ကြယ်စင်တစ်စင်း၏ အညတရမကြွေလိုရခြင်းအကြောင်း

ကြွေသွားတဲ့ ကြယ်စင်လေးတစ်စင်းနဲ့
ညက...
အမှတ်မထင်ဆုံရတယ်
အလိုချင်ဆုံးဆန္ဒတစ်ခု
အဲဒီခဏမှာ
လေးလေးနက်နက်တောင်းဆုပြုခဲ့ရင်
ပြည့်စုံသတဲ့...။

သူနဲ့နီးစပ်ဖို့
ကျွန်တော်ဆုမတောင်းဖြစ်ခဲ့ဘူး
ကြယ်စင်လေးကို အားနာသမှုကြောင့်ပေါ့…။

အမှောင်ဟာ
အမြင်အာရုံကို ၀ါးမျိုတဲ့
အနက်ရောင် မိစ္ဆာဆိုရင်
အလင်းဟာလည်း
အဖြူရောင် တစ္ဆေပဲဖြစ်လိမ့်မယ်

ကွယ်လွန်သွားရှာတဲ့ ကြယ်စင်လေးတွေကို
လူမသိသူမသိ နေ့လယ်ခင်းတွေထဲ
အငြိုးတကြီး ပျံ့ကျဲစေခဲ့ပေါ့…။

ကြယ်စင်ဘ၀နဲ့
နေ့အခါမှာ
အညတရ မကြွေပါရစေနဲ့…
သူ့မျက်ဝန်းနဲ့ ဆုံတဲ့တစ်ညမှာ
ကျွန်တော်ချက်ချင်း ကြွေကျပြချင်လို့

သူရဲ့တောင်းဆုတစ်ခု
ဖြည့်ဆည်းခဲ့ဖို့အတွက်ပေါ့…။

ကျွန်တော့်ရဲ့ အလိုချင်ဆုံးဆန္ဒကိုတော့
ညက ကြွေသွားတဲ့ကြယ်စင်လေး
မသိခဲ့ရှာဘူး…။

<<<တေဇာ>>>
Dedicated 2 someone!
May 03 00:30 AM