လမ်း၏ ရှိခြင်းသည်လည်းကောင်း၊ လမ်း၏ အတိုင်းအတာ၊ အကွာအဝေးနှင့် အကောင်းအဆိုးသည်လည်းကောင်း၊ ခရီးသွားခြင်းကို အဆုံးအဖြတ် မပေးနိုင်။ လမ်းမရှိသည့်တိုင်၊ လမ်းဆုံးသွားသည့်တိုင်၊ ခရီးသွားတွင် သွားစရာခရီး ရှိနေဦးမည်သာ ဖြစ်သည်။ လူသည် ခရီးသွားဖြစ်၍ လောကသည် လမ်းဖြစ်၏။
`ခြေသလုံးအိမ်တိုင် မွန်ဂိုတို့၏ ရှေးစကား´
မောင်ညွန့်ဝင်းက အတိတ်မြို့တော်မှာ တက်စီမောင်းတယ်။ လမ်းကျွမ်းတယ်။ ကားအကြောင်းသိတယ်။ ကျွန်တော်က သူ့ဆရာကို ပင်လယ်ကမ်းစပ်ဆီ လိုက်ပို့စမ်းပါဗျာလို့ ပြောတာနဲ့ သူ့ဆရာက လိုက်ပို့ပေးတာ။ သူ့ကားမောင်းဖို့ မောင်ညွန့်ဝင်းကို ခေါ်လာတာ။ သူ့ဆရာလင်မယားနဲ့ ကျွန်တော့်ဇနီးက နောက်ခန်းမှာ ထိုင်တယ်။ ကျွန်တော်က ရှေ့ခန်းမှာထိုင်တော့ သူနဲ့ ဘေးချင်းတိုက်။ ဒီတော့လည်း မေးရင်းစမ်းရင်းနဲ့ စကားပြောဖြစ်တယ်။ လမ်းတွေအကြောင်း ပြောတယ်။ ကျွန်တော်တို့ငယ်ငယ်က ကားလမ်းတွေ အခုလို မပေါလှဘူး။ ကားနဲ့ မြစ်ကူးချောင်းခြားသွားဖို့ မလွယ်လှဘူး။ နောက်တော့ ဇက်နဲ့ကူးလို့ရတာတွေ ရှိလာတယ်။ ခုတော့ တံတားတွေအများကြီးပဲ ဦးလေးရာ။ ဇက်နဲ့ ကူးရတာတွေ နည်းကုန်ပြီလို့ မောင်ညွန့်ဝင်းက ပြောတယ်။ လမ်းနဲ့တံတားဆိုတာက လင်နဲ့မယားလိုပဲမဟုတ်လားလို့ သူက ထပ်ပြောတယ်။ ဘာကိုဆိုလိုမှန်းတော့ သေသေချာချာ မသိဘူး။ ဘာသာစကားဆိုတာကလည်း မက်တာဖော မပါလို့မှ မဖြစ်ဘဲ။ ဘာကိုဆိုလိုမှန်းမသိပေတဲ့ ကျွန်တော် ခေါင်းညိမ့်ပြလိုက်မိတယ်။ မောင်ညွန့်ဝင်းပြောတာကို နားထောင်နေရင်း တက်စီမောင်းတဲ့လူတွေဟာ ဗဟုသုတကြွယ်ဝတယ်ဆိုတဲ့ စကားတစ်ခုကို သတိရလိုက်မိတယ်။ ဟုတ်လောက်တယ်။ သူပြောတာတချို့ ကျွန်တော် လက်လှမ်းမမီဘူး၊ နားမလည်ဘူး။ ကားနောက်ခန်းက သူ့ဆရာက ဘောလုံးပွဲအကြောင်း လှမ်းမေးတော့ သူက ကားနောက်ကြည့်မှန်ထဲကနေ သူ့ဆရာကိုလှမ်းကြည့်ပြီး ဘောလုံးပွဲအကြောင်း ပြန်ပြောတယ်။ အာဆင်နယ်ဂိုးသမားက ဘာဖြစ်တယ်ဆိုသလား၊ ရီးရဲယ်မက်ဒရစ်က ကတုံးတစ်ကောင်က ဘယ်လိုဆိုသလား ဆိုတာတွေ ပြောတယ်။ ပညာရပ် အဆောက်အအုံတွေမှာ ပြောကြတဲ့ အတွင်းကျကျလေ့လာပြီး ပြောတယ် ဆိုတာမျိုးပဲ။ ကျွန်တော်ကတော့ သိပ်နားမလည်ဘူး။ သူပြောတာ နားထောင်နေရတာကိုက ကိုယ်မသိတဲ့လမ်းမှာ စမ်းလျှောက်နေရသလိုပဲ။ ဘောလုံးကစားတယ်ဆိုတာက ကျွန်တော်နဲ့ အဝေးကြီး။ ကျွန်တော်စဉ်းစားကြည့်နိုင်တဲ့ အတိုင်းအတာနဲ့ မမီနိုင်ဘူးလို့တောင် ပြောရင် ရလိမ့်မယ်။
ခုထိစဉ်းစားကြည့်တိုင်း လူတွေအများကြီး ဘောလုံးတစ်လုံးတည်းကို ဘာဖြစ်လို့ လုကန်နေရတယ်ဆိုတာ စဉ်းစားလို့မရဘူး။ ကျွန်တော့်မှာသာ လုပ်ပိုင်ခွင့်တစ်ရပ်ရှိရင် လိုက်လုမနေကြနဲ့ကွာ၊ လူစေ့တက်စေ့ ဘောလုံးတစ်လုံးစီ ရရစေ့မယ်။ ကန်ခွင့်ရစေ့မယ်လို့ပြောပြီး တစ်လုံးစီ ပေးလိုက်မယ်။ ဘောလုံးတစ်လုံးတည်းကို လိုက်လုနေကြမယ့်အစား ကိုယ့်ဘောလုံးနဲ့ကိုယ်ဆိုတော့ လိုက်လုနေစရာ မလိုဘူး။ လိုက်လုနေစရာမလိုရင် အာဃာတ နည်းတာပဲ။ လောဘ၊ ဒေါသ၊ မောဟ နည်းမှာပဲ။ လောဘ၊ ဒေါသ၊ မောဟ နည်းမှ အကုသိုလ်စိတ် နည်းမှာ။ ကမ္ဘာကြီးပိုပြီးပူနွေးလာတာကိုထိုင်ပြီး သောကပွားနေရတာထက် လူတွေမှာ အကုသိုလ်စိတ်နည်းရင် ပိုကောင်းတာပဲ မဟုတ်လား။ မိနစ်ကိုးဆယ်လုံးလုံး အချိန်ကုန်ခံ လုနေကြမယ့်အစား ဆယ်မိနစ်လောက်ဆို တော်ရောပေါ့။ သိပ်လည်း မပင်ပန်းကြရအောင်လို့။ မပင်ပန်းရင် မောဟနည်းတာပဲ။ လူဆိုတာ ပင်ပန်းရင် စိတ်တိုလာတာပဲလို့ ကြားဖူးတယ်။ ဟိုဖက်ထိပ်ဒီဖက်ထိပ်မှာ ဂိုးတိုင်ဆိုတာ ထားမယ့်အစား တစ်ဖက်တည်းမှာ အားလုံးသဘောတူတဲ့ နေရာလောက်မှာထား။ ကန်ချင်တဲ့လူက ကန်၊ ဘောလုံးကို လိုက်ဖမ်းချင်တဲ့လူက လိုက်ဖမ်း။ လိုက်လုနေစရာမလိုတော့ လိမ်တယ် လှည့်တယ်ဆိုတာတွေ ရှိတော့မှာမဟုတ်ဘူး။ အရင်တုန်းက ရေဒီယိုကနေ ဘောလုံးပွဲလာတာ အမှတ်မထင် နားထောင်ခဲ့ဖူးတယ်။ မောင်ဘယ်သူ မောင်ဘယ်ဝါကို အသာကလေးလှည့်ပြီး အသာခေါက်ပြီး ဘောလုံးကို လိမ်ယူသွားတယ်ဆိုသလားပဲ။ လိမ်တယ်၊ လှည့်တယ်၊ ခေါက်တယ်ဆိုတာတွေက ဘယ်မှာကောင်းလို့လဲ။ အရပ်ထဲမှာဆို ထောင်ကျသွားနိုင်တဲ့ကိစ္စ။ လိမ်တာက ဖိုးတွမ်တီးမဟုတ်ဘူးလား။ ခုဟာက ပိုမဆိုးဘူးလား။ ဘယ်ပြပြီး ညာကိုခေါက်ယူသွားတယ်လို့ ကြားရတယ်။ ဒီဖက်အသင်းက လူက ဟိုဖက်အသင်းကလူဆီ ဘောလုံးပါမသွားအောင် အသာကလေးလှည့်ပတ် ယူသွားတာ မဟုတ်လား။ လှည့်တယ်၊ ပတ်တယ်ဆိုတာ ယေဘုယျကျတဲ့ လူမှုရေးဆိုင်ရာ ကိုယ်ကျင့်တရားအရ မတော်မသင့်တဲ့ အပြုအမူပဲ။ မသိလိုက် မသိဘာသာဆို တော်သေးရဲ့။ ခုဟာက လူတွေ တစ်လှေကြီးရှေ့မှာ လုပ်တာ။ ပွဲကြည့်ပရိသတ်တွေ သက်သေရှိနေပါလျက်နဲ့ အလိမ်ခံရတာကို တစ်ဖက်အသင်းက ဘာလို့ တရားမစွဲသလဲဆိုတာ ကျွန်တော် စဉ်းစားကြည့်လို့မရဘူး။
တစ်ခုတော့ ရှိတယ်။ ဘောလုံးကွင်းဆိုတာ လိမ်တာ လှည့်တာကို ဥပဒေအရ ခွင့်ပြုထားပုံရတယ်။ ဘောလုံးကစားတာကို ပညာပါတယ်ပြောကြတာ အဲဒါပဲဖြစ်မယ်လို့ ကျွန်တော် ထင်တယ်။ ပညာသားပါပါနဲ့ လိမ်တယ်ဆိုတဲ့စကားဟာ ဘောလုံးကွင်းထဲကလာတာ နေမှာပဲလို့တောင် တွေးလိုက်မိတယ်။ ကစားတဲ့နေရာမှာ ပညာပါတယ်ဆိုတာက စစ်တုရင်ထိုးတာမျိုးကို ခေါ်တာလို့ ကျွန်တော်ထင်တယ်။ အများကြီး တွေးရတယ်။ ကြိုပြီး တွေးရတယ်။ ကြိုပြီးတွေးတတ်တာ လူတိုင်းအတွက် လိုတာပဲ။ ကြွေးရှင်ဒီလမ်းကလာရင် ကိုယ်က ဟိုလမ်းက သွားရတယ်ဆိုတာက တွေးတတ်လို့။ သေသေချာချာပြောရရင် ကြိုတွေးတတ်လို့ပဲ မဟုတ်ဘူးလား။ ဘောလုံးကစားရင်း ခြေထိုးခံတာတို့၊ ပခုံးချင်းယှဉ်ပြီး ဘေးချင်းဝင်တိုက်တာမျိုး လုပ်လို့မရဘူး။ ယောက္ခမဆိုတာ တည့်အောင်ပေါင်း၊ ကျောင်းကို ထုတ်၊ ဥပုသ်ရက်ရှည်စောင့်ခိုင်းမှာ.. ဆိုတာကိုကြည့်။ အရှည်ကြည့်ပြီး စနစ်တကျ ကြံစည်တာ။ ဒါမျိုးက စစ်တုရင်တို့ ကျားတို့ထိုးတဲ့လူတွေ တွေးပုံမျိုး။ ကျွန်တော်ကတော့ ဘောလုံးကစားတယ်ဆိုတာကို နားမလည်တော့ သူတို့လိုလည်း တွေးတတ်မှာမဟုတ်ဘူး။ စပ်မိတော့ အဖေ့ကို ပြောပြဖူးတယ်။ အဖေက ဘောလုံးတွေဘာတွေ စိတ်မပါပေတဲ့ ကျွန်တော့်လို မဝေဖန်ဘူး။ ကိုယ်မလုပ်နိုင်တာ တစ်ခုကို ဝေဖန်ဖို့မသင့်ဘူးလို့ ပြောတယ်။ နောက်တစ်ချက်ကတော့ လူတိုင်းလျှောက်တဲ့လမ်းနဲ့ လူတိုင်းမလျှောက်တဲ့လမ်း ရှိတယ်ဆိုတဲ့အကြောင်း ပြောပြဖူးတယ်။ ဘယ်လိုလမ်းမှာပဲ လျှောက်လျှောက် ကိုယ်မလျှောက်ဖူးဘဲနဲ့ လမ်းရဲ့အကြောင်းကို အပြစ်ပြောရင်တော့ သိပ်တရားလှမယ်မဟုတ်ဘူးလို့ ပြောတယ်။ အဲဒီကတည်းက ကျွန်တော်မလုပ်နိုင်တာကို မဝေဖန်တော့ဘူး။ မလျှောက်ဖူးတဲ့လမ်းအကြောင်း မပြောတော့ဘူး။
ဘောလုံးအကြောင်း ကျွန်တော် မပြောနိုင်ပေတဲ့ လမ်းအကြောင်းတော့ မောင်ညွန့်ဝင်းနဲ့ ပြောဖြစ်တယ်။ လမ်းက ကောင်းတဲ့နေရာမှာ သိပ်ကောင်းတာပဲ။ ဒါပေတဲ့ ပျက်တဲ့နေရာ ဆိုးတဲ့နေရာတွေ ရှိတယ်။ လမ်းကလည်းကွာ ဟိုနေရာပျက်၊ ဒီနေရာပျက်နဲ့လို့ ကျွန်တော့်ပါးစပ်ထဲက ထွက်သွားတယ်။ ဟား ဦးလေးကလည်း ဟိုနေရာ ဒီနေရာတွေမှာ ကောင်းပါတယ်လို့ သူက ကားမောင်းရင်း ပြန်ပြောတယ်။ ဒီတော့ မင်းပြောတာနဲ့ငါပြောတာ ဘာကွာသလဲလို့ မေးကြည့်လိုက်မိတယ်။ သူက ချက်ချင်းမဖြေသေးဘူး၊ ပြီးမှ ကျွန်တော်က အကောင်းမြင်ဖက်က ကြည့်ပြောတာပါလို့ ပြောတယ်။ ဟုတ်တော့ ဟုတ်တယ်။ အမြင်ဆိုတာက အကောင်းမြင်၊ အဆိုးမြင်ရယ်လို့ ရှိနေတာကိုး။ မချစ်မခင်ချင်ရင် အပြစ်တင်ချင်တယ်လို့တောင် ပြောကြတာ ရှိတယ်မဟုတ်လား။ အကောင်းမမြင်တတ်လို့ ဆောင်းကိုတောင် နွေလိုမခင်ဘူးလို့ ပြောကြတယ် မဟုတ်လား။ ကိုယ်နဲ့သဘောမတွေ့ရင် အပြစ်တင်စရာတွေပဲလို့ မြင်တတ်ကြတယ် မဟုတ်လား။ ကားမောင်းနေရင်းက လမ်းက အားလုံးကောင်းနေပြန်ရင် လမ်းကောင်းကြောင်း လူတွေက သိပ်မသိကြဘူး။ သိပ်သတိမထားမိကြဘူး။ ခုလို ပျက်တာ၊ မကောင်းတာကလေး ရှိနေမှ ကောင်းတဲ့အပိုင်းကလေးကို တန်ဖိုးထားကြတာလို့ သူက ထပ်ပြောတယ်။ ဒါလည်း ဟုတ်တာပဲ။ ဒီအကြောင်းကို ကျွန်တော်တစ်ခါမျှ တွေးမကြည့်မိဖူးဘူး။ လမ်းက စင်းလုံးချော ကောင်းမနေတာကိုက သဘာဝကျတယ် ဦးလေးရဲ့လို့ မောင်ညွန့်ဝင်းက ထပ်ပြောပြန်တယ်။ ဘယ်လိုလုပ် သဘာဝကျရမှာလဲဆိုတာ ကျွန်တော် စဉ်းစားကြည့်လို့ မရဘူး။ ကျွန်တော့်ခေါင်းက သူ့လောက် မကောင်းပုံရတယ်ဆိုတာ သူတွေးလိုက်မိပုံပေါ်တယ်။ ကျွန်တော်က မမေးရသေးခင် သူက ပြောတယ်။ စဉ်းစားကြည့်လေ ဦးလေးရဲ့။ အကောင်းရယ်၊ အဆိုးရယ်ဆိုတာ ဒွန်တွဲနေရတယ် မဟုတ်လား။ လမ်းက ကောင်းလိုက်ပျက်လိုက်၊ ကောင်းလိုက်ပျက်လိုက်။ အဲဒီလို နေတာကိုက သဘာဝကျတာပဲ။ တချို့ ဘာသာရေးဖက်ကလူတွေ ပြောပြောနေတာ ကြားဖူးတယ်။ အကောင်းချည်းပဲ မဟုတ်ဘူး။ အပျက်လည်း ရှိရမယ်တဲ့။ မောင်ညွန့်ဝင်းပြောတာတွေက တဖြည်းဖြည်း ကျွန်တော်နဲ့ ဝေးဝေးသွားတယ်။
လမ်းအကြောင်းမပြောဘဲ ဘောလုံးပွဲအကြောင်းပြန်ပြောရင် ကောင်းမလားလို့ ကျွန်တော် အတွေးရလိုက်မိတယ်။ ရဆို မောင်ညွန့်ဝင်းပြောနေတာတွေကို ကျွန်တော် မသိဘူး။ တကယ်တော့ ဘောလုံးပွဲအကြောင်း မသိလို့ လမ်းအကြောင်းပြောမိပါတယ်၊ သူပြောနေတဲ့လမ်းအကြောင်းက ကျွန်တော် ဉာဏ်မမီလောက်တဲ့အနေအထားမျိုး ရောက်လာတယ်။ ဘယ်ဟာပြောပြော ကျွန်တော် မသိတာချည်းပဲ။ ကျွန်တော်လည်း စကားပြောတာ ခဏရပ်ပြီး ကားရဲ့ အပြင်ဖက်ဆီက မြင်ကွင်းတွေကို ကြည့်နေမိတယ်။ အဲဒီတုန်းမှာပဲ ကျွန်တော့်မိတ်ဆွေရဲ့ဇနီးက တို့အရင်အခေါက်က ၀က်အူချောင်းဝယ်တာ ဒီနားမှာလားလို့ မောင်ညွန့်ဝင်းကို မေးသံ ကြားလိုက်ရတယ်။ ကျွန်တော်လည်း သူတို့ကို လှည့်ကြည့်လိုက်မိတယ်။ ဒီနား မဟုတ်သေးဘူး။ ဟိုး ရှေ့နားကျမှလို့ မောင်ညွန့်ဝင်းက ပြန်ဖြေတော့ ကျွန်တော်လည်း မနေနိုင်တော့ဘူး။ ဒီက ၀က်အူချောင်းကောင်းသလားလို့ မေးကြည့်မိတယ်။ ငယ်ငယ်က ချင်းတွင်းမြစ်ကမ်းပါးမှာ မန္တလေး မော့(လ)၀ီစကီပုလင်းကို အေးအောင် မြစ်ရေထဲအသာစိမ်ပြီး မုံရွာဝက်အူတောင့်နဲ့ မြည်းခဲ့ရတာတွေ မျက်စိထဲမှာ မြင်လာမိတယ်။ ၀က်အူချောင်းဟာ ကျွန်တော်ကြိုက်တဲ့ အစာတစ်ခု။ ဘယ်အရပ်က ၀က်အူချောင်းကိုဖြစ်ဖြစ် ကျွန်တော် စားနိုင်တယ်။ ကျွန်မတော့ သေသေချာချာ မသိဘူး။ ဖေဖေတော့ကြိုက်တယ်လို့ မိတ်ဆွေရဲ့ဇနီးက ပြန်ဖြေတယ်။ ဒါဆို ကောင်းကိုကောင်းရမယ်လို့ ကျွန်တော် တွက်ကြည့်မိတယ်။ အစားအသောက် ကောင်း, မကောင်းဆိုတာ လူကြီးက လူငယ်ထက်ပိုပြီး သေချာတယ်။ ကျွန်တော်တို့ ဘကြီးသုခရှိစဉ်က ပြောခဲ့ဖူးတာကို သတိရမိတယ်။ အသက်ကြီးလာလို့ သွားတစ်ချောင်းကျိုးလာတိုင်း လျှာက အစာရဲ့အရသာကို ပိုသိလာတယ်တဲ့။ အဲဒီတုန်းက အဖေနဲ့ဘကြီးတို့ ထိုးမုန့်အကြောင်း ငြင်းကြသေးတယ်။ နောက်ဆုံးတော့ ဘကြီးက ပြောတယ်။ မင်းတို့ရန်ကုန်မှာ ထိုးမုန့်ထဲ ရွှေဒင်္ဂါးပြားပဲထည့်ထိုးဦး၊ လှကလေးစိန်ခြေဖျားတော့ မမီနိုင်သေးဘူးတဲ့။ ဘကြီးက ဒေသစွဲလည်း ရှိတယ်။ လျှာရဲ့အရသာဟာ ဒေသစွဲနဲ့လည်း ဆိုင်ပုံရတယ်။ ကုလားက မဆလာကြိုက်တာ၊ တရုတ်က ပဲကြာညို့ကြိုက်တာဟာ ဒေသစွဲအခြေခံ သိမှတ်လက်ခံထားတဲ့ လျှာရဲ့ အခြေခံအရသာပဲ မဟုတ်ဘူးလား။ ကျွန်တော်ကတော့ ဒေသစွဲမရှိဘူး။ အဲဒီနားဆီမှာ ၀က်အူချောင်းသည်တွေ တွေ့ရင်ဖြင့် တစ်နင့်တစ်ပိုးဝယ်ပြီး ၀ီစကီနဲ့မြည်းဦးမယ်လို့တွေးပြီး ကြိုတင်အတွေးနဲ့ အရသာခံစားကြည့်မိတယ်။ ပျော်ရွှင်စရာကို စီမံကိန်းချကြည့်မိတယ်။ ဒါပေတဲ့ အဲဒီနေ့က အဲဒီနားဆီမှာ ၀က်အူချောင်းသည်တွေ မတွေ့ရဘူး။ ပျော်ရွှင်စရာစီမံကိန်းဟာ လက်တွေ့ဖြစ်မလာခဲ့ဘူး။
ဒီနေ့မှ ဘာဖြစ်လို့ ၀က်အူချောင်းသည်တွေ လမ်းပေါ်မှာမရှိတာလဲလို့ စိတ်ပျက်ပျက်နဲ့ မောင်ညွန့်ဝင်းကို မေးကြည့်လိုက်မိတယ်။ သူက မပြောတတ်ဘူးလို့ပဲပြောပြီး ကားစီဒီဖွင့်စက်ထဲက စီဒီတစ်ချပ်ကို ထုတ်မလို့ ကြိုးစားနေတယ်။ ကျွန်တော်လည်း ထပ်မမေးတော့ဘူး။ အတော်ကလေးကြာမှ ၀က်အူချောင်းသည်တွေက ဒီအနားက ရွာတစ်ရွာကလာတာ ဖြစ်လိမ့်မယ်။ ဒီတော့ ဒီလမ်းပေါ်မှာ အမြဲရှိကြမှာမဟုတ်ဘူး။ လမ်းကသာ အမြဲရှိနေတာ။ လမ်းပေါ်မှာ လူတွေရှိပေတဲ့ ပုံမှန် တစ်သတ်မတ်တည်း အမြဲမရှိဘူး။ သွားတဲ့လူသွား၊ လာတဲ့လူလာ။ ဈေးလာရောင်းတဲ့လူ၊ ခရီးထွက်လာတဲ့လူ လမ်းပျောက်တဲ့လူလည်းပျောက်ပေါ့ ဦးလေးရာ ဟဲဟဲလို့ ပြောတယ်။ ဟဲဟဲဆိုတဲ့အပိုင်းတော့ ကျွန်တော် သိပ်နားမလည်ဘူး။ ကျန်တဲ့အပိုင်းတော့ ကျွန်တော်သိသင့်တယ်လို့ ထင်တယ်။ သိဖို့ဆိုတာက မြင်ဖို့လိုသေးတာကိုး။ အပကပဲလာလာ၊ အတွင်းကပဲလာလာ၊ အမြင်ဆိုတာကတော့ ရှိရမယ်။ မြင်တာဟာ သိဖို့ရဲ့အစပဲမဟုတ်လား။ မောင်ညွန့်ဝင်းပြောသလို သိဖို့ သူမြင်သလို မြင်ရမှာပဲ။ ကျွန်တော်သာ သူမြင်သလိုမြင်ခဲ့ရင် ခုနက မေးမိတဲ့ ဒီနေ့မှဘာဖြစ်လို့ ၀က်အူချောင်းသည်တွေ လမ်းပေါ်မှာ မရှိကြတာလဲလို့ မေးမှာ မဟုတ်ဘူး။ သူပြောတာ အမှန်ပဲ။ လမ်းဆိုတာ အိမ်မဟုတ်ဘူး၊ ရပ်ကွက်မဟုတ်ဘူး။ မြို့မဟုတ်ဘူး။ ရပ်တည်မနေဘူး၊ ရပ်တန့်မနေဘူး။ အမြဲလို လှုပ်ရှားနေတယ်။ အသက်ဝင်နေတယ်။ ဒီလိုဖြင့် ဘောလုံးကစားတာနဲ့ တူတူပဲလားလို့ မဆီမဆိုင် တွေးကြည့်လိုက်မိတယ်။ ဘောလုံးပွဲလည်း ကစားနေတဲ့အခါ လှုပ်ရှားနေကြတာပဲ မဟုတ်လား။ လှုပ်ရှားနေပေတဲ့ ဘောလုံးပွဲဆိုတာက ရပ်တန့်နေမှုတစ်ခုအထဲက လှုပ်ရှားမှုပဲ။ လမ်းပေါ်မှာ ဒိုင်လူကြီးမရှိဘူး။ လူတိုင်းလူတိုင်းဟာ ကစားသမား။ လူတိုင်းဟာ ဒိုင်လူကြီးပဲ။ သူလုပ်နိုင်တာ၊ သူလုပ်ချင်တာကို သူသိမှတ်လက်ခံထားတဲ့ အတိုင်းအတာအတွင်းက လုပ်နေကြတာ။ အချိန်စေ့မစေ့၊ ပွဲသိမ်းဖို့ မသိမ်းဖို့ဟာ သူ့အဆုံးအဖြတ်မှာပဲ တည်တယ်။ နာရီကြောင့်၊ အချိန်ကြောင့်၊ ဒိုင်လူကြီးကြောင့် ပွဲသိမ်းတာ မဟုတ်ဘူး။ တကယ်တော့ ဘောလုံးပွဲဟာ လမ်းပေါ်မှာရှိနေတဲ့ အသက်ဝင်ရှင်သန်မှုမျိုးနဲ့ ရှင်သန်နေတာ မဟုတ်ဘူး။ သူတို့ အတိုင်းအတာအထဲမှာပဲ ရှင်သန်နေကြတာ။ လမ်းပေါ်က အမြဲတမ်းရှင်သန်လှုပ်ရှားနေမှုဟာ လူတွေ တစ်ယောက်မှ ရှိမနေလည်း ရှိနေမယ့် ရှင်သန်လှုပ်ရှားနေမှုမျိုး။ ဘောလုံးပွဲကတော့ အတိုင်းအတာတစ်ခုခုအထဲက လှုပ်ရှားမှု သက်သက်ပဲ။ ယေဘုယျကျတဲ့ သိမှုတစ်ခု အခြေခံနဲ့ လှုပ်ရှားနေတာပဲ။ အဲဒါကတော့ နိုင်ဖို့ပဲ။ လမ်းပေါ်က လူတွေရဲ့ လှုပ်ရှားမှုမှာ ယေဘုယျကျတဲ့သိမှု တစ်ခုတည်းမဟုတ်ဘူး။ အချိန်ကန့်သတ်မှုမရှိဘူး။ ဒေသအားဖြင့် ကန့်သန်မှုမရှိဘူး။ လမ်းဟာ လမ်းပဲ။
အပြင်ဖက်ကိုကြည့်ရင်း ကျွန်တော်တွေးနေတုန်း လမ်းကအတော်ကလေးကြမ်းလာပြန်ပြီး ဦးလေးလို့ မောင်ညွန့်ဝင်းက ပြောတာနဲ့ သူ့ကို လှည့်ကြည့်လိုက်မိတယ်။ သူက ဆက်ပြောတယ်။ ဒီတစ်ကွေ့ပဲ၊ ပြီးရင် ပင်လယ်ကမ်းစပ်ကို ရောက်တော့မှာတဲ့။ ကျွန်တော်လည်း ဘာမျှပြန်မဖြေဘဲ အသာခေါင်းညိတ်ပြလိုက်တယ်။ လမ်းက အတော့်ကိုဆိုးတယ်။ အတော့်ကိုဆိုးတဲ့လမ်းကို တွေးကြည့်နေရင် လမ်းဆိုးခြင်းနဲ့အတူ ဝေဒနာတိုးရုံပဲ။ ကျွန်တော်လည်း မရောက်ဖူးသေးတဲ့နေရာ၊ မတွေ့ဖူးတဲ့ ပင်လယ်ကမ်းစပ်ကိုတွေးပြီး သာယာကြည့်လိုက်မိတယ်။ ပင်လယ်ကမ်းစပ်ဆိုတာက ထွက်ပြေးနိုင်တာမဟုတ်ဘူး။ ၀က်အူချောင်းသည်တွေလို ရောင်းချင်တဲ့နေ့ရောင်း၊ မရောင်းချင်တဲ့နေ့ မရောင်းဘဲနေလို့ မရဘူး။ ရှိနေခြင်းတစ်ခု သက်သက်ပဲ။ ပင်လယ်ဟာ မရွှေ့ပြောင်းနိုင်ဘူး။ ပင်လယ်ဟာ ပင်လယ်ပဲ။ ပင်လယ်ဟာ ကမ်းစပ်ရဲ့ အချုပ်အနှောင် အထိမ်းအကွပ်အထဲမှာ ရှင်သန်နေရရှာတာ။ ကမ်းမရှိရင် ပင်လယ်မရှိဘူး။ လှိုင်းဆိုတာက ပင်လယ်ရဲ့ ကြွားလုံးပဲ။ ကြွားစရာမရှိတဲ့အခါ ဒုံရင်းပဲ။ ပင်လယ်ရှိရာကို ကျွန်တော်ရောက်တော့မယ်ဆိုတာ မရောက်ရှိသေးတဲ့ ကာလတရားတစ်ခုအတွင်းကို ရေရာမှုတစ်ခုနဲ့ မှန်းဆကြည့်နိုင်တယ်။ ကြည့်လည်းကြည့်လိုက်မိလို့ သာယာလာမိတယ်။ ပင်လယ်ကမ်းစပ်ကိုရောက်ရင် ကျွန်တော့်မှာရှိတဲ့ အကြီးမားဆုံးရည်ရွယ်ချက်က ပင်လယ်ကို ထိုင်ကြည့်ဖို့ပဲ။ ပျော်ရွှင်ကြည်နူး သာယာမှုဆိုတာက တင်ကူးဆုံးဖြတ်ထားတာချည်းပဲ။ ဒါကြောင့်မို့ပဲ ကျွန်တော့်သူငယ်ချင်းကို ပင်လယ်ကမ်းစပ်ဆီကို လိုက်ပို့ခိုင်းတာ။ ပင်လယ်ကမ်းစပ်ကိုရောက်ခဲ့ရင်၊ ပင်လယ်ကိုတွေ့ခဲ့ရင် တကယ့်ကို ပျော်နိုင်မှာ။ မရောက်ခဲ့လို့ မတွေ့ရရင်တောင် ရောက်ရင်ပျော်မယ်ဆိုတဲ့အသိက ရှိနှင့်နေခဲ့တာမို့ ပျော်ရွှင်ကြည်နူးသာယာခွင့်ကို မတားနိုင်တော့ဘူး။ တကယ်တော့ ကျွန်တော့်အဖို့ ပျော်ရွှင်ကြည်နူးမှုဆိုတာ ရောက်ပြီးသားခရီးတစ်ခုကို ပြန်သွားကြည့်တာပဲ။ ချိုင့်ထဲကို ကားဘီးကျသွားတိုင်း ကားလှုပ်သွားတယ်။ လမ်းကြမ်းပေါ်မှာ သွားလာရလေလေ ပင်လယ်ကိုတောင့်တမိခဲ့တဲ့ ပျော်ရွှင်ကျေနပ်မှုဟာ ကြီးမားလာလေလေပဲ။ ကားရဲ့ စီဒီဖွင့်စက်ထဲက သီချင်းသံတောင် ကားခုန်လွန်းလို့ ရပ်သွားတယ်။ လမ်းက အဆိုးချည်းပဲ။ မောင်ညွန့်ဝင်းဆီက တောက်ခေါက်သံတစ်ချက် ထွက်လာတယ်။ ကျွန်တော်က သူ့ကို မသိမသာလှမ်းကြည့်လိုက်ပေတဲ့ သူက လမ်းကို အာရုံစိုက်နေရလို့ ကျွန်တော့်ကို ဘာမျှလှည့်မပြောနိုင်ဘူး။ သူ့မှာက ပင်လယ်ကမ်းစပ်ရောက်တဲ့အထိ မောင်းဖို့ တာဝန်ရှိနေတယ်။ အဲဒီကိုရောက်ဖို့က သူ့အလုပ်၊ ကျွန်တော့်အဖို့တော့ သွားနေတာဟာ ကျွန်တော့်အလုပ်ပဲ။
ပင်လယ်ပြင်ကြီးကိုတွေ့လိုက်ရတော့ လမ်းကောင်းတာလမ်းဆိုးတာတွေကို မေ့သွားတယ်။ ကျွန်တော်တို့ ပင်လယ်ကမ်းစပ်ဆီကိုရောက်တော့ ပင်လယ်မှာ လှိုင်းမရှိဘူးလို့ ပြောကြတဲ့အချိန်မျိုး။ ပင်လယ်ဟာ ကြွားစရာမရှိလို့ မျက်နှာသေကလေးနဲ့ နေနေရပုံပဲ။ လှိုင်းရှိတယ်လို့ပြောမယ်ဆိုရင်တော့ လှိုင်းကြက်ခွပ်ဆိုတာမျိုးလောက်ပဲ။ ရေစပ်စပ်ဆီ ဆင်းလျှောက်ရင်း မျက်စေ့တစ်ဆုံးကို ကြည့်မိတယ်။ ဟိုးအတော်ဝေးဝေးဆီမှာ ကျွန်းကလေးတစ်ခု။ ကျွန်းပေါ်မှာ ထုံးစေတီကလေးတစ်ဆူ၊ မကြာခင် ကားမောင်းတဲ့ မောင်ညွန့်ဝင်းနဲ့မောင်ထူး ပင်လယ်ရှိရာဆီ ဆင်းလာကြတယ်။ ကျွန်တော့်အနားဆီရောက်လာတော့ ၀ီစကီသောက်ကြကွာဆိုပြီး ပုလင်းကို ကမ်းလိုက်တယ်။ သူတို့လည်း ပင်ပန်းကြတာပဲ မဟုတ်လား။ သူတို့လည်း ကျွန်တော်နဲ့အတူ သောင်ခုံပေါ်မှာထိုင်ပြီး ၀ီစကီသောက်ကြရင်း ဦးတည်ရာမဲ့ ကြည့်နေကြတယ်။ အတော်ကြာတော့ မင်းတို့ ဟိုးမှာမြင်နေရတဲ့ ကျွန်းကလေးဆီ ရောက်ဖူးသလားလို့မေးတော့ မရောက်ဖူးဘူးဆိုတာ ပြိုင်တူလိုဖြေကြတယ်။ ဒါဖြင့် အဲဒီဆီကိုသွားချင်ရင် ဘယ်လိုလုပ်သွားမလဲလို့ ကျွန်တော်က ထပ်ပြီး မေးလိုက်မိတယ်။ မော်တော်ကလေးငှားသွားရင် ရမယ်ထင်တယ်ဦးလေးလို့ မောင်ထူးက ဖြေတယ်။ ပင်လယ်ဆိုတော့ကွာ ကုန်ပေါ်မှာလို မဟုတ်ဘူး။ လမ်းရာမရှိဘူး။ ဒီတော့ အဲဒီကျွန်းကလေးပေါ်ရောက်အောင် ဘယ်လိုသွားမလဲလို့ ကျွန်တော်က ထပ်မေးလိုက်မိတယ်။ ခဏကြာအောင် စဉ်းစားနေကြပြီး မောင်ညွန့်ဝင်းက အဲဒီဆီ ဦးတည်သွားရမှာပဲလို့ ဖြေတယ်။ ရေပေါ်မှာမို့ လှိုင်းကြောင့်၊ လှေကြောင့် မော်တော်က ဦးတည်ရာ ရွေ့နိုင်တယ်ကွာ၊ ဘယ်လိုလုပ်မလဲလို့ ကျွန်တော်က ထပ်ကွန့်လိုက်မိတယ်။ ၀ီစကီကို ရေနဲ့ရောရင်း မောင်ထူးက ရွေ့သွားရင်ပြန်တည့်ရမှာပဲ ဦးလေး။ ဒီပြင် တခြားနည်းမှ မရှိဘဲလို့ ဖြေတယ်။ ကျွန်တော်လည်း ထပ်မမေးတော့ဘူး။ ကျွန်တော့်လက်ထဲက ၀ီစကီကို အသာသောက်နေလိုက်မိတယ်။ သူတို့လည်း သူတို့ဘာသာ စိတ်ကူးကြည့်နေမိကြပုံရတယ်။ အဲဒီတုန်းမှာပဲ မောင်ထူးက သွားဖို့၊ ရောက်ဖို့ဆိုရင်တော့ ရောက်အောင်သွားရမှာပဲလို့ ပြောတယ်။ ကျွန်တော်ကတော့ ရုတ်တရက် ဘောလုံးကစားတဲ့လူတွေကို သတိရလိုက်မိပြန်တယ်။ ဘောလုံးကွင်းထဲမှာ ကစားနေတဲ့လူတွေနဲ့ လမ်းပေါ်မှာ သွားနေလာနေတဲ့လူတွေဟာ မတူကြပါလားလို့ သဘောပေါက်သွားမိတယ်။ ဘောလုံးကစားနေတဲ့လူတွေဟာ ခရီးတစ်ခုကို ရောက်သွားပြီးတဲ့ လူတွေပဲ။ သွားနေတဲ့လူတွေ မဟုတ်ဘူး။ ခရီးသွားနေတဲ့လူတွေ သွားနေသလို အနှောင်အတဲမရှိတဲ့ လွတ်လပ်မှုနဲ့ လှုပ်ရှားနေကြတာ မဟုတ်ဘူး။ သူတို့မှာ ကန့်သတ်မှုတွေ အများကြီးရှိတယ်။ သူ့ဥပဒေသနဲ့သူ။ ဘောလုံးကွင်းထဲက ပြန်ထွက်လာတဲ့အခါ သူတို့မှာ ရလဒ်တစ်ခု အဖြေတစ်ခု ပါလာကြမယ်။ သူတို့ ကြိုက်ကြိုက်၊ မကြိုက်ကြိုက်။ သူတို့ သဘောတူတူ၊ မတူတူ။ လမ်းပေါ်ကလူတွေကတော့ သူတို့သွားချင်တဲ့ဆီ အရင်ရောက်ဖို့လိုတယ်။ ဒါဟာ အဓိကပဲ။ ရောက်ပြီးကာမှ အဖြေရှာရမှာ။ တကယ်တော့ လူတိုင်းဟာ လမ်းပေါ်ကလူချည်းပဲ။
မောင်ညွန့်ဝင်းက ဖန်ခွက်ကိုချလိုက်ပြီး ရေကူးရအောင် ပင်လယ်ထဲ ဆင်းသွားတယ်။ ကျွန်တော်နဲ့မောင်ထူး နှစ်ယောက်သား ၀ီစကီသောက်ရင်း ပင်လယ်ဆီ ငေးနေမိကြတယ်။ ပြန်ဖို့အကြောင်း ခေါင်းထဲဝင်လာတာနဲ့ ပြန်ရင် တို့ဘယ်ကပြန်ကြမလဲလို့ မောင်ထူးကိုလှမ်းကြည့်ရင်း မေးလိုက်မိတယ်။ ဒီလမ်းပဲ ဦးလေးလို့ မောင်ထူးကဖြေပြီး ကျွန်တော်နားလည်တာမမှားအောင် လာလမ်းအတိုင်းပဲ ဦးလေးလို့ ထပ်ပြောတယ်။ ကျွန်တော်က အတွေးပေါက်အောင် ခဏစဉ်းစားကြည့်ပြီး မင်းပြောချင်တာက လာလမ်းအတိုင်း ပြန်ကြမယ်လို့ ပြောချင်တာလားလို့ မေးလိုက်မိတယ်။ သူက ချက်ချင်းပြန်မဖြေဘူး။ ငါ့ဆရာရဲ့ မိတ်ဆွေဆိုတဲ့လူဟာ အူကြောင်ကြောင်ပါလားလို့ တွေးနေပုံရတယ်။ ပြီးမှ ဟုတ်တယ် ဦးလေး၊ ဒီလမ်းပဲ။ လာတုန်းကတော့ အလာလမ်းပေါ့။ ပြန်တော့ အပြန်လမ်းဖြစ်သွားတာပေါ့လို့ ဖြေတယ်။ ကျွန်တော့်ခေါင်းထဲကို ဘယ်လိုမှနားမလည်နိုင်တာတစ်ခု အရှိန်အဟုန်ကောင်းကောင်းနဲ့ ရောက်လာတယ်။ ကျွန်တော့်အမြင်ထဲမှာ ဘယ်လိုမှ မြင်ကြည့်လို့မရတာ ပေါ်လာတယ်။ အလာတုန်းက ကားရဲ့ရှေ့မှာ မြင်ခဲ့ရတဲ့လမ်းကို ကျောပေးပြီးပြန်ရမှာ။ အလာတုန်းက ကျောပေးလာခဲ့တဲ့လမ်းကို ပြန်ပြီး မျက်နှာချင်းဆိုင်ရမှာ။ ရှေ့မျက်နှာနောက်ထားရမယ့် အကျပ်အတည်းမျိုးပဲ ဖြစ်မယ်ထင်တယ်။ တစ်ခုတည်းသောလမ်းဟာ ဘာဖြစ်လို့ ဦးတည်ချက်နှစ်ခုနဲ့ ရပ်တည်နေတာလဲ။ အဲဒီလိုဖြစ်နိုင်သလားဆိုတာပဲ။ ကျွန်တော် လှည့်မကြည့်မိပေတဲ့ မောင်ထူးတစ်ယောက် ကျွန်တော့်ကိုကြည့်နေတယ်ဆိုတာ ကျွန်တော်သိနေမိတယ်။ ခဏကြာတော့ မောင်ထူးဆီက အသံကြားရတယ်။ လမ်းကတော့ လမ်းပဲကိုး ဦးလေးရဲ့။ လူတွေကသာ သွားလာနေကြတာကိုး။ ဦးတည်တာ ရည်ရွယ်တာ မတူကြတာ။ လူတွေကသာ သူတို့အဓိပ္ပာယ်နဲ့သူတို့ လုပ်နေကြတာ။ လမ်းနေရာမှာ လမ်းရာတောင်မရှိလည်း သွားတဲ့လူကတော့ ရှိနေမှာပဲ။ လူကသာ သွားနေတာကိုး။ လမ်းဆိုတာက ဘယ်မှသွားတာမှ မဟုတ်ဘဲလို့ ပြောတယ်။ ကျွန်တော်လည်း မောင်ထူးပြောတာကို နားထောင်နေရင်း ဟိုခပ်လှမ်းလှမ်းက ကျွန်းကလေးပေါ်က ထုံးစေတီလေးကိုပဲ လှမ်းကြည့်နေမိတယ်။ တကယ်မရှိတဲ့မော်တော်ကလေးကို စိတ်ကူးနဲ့မောင်းပြီး အဲဒီဆီ ဦးတည်သွားလိုက်မိတယ်။ ပင်လယ်ထဲမှာ လမ်းရာမရှိဘူး။ လွင့်မျောလို့ရတယ်။ စိတ်ကူးထဲမှာဆို ပိုတောင်ကောင်းသေးတယ်။ လမ်းရာလည်းမရှိဘူး ဦးတည်ချက်လည်း မရှိဘူး။ ခုဆို ကျွန်တော့်မှာ လမ်းရာ မလိုတော့ဘူး။ လမ်းကောင်းတာ မကောင်းတာ အရေးမကြီးတော့ဘူး။ လမ်းဆုံးကို မြင်တာမမြင်တာ အရေးမကြီးဘူး။ သွားနိုင်ဖို့ပဲ လိုတယ်။ စိတ်ကူးယဉ်တာမဟုတ်ဘူးဆိုရင်တော့ ဘယ်ကိုသွားချင်တယ်ဆိုတာကလေးပဲ သိဖို့လိုတယ်။
တကယ်တော့ မောင်ထူးပြောသလိုပဲ။ လမ်းကတော့ လမ်းပဲ။
-မြင့်သန်း
ချင်းတွင်း၊ ဇူလိုင်၊ ၂၀၀၇
မရောက်တာ ကြာလို့
ReplyDeleteအရောက်လာတာ
ဆရာမြင့်သန်းနဲ့ တည့်တည့်တိုးတော့တာပဲ..။
နေကောင်းကျန်းမာမယ်လို့ ယုံကြည်ပါတယ် ကိုတေဇာ..။