အိပ်မက်ဆိုး

[ ၁ ]

`ပေ့စ်´ လမ်းပျောက်နေပြီ။ ဤကိစ္စနှင့်ပတ်သက်၍ သံသယဖြစ်စရာကို မလိုတော့။ အစပိုင်းတွင် တောအုပ်သည် အတော်အတန် ကောင်းမွန်သည့် နေရာတစ်ခု ဖြစ်မည့်ပုံထင်ရသည်။ စိတ်ဝင်စားစရာ ငှက်များ၊ တိရိစ္ဆာန်များနှင့် ပြည့်နှက်နေသည်။ မီးမွှေးရန် ဖြစ်နိုင်မည် ထင်ရသော အပင်များလည်း အနှံ့အပြား ပေါက်ရောက်နေကြသည်။

ယခု လေးရက်ခန့်ကြာသော် အပင်များက မီးမွှေးရန် စွတ်စိုထိုင်းမှိုင်းလွန်းပြီး ငှက်များကလည်း ပေ့စ် ညအခါ အိပ်မရနိုင်လောက်အောင် ဆူညံလှုပ်ရှားနေကြကြောင်း တွေ့ရှိရသည်။ သူ့အား အန္တရာယ်ပေးရန်ကြိုးစားသည့် တိရိစ္ဆာန်တစ်ကောင်ကောင်နှင့် ယခုထိ ရင်မဆိုင်ရသေးသည်ကိုသာ ကျေးဇူးတင်ရတော့မည်။ မဟုတ်သေး။ သူ့အား အောင်မြင်စွာ အန္တရာယ်ပေးနိုင်သည့် တိရိစ္ဆာန်တစ်ကောင်ကောင်ဆိုလျှင် ပိုမှန်လိမ့်မည်။

အပြိုင်စကြ၀ဠာတစ်ခု၏ ဝေးလံခေါင်ဖျားလှသော ဂြိုဟ်တစ်ခုပေါ်မှ နေထိုင်သူမရှိ၊ အစိမ်းသက်သက် တောကြီးမျက်မည်းကြီးတစ်ခုအတွင်း ပေ့စ် လမ်းပျောက်နေခြင်းဖြစ်သည်။ ဤနေရာရှိ တဒုန်းဒုန်း ဆူညံသံများကလည်း သူ့ကို ရူးသွားစေမတတ်။ နေထိုင်သူမရှိသည့် တောကြီးထဲမျက်မည်းထဲတွင် ဤတဒုန်းဒုန်း ထုရိုက်သံများက မည်ကဲ့သို့ ရောက်နေသနည်းဟု ရုတ်တရက်တွေးမိလိုက်စဉ်မှာပင် သူ၏ ဘယ်ဘက်ရှိ ခြုံပုတ်တစ်ခုအတွင်းမှ တင်းပုတ်တစ်ခု ပေါ်ထွက်လာသည်ကို သူ ရိပ်ခနဲ မြင်လိုက်ရလေသည်။

[ ၂ ]

သူ ပြန်လည် သတိရလာချိန်တွင် ကမ္ဘာမှ အတော်ဆုံးဒီဇိုင်နာ လက်မှိုင်ချရလောက်အောင် လှပသေသပ်သည့် သားမွှေးဘီကီနီတစ်မျိုးအား ၀တ်ဆင်ထားကြသော မိန်းမပျို လေးဒါဇင်ခန့် ၀ိုင်းရံထားသော တလင်းပြင်တစ်ခုအတွင်း ထိုင်နေသည်ကို ကိုယ့်ကိုယ်ကိုယ် တွေ့လိုက်ရသည်။ အိပ်မက်မဟုတ်ကြောင်း သေချာစေရန် မိမိကိုယ်ကို ဆိတ်ကြည့်ချင်စိတ်ကို သူ အနိုင်နိုင် မြိုသိပ်လိုက်ရသည်။

`ဟဲလို´

ဦးခေါင်းမှ ဒဏ်ရာကြောင့် ရီဝေေ၀ဖြစ်နေသည့်ကြားမှ သူက နှုတ်ဆက်လိုက်သည်။

အသက် ၁၈ နှစ်ဝန်းကျင်ခန့်ရှိမည့် ကောင်မလေး တချို့ တလင်းပြင်ကိုဖြတ်ကာ ဘေးနားတစ်ဝိုက်မှ ရွံ့နှင့်ဆောက်ထားသော တဲကလေးများဆီသို့ ပျံသန်းသွားကြ၏။

`ဘုရား ဘုရား´

သူတို့ပျံသွားတဲ့ပုံစံက နတ်သမီးလေးတွေအတိုင်းပါပဲလားဟု သူတွေးလိုက်မိသည်။

အသက် ၂၃ နှစ်ခန့် ရှိဟန်တူသည့် အကြီးဆုံးမိန်းကလေးက ပေ့စ်အား ခြေဆုံးခေါင်းဆုံးကြည့်နေသည်။

`ရှင်က ယောက်ျားလား´ ဟု မေးလိုက်သည်။

`ခင်ဗျား မသိဘူးလား´ တုန်ရင်နေသော အသံကို ကြိုးစားထိန်းချုပ်ရင်း ပေ့စ်က ပြန်ပြောလိုက်သည်။

`လိပ်မျိုးနွယ်တွေနဲ့ ဖြစ်တဲ့ ပဋိပက္ခတစ်ခုမှာ ကျွန်မတို့ရဲ့ ယောက်ျားတွေ အကုန်လုံး သေသွားခဲ့တယ်။ နေဦး ရှင် မမေးနဲ့။ လွန်ခဲ့တဲ့ နှစ်အနည်းငယ်အတွင်းမှာ ကျွန်မတို့ဟာ ယောက်ျားများများရှိအောင် ဒီတောအုပ်ထဲမှာ ရှာဖွေရင်း အချိန်ကုန်ခဲ့ရတယ်။ ကလေးမွေးတဲ့ကိစ္စအတွက် ကူညီနိုင်အောင်လေ´

ဤအဖြစ်အတွက် နောက်တစ်ခါ ဘယ်တော့မှ ကိုယ့်ကိုယ်ကိုယ် ဆိတ်ကြည့်ပြီး အိပ်မက်လားဟု စမ်းသပ်ရန် မကြိုးစားတော့ဟု ပေ့စ် တိတ်တဆိတ် ဆုံးဖြတ်လိုက်သည်။

`ဒါဆို ကျွန်တော် ဘယ်တော့ စ,ရမလဲဟင်´

`ရှင် စ,ချင်ရင် အခုချက်ချင်းပဲပေါ့´

ဘယ်ဘက်ရှိ အရပ်ရှည်ရှည် ဆံညိုမလေးက ပြောလိုက်သည်။

ဝမ်းသာလုံးဆို့ကာ ပေ့စ်က သူ့လက်ဖ၀ါးများကို ပွတ်သပ်နေမိသည်။

`ကလေးတွေက ဟိုဘက်မှာ´ ဆံနီမလေးက ဆိုသည်။

ပေ့စ် အနည်းငယ် ကြောင်သွားသည်။

`ကလေးတွေဆိုတာ..´

`ဟုတ်တယ်လေ။ အစတုန်းကတော့ ကျွန်မတို့မှာ ယောက်ျားလေး လုံလုံလောက်လောက် ရှိခဲ့ပါတယ်။ လိင်ကိစ္စအတွက် အားတက်သရောနဲ့ အခမဲ့ ကူညီကြမယ့် ယောက်ျားတွေရှိတဲ့ မျိုးနွယ်စုတွေ ဒီတောထဲမှာ ပြည့်လို့။ ဒါပေမဲ့ ကျွန်မတို့အနေနဲ့ ကလေးတွေ မွေးမြူရတာ အရမ်းအလုပ်ရှုပ်ပြီး ကိုယ်တိုင်လုပ်ဖို့ အချိန်မရတော့ဘူး။ ဒါကြောင့် တခြား ဘယ်ယောက်ျားကိုမဆို အဲဒီ ဗာဟီရတွေလုပ်ဖို့ တာဝန်ချထားရတော့တယ်´ ဟု ရွှေရောင်ဆံပင်နှင့် ကောင်မလေးက စိတ်ရှည်လက်ရှည် ရှင်းပြသည်။

ရှေ့ဆုံးမှ ကောင်မလေးက ပေ့စ်လက်မောင်းကို ဆွဲယူလိုက်သည်။

`မပူပါနဲ့။ ထွက်မပြေးဘူးဆိုရင်၊ ကလေးအနှီးလဲတဲ့အလုပ်တွေကိုပဲ စိတ်ပါလက်ပါလုပ်မယ်ဆိုရင် ရှင့် ရှေ့လျှောက်ဘ၀က အဆင်ပြေမှာပါ´

ထို့နောက် သူမက နားမလည်နိုင်ဟန်ဖြင့်…

`ဘာလို့ ကိုယ့်ကိုယ်ကိုယ် ဆိတ်နေရတာလဲရှင့်..´

တေဇာ (လရောင်လမ်း)

စက်တင်ဘာ (၂၀) ၂၀၁၀

Paul O’Neill ၏ Phase in Space အား ဘာသာပြန်ဆိုသည်။