်လာကြတော့တယ်။ သတင်းစာအတွင်းပိုင်းက စာမျက်နှာဖြည့်သတင်းနေရာမှာတော့ ခရစ္စမတ်ဆိုင်ရာနှစ်စဉ်ပြင်ပမီးပန်းမီးဆိုင်းပြိုင်ပွဲကြီးကို လျှပ်စစ်မော်တာသုံးဆယ့်နှစ်လုံး၊ ၀ါယာကြိုးအရှည်နှစ်မိုင်၊ နီယွန်မီးမပါ၊ မီးသီးကိုးရာခုနစ်ဆယ့်ခြောက်လုံး၊ စစ်ကျန်မိုးလေ၀သဘောလုံးတစ်လုံး အသုံးပြုပြီး မစ္စတာစပရူးဖလီးဝုဒ်က အနိုင်ရသွားခြင်းဆိုတဲ့ သတင်းငယ်လေးတစ်ခုပါပါတယ်။
အလုပ်ထဲမှာတော့ ဟက္ကမန်က သူ့စားပွဲမှာပဲ ပြဿနာရှာဆဲ၊ အရင်တုန်းကလိုပဲ အလိုမကျဖြစ်နေဆဲပါပဲ။
"အရမ်းကိုကောင်းတဲ့ သတင်းပါပဲဗျာ" ကျွန်တော်က ပြောလိုက်တယ်။
"ငါတော့ စိတ်ကုန်နေပြီ" လို့ ဟက္ကမန်က ပြန်ပြောတယ်။ သူ့လက်တွေကို ပွတ်တယ်။ "အခု ငါစောင့်နေတာက ဇန်န၀ါရီလ၊ ခရစ္စမတ်အတွက် လျှပ်စစ်မီတာဘီလ်တွေ ရှင်းရမယ့်လ။ ကိုယ့်ကိုယ်ကိုယ်သေကြောင်းကြံဖို့အတွက် အကောင်းဆုံး လပေါ့"
"ဒါတော့ဒါပေါ့။ ခရစ္စမတ်သတင်း နောက်ဆက်တွဲလေးတွေလည်း မျှော်လင့်လို့ရပါသေးတယ်။ အရုပ်တွေကို ခိုးသွားတဲ့ တရားခံက မပေါ်သေးဘူးလေ"
"ဘယ်သူ ခိုးသလဲဆိုတာ မင်းက ဘယ်လိုရှာမတုံး။ ပုံစံမှာဖြည့်ထားတဲ့နာမည်က အတု၊ ပြီးတော့ ကျီရဲ့ ပိုင်ရှင်ကလည်း ဒီမြို့မှာမရှိတော့တာ ဆယ်နှစ်လောက်ကြာနေပြီ"
"လက်ဗွေရာလေ။ အရုပ်တွေပေါ်မှာ ကျွန်တော်တို့ လက်ဗွေရှာလို့ရတယ်လေ"
"ဒီလိုအတွေးမျိုး နောက်တစ်ခါထပ်ပြောကြည့်၊ မင်းကိုငါ အလုပ်ထုတ်ပြီ"
"အလုပ်ထုတ်မယ်...၊ ဘာပြစ်ချက်နဲ့လဲဗျာ"
"ဘာသာရေးအထွဋ်အမြတ်ပစ္စည်းတွေကို မဖွယ်မရာပြုမူမှုနဲ့ပေါ့ကွ" လို့ ဟက္ကမန်က ၀င့်ထည်စွာပြောလိုက်တယ်၊ ဒီတော့လည်း အဲဒီကိစ္စအမှုပိတ်လိုက်ရရုံပဲရှိပါတော့တယ်။ သူပြောခဲ့သလိုပါပဲ၊ ဟက္ကမန်ရဲ့ စိတ်အာရုံကတော့ အနာဂတ်မှာဖြစ်လာမယ့် သတင်းတွေဆီမှာပဲ ရှိနေတယ်။ သူကတော့ နောက်ပြန်လှည့်မကြည့်တတ်တဲ့လူစားမျိုးကိုး။
ဒီခိုးဆိုးမှု၊ ရှာပုံတော်ဖွင့်မှုနဲ့ ခရစ္စမတ်တို့နဲ့ပတ်သက်ပြီး ဟက္ကမန်ရဲ့ နောက်ဆုံးလေးစားမှုပြတဲ့ အပြုအမူကတော့ ခရစ္စမတ်နေ့မှာ ကျွန်တော့်ကို အဲဒီကျီဆီ ဓာတ်ပုံသမားတစ်ယောက်နဲ့ လွှတ်လိုက်တာပါပဲ။ ဒီအလုပ်မျိုးက သူ့အတွက် ရိုးအီနေတဲ့ ထမင်းစားရေသောက်အလုပ်မျိုးလေ။
"အနောက်ဘက်ကနေ လူအုပ်ကြီးကိုရိုက်၊ အရုပ်တွေက ကင်မရာကို မျက်နှာမူနေပါစေ။ အပြစ်သားတွေက ဖုန်တထောင်းထောင်းထအောင် လျှောက်ကြတာနဲ့ အခုလောက်ဆိုရင် အရုပ်တွေပေါ်မှာလည်း ဖုန်ထုတက်နေလောက်ပြီ။ ဒီတော့ မင်းတို့ ဓာတ်ပုံမရိုက်ခင် သုတ်ပစ်ဖို့ ရေပတ်လေးတစ်ခုလောက် ယူသွားတာ ပိုကောင်းမယ်" လို့ ဟက္ကမန်က စီမံညွှန်ကြားနေပါတော့တယ်။

တေဇာ (လရောင်လမ်း)
While Mortals Sleep by Kurt Vonnegut ကို ဆီလျော်သလို ဘာသာပြန်ဆိုပါသည်။