မျှော်လင့်ခြင်း ( မြင့်သန်း )

(ဆရာတာ.. ဒီဝတ္ထုလေးက လွန်ခဲ့တဲ့ သုံးလလောက်က ရေးထားတာ။ ဘာသာပြန် မဟုတ်ပါ။ ဖတ်တဲ့အခါတော့ ရိုးရိုးပဲ တွေးဖို့လိုလိမ့်မယ်။ ဆန်းဆန်းတွေးချင်လည်း တွေးပေါ့ဗျာ။  ရိုသေစွာဖြင့်- မြင့်သန်း)

Before me things create were none, save things
Eternal, and eternal I endure.
All hope abandon ye who enter here.
    _Dante Alighieri
    Divine Comedy. (H.F Cary’s translation)

လူတစ်ယောက်မျှ မရှိတဲ့ စားသောက်ခန်းထဲက စားပွဲပေါ်မှာရှိတဲ့ ပန်းအိုးထဲက ပန်းကို ဘားမန်နေဂျာကဲင်ဟာ အနေအထားပြင်ပြီး ပြန်ချလိုက်တယ်။ စိတ်ကျေနပ်သွားတယ်။ ခဏရပ်နေလိုက်ပြီးမှ သူ ဘားရှိရာဘက် လှည့်လာတယ်။ ကော်ရစ်ဒါရဲ့ အခြားဘက်က ထိပ်နားဆီမှာ လူရိပ်တွေ့လိုက်ရလို့ ရပ်ကြည့်ုလိုက်တော့ ဖလောမန်နေဂျာလို့ ခေါ်တဲ့ ဒီအထပ်ရဲ့ မန်နေဂျာ လဇ်ဇီရယ်။ အခန်းတစ်ခန်းရဲ့ ရှေ့မှာ လဇ်ဇီက ဟိုတယ်ရဲ့ ဟောက်(စ)မန်နေဂျာ ရှာမိန်းနဲ့ ရပ်စကားပြောနေတယ်.။ ရှာမိန်း တကယ် အလုပ်များပုံရတယ်။ ကဲင်ကိုယ်တိုင်လည်း အီးမေးလ်ရထားပြီးပြီမို့ ရှာမိန်းအလုပ်များလိမ့်မယ်ဆိုတာ တွေးကြည့်လိုက်မိတာပဲ။ ဟိုတယ်ရဲ့ ဒီအထပ်က သီးသန့်အထပ်။ နှစ်ဆယ့် သုံးထပ်မှာ.။ နှစ်ဆယ့်လေးထပ်ကလည်း ဒီလိုပဲ။ မတူတာတစ်ခုက ဒီအထပ်အခန်းတွေက အမြဲလိုငှားထားတာ။ ဒါပေတဲ့ နေတဲ့လူက အမြဲမရှိဘူး။ အထူးသဖြင့် ကော်ရစ်ဒါ အဆုံးနားဆီက အခန်းဆယ့်ငါးခန်းလောက်ဟာ ဒီအထပ်အတွက် အရေးကြီးတဲ့ အခန်းတွေလို့ ပြောရမှာပဲ။ ဘာဖြစ်လို့ အရေးကြီးရတာဆိုတာတော့ သူလည်း မပြောတတ်ဘူး။ ဘားကောင်တာရှိရာဆီ ပြန်လာလိုက်တယ်။ မတ်တပ်ရပ်ရင်း အဝတ်စတစ်ခုနဲ့ ဖန်ခွက်တွေမှာ အစွန်းအထင်းမကျန်အောင် ပွတ်သပ်ပြီး သန့်စင်နေတဲ့ ဘားမင်း ကားလို့(စ) နောက်နားဆီမှာ ခုံတစ်လုံးဆွဲ ထိုင်လိုက်တယ်။ ဘာရယ်တော့ မဟုတ်ဘူး။ ကားလို့(စ)က အိုကေရဲ့လား ဘော့(စ) လို့ သူ့ကိုလှည့်မကြည့်ဘဲ မေးတယ်။ သူကလည်း ဘာကိုဆိုလိုလိုက်မှန်း သေချာမသိပေတဲ့ အိုကေလို့ပဲ ဖြေရင်း ကားလို့(စ)ကို ကျော်ပြီး မှန်ပြတင်းပေါက်တွေကို ဖြတ်သန်းပြီး ဟိုအဝေးကြီးကို လှမ်းကြည့်နေမိတော့တယ်။

လဇ်ဇီ ရောက်လာတယ်။ ထုံးစံအတိုင်း ဘယ်ဘက်လက်ထဲမှာ ဖိုင်တွဲတစ်တွဲ ပိုက်ထားပြီး ညာဘက်လက်ထဲမှာ ဘောပင်ကိုင်ထားတယ်။ ဘားကောင်တာရှေ့က ခွေးခြေမြင့်မြင့်တစ်ခုမှာ ဝင်တင်လိုက်ရင်း ၊ သူ့လက်ထဲက ဖိုင်တွဲကို ဘားကောင်တာမှာ တင်လိုက်ပြီး မော်နင်း ကဲင်နီ.။ မော်နင်း ကားလို့(စ) လို့ လှမ်းနှုတ်ဆက်တယ်။ ကဲင်က မော်နင်းလဇ်ဇီ လို့ ပြန်နှုတ်ဆက်ပေတဲ့ ကားလို့(စ)ကတော့ သူ့ထုံးစံအတိုင်း ဖန်ခွက်ကိုင်ထားတဲ့ လက်ကိုမှောက်ပြီး ခေါင်းညွှတ်ပြလိုက်တယ်.။ နင်တို့ သိပြီးပြီ မဟုတ်လားလို့ လဇ်ဇီက မေးတော့ နှစ်ယောက်စလုံး ပါးစပ်က ပြန်မဖြေဘဲ ပြိုင်တူလို ခေါင်းညိတ်ပြလိုက်ကြတယ်။ နောက်ထပ်ဘာစကားမှ မပြောကြဘဲ ငြိမ်နေကြတယ်။ အတော်ကလေးကြာမှ ကဲင်က ဒါ(ခ)ဆု (Dark Suit) တွေ ဘယ်တော့ ရောက်မလဲလို့ မေးတယ်။ ကားလို့(စ)က ကဲင်ကို အူကြောင်ကြောင် မျက်နှာပေးနဲ့ လှမ်းကြည့်တယ်။. လဇ်ဇီတောင် ကြောင်သွားပုံရတယ်။ နင် ဘာဖြစ်လို့ ဒီမေးခွန်းကို အမြဲမေးတာလဲလို့ လှမ်းမေးလိုက်တယ်။ ကားလို့(စ)က ကြားဖြတ်ပြီး အလုပ်ဝင်တာ မကြာသေးလို့ပါလို့  ပြောပြီးရယ်တယ်။ တကယ်တော့ ကဲင်က သူတို့နှစ်ယောက်စလုံးထက် လုပ်သက်ရင့်တယ်။ မန်နေဂျာချုပ်နဲ့ တိုက်ရိုက်တွေ့နိုင်ခွင့်ရှိတဲ့သူ။  တိုက်ရိုက် ဖုန်းပြောနိုင်တဲ့ လူ။ ကားလို့(စ)က နောက်လိုက်တာ။ နင်လည်း ဒါ(ခ)ဆုတွေအကြောင်း သိသားနဲ့ လို့ လဇ်ဇီက ပြောရင်း မသိမသာခေါင်းခါလိုက်တယ်။

ဒါ့(ခ)ဆုဆိုတာ ဒီအထပ်မှာနေတဲ့ လူတစ်သိုက်ပဲ။ အဲဒီလူတွေကို ဒီအထပ်မှာ လုပ်တဲ့ ဟိုတယ် အမှုထမ်းတွေက သူတို့ဘာသာ နာမည်ပေးထားတာ။ ဒီလူတွေ ဘာလုပ်ကြမှန်းတော့ မသိဘူး။ လာတဲ့ အခါ ပြန်တဲ့အခါတော့ ဂျင်းနဲ့ ဘာနဲ့ ရိုးရိုးပဲ။ ဒီဟိုတယ်မှာ နေတဲ့ရက်တွေမှာ နေဗီ လို့ခေါ်တဲ့ နက်ပြာရောင်လိုအရောင်၊ အရောင်ရင့်ရင့်တွေ ဆု(suit) တွေ ဝတ်တတ်ကြတယ်။ အာ(ရ)မာနီလို အကောင်းစားတွေ။ သူတို့က ဟိုတယ်ရဲ့မြေအောက်ထပ် ကားရပ်တဲ့ နေရာကနေ ဒီအထပ်ဆီကို လာတဲ့ ဓာတ်လှေကားနဲ့ တက်လာတတ်တယ်။ ရှေ့က ဧည့်ကြိုကောင်တာမှာ ဘာမှလုပ်စရာ မလိုတဲ့လူတွေ။ အဲဒီ ဓာတ်လှေကားက  လည်း ဒီအထပ်ကိုပဲ တန်းလာတာ။. သူတို့ သုံးဖို့သက်သက် ဟိုတယ်လုံခြုံရေး ထုတ်ပေးတဲ့ ကဒ်တွေ သူတို့မှာ ရှိတယ်။ ဘယ်တော့လာလို့ ဘယ်တော့ပြန်မယ်ဆိုတာ မသိရဘူး။ ဘယ်နှစ်ယောက်လာမယ်ဆိုတာလည်း မသိကြဘူး။ တစ်ယောက်စ နှစ်ယောက်စ ရောက်လာပြီး ဘယ်က ဘယ်ကရောက်လာကြသလဲတော့ မသိဘူး။ မကြာခင် လေးငါးဆယ်ယောက် ဖြစ်သွားရော။ တစ်ခါတလေတော့ နှစ်ယောက်ပဲလာတယ်။ ဘယ်နှယောက်ပဲ လာလာ.။ဟိုတယ်အနေနဲ့ကတော့ သူတို့ကို ပြုစုရတဲ့ထုံးစံအတိုင်း ပြုစုရတာ.။ ကဲင်အလုပ်များတဲ့ အချိန်၊ ဦးနှောက်ခြောက်ရတဲ့ အချိန်ဟာ သူတို့တတွေ ရောက်လာစ အချိန်ပဲ။ သိပ်သတိထားရတယ်။ ဒါတောင် သူ့လက်အောက်မှာ လုပ်တဲ့လူတွေဟာ ဒီလူတွေအတွက် လက်ရွေးစင်တွေ။ ဟိုတယ်မန်နေဂျာရယ်၊ လုံခြုံရေးက မန်နေဂျာရယ်၊ သူတို့တိုင်ပင်ပြီး ကိုယ်တိုင်ရွေးထားတာ။ ဘယ်လိုပဲ ရွေးထား ရွေးထား။ တာဝန်ကတော့ သူ့တာဝန်ပဲကိုး။ သူက ဘားမန်နေဂျာဆိုပေမယ့် စားသောက်ခန်းတစ်ခုလုံးက သူ့လက်အောက်မှာ ။ အစားအစာတွေကို ဟိုတယ်ရဲ့ မီးဖိုခန်းထဲက ချက်ပြုတ်ပေးပြီး ဒီအပေါ်ကို ယူလာရတာ။ ဒီလူတွေက အပေါ်မှာ စားကြတာ။ အမှန်မှာတော့ ဒီစားသောက်ခန်းဟာ သူတို့အတွက် သက်သက်လိုပဲ။ မန်နေဂျာချုပ်ရဲ့ တစ်ချက်လွတ် နှုတ်မိန့်မှာ ဒီလူတွေ ဒီမှာနေသမျှအချိန်ဟာ မင်းက တာဝန်အရှိဆုံးလို့ ဆိုထားလေတော့ ကဲင်ဟာ တာဝန်အရှိဆုံးပဲပေါ့။

ကဲင်က အရင်က ဆယ့်ရှစ်ထပ် ဆယ့်ကိုးထပ်ဘားမှာ လက်ထောက်မန်နေဂျာ။ သူ့အလုပ်သူ လုပ်ပြီး ကျေနပ်နေတာ။ တစ်နေ့ နေ့ခင်းပိုင်းမှာတော့ မန်နေဂျာချုပ်က ခေါ်လို့ သွားတွေ့ရတယ်.။ မန်နေဂျာချုပ်အခန်းထဲမှာ။ မန်နေဂျာချုပ်ရယ်၊ ဒီဟိုတယ်ရဲ့ မန်နေဂျာရယ်။ လုံခြုံရေးက မန်နေဂျာရယ်။ မန်နေဂျာချုပ် အခန်းကို ဒီအရင်က တခါမှ မရောက်ဖူးဘူး။ ဘာဖြစ်လို့ သူ့ကိုခေါ်မှန်းတွေးကြည့်လို့ မရဘူး။ သူ့ကို အလုပ်ကထုတ်ပစ်ဖို့ဆိုရင်တောင် ဟိုတယ်မန်နေဂျာချုပ်ထိ သွားစရာ မလိုဘူး။ လူအင်အားဋ္ဌာနက မန်နေဂျာလောက်နဲ့ ပြီးတယ်။ သူက ပြုတ်စေဆိုတာနဲ့ ပြုတ်တာပဲ။ မန်နေဂျာချုပ်ဆိုတာ သူ့အဖို့တွေ့ဖူးရုံပဲ။ မန်နေဂျာချုပ်က အချိန်ရတာနဲ့ ဟိုတယ်တစ်လုံးကို လျှောက်ကြည့်လေ့ရှိတယ်။ အဲဒီလိုအခါမျိုးမှာ တွေ့လို့နှုတ်ဆက်ရတာလောက်ပဲ ရှိတယ်။ ငါ့ကို အလုပ်ဖြုတ်မှာထက် ဆိုးတဲ့ကိစ္စဖြစ်လိမ့်လို့ ကဲင်နီ စိတ်ထဲမှာ တွေးထားလိုက်တယ်။ အဆိုးဆုံးကို တွေးထားနိုင်ကာမှ အကောင်းနဲ့တိုးရင် ပျော်နိုင်မယ် ဆိုတဲ့ စကားအတိုင်းပဲ.။ မန်နေဂျာချုပ်က သူ့ကို လက်ဆွဲနှုတ်ဆက်ပြီး လာတွေ့တာ ကျေးဇူးပါပဲလို့ ပြောတော့ ကဲင်စိတ်ထဲမှာ မုန်တိုင်းရှေ့က လာတဲ့လေပြေလေညင်းလိုပဲ။ မကောင်းတဲ့ဘက်က တွေးလိုက်မိပြန်တယ်။ ရှေ့စားပွဲပေါ်ကို မသိမသာ မျက်စေ့ကစားကြည့်လိုက်တော့ ဟိုတယ်ရဲ့ လူအင်အားဋ္ဌာနက တံဆိပ်နဲ့ သူ့ကိုယ်ရေးရာဇဝင်မှတ်တမ်းတွေ့လိုက်ရတယ်။ ဖွင့်ထားတယ်။ ပြုံးပြီး သူ့ကို ကြည့်ရင်း မန်နေဂျာချုပ်က  မင်း၊ ဒီမှာ လုပ်ရတာ ပျော်ရဲ့လား။ကျေနပ်ရဲ့လား။ ဘာများမကျေနပ်တာရှိသလဲလို့ မေးတော့၊ သူက ဘာပြန်ဖြေရမှန်း မသိဘူး။ အူကြောင်ကြောင်နဲ့ပဲ ဘာမျှ စောဒကတက်စရာမရှိပါဘူးလို့ ရိုရိုသေသေနဲ့ ပြန်ဖြေလိုက်မိတယ်။

မန်နေဂျာချုပ်က ဆွေကြီးမျိုးကြီးထဲက လာတာလို့ သူက ကြားဖူးတယ်။ သူတို့က မျိုးနဲ့ရိုးနဲ့ ဟိုတယ်လုပ်ငန်းလုပ်ကြတာတဲ့။ ဟိုတယ်လုပ်ငန်းမှာ သိပ်တော်တော့ ဒီဟိုတယ်တွေကိုအောင်သထက်အောင်မြင်အောင် လုပ်ဖို့ ဟိုတယ်လုပ်ငန်းကြီးတစ်ခုလုံးကို ပိုင်ထားတဲ့ သူ့ဦးကြီးက သူ့ကို ခန်းထားတာတဲ့။ သူက ဒီဟိုတယ်မှ မဟုတ်ဘူး။ ကမ္ဘာကြီးရဲ့ တခြမ်းလောက်က ဟိုတယ်တွေကို အုပ်ချုပ်ရတာ။. ဒီနိုင်ငံက ဒီဟိုတယ်ကိုတော့ သူက အတော်ကြိုက်ပုံရတယ်။ ဒီမှာ အနေများတယ်။ ဒီကနေ အခြေချပြီး ဟိုတယ်တွေကို အုပ်ချုပ်တာလို့ပြောတာဆိုတာ ကြားရတာပဲ။ နေ့စဉ်ဟိုတယ်ကို လှည့်ပတ်ကြည့်နေရင်း သစ်ရွက်ကလေးတစ်ရွက် စက္ကူစလေးတစ်စ ကျနေတာများတွေ့လိုက်ရရင် သူကိုတိုင်ကောက်ပြီး အမှိုက်ပုံထဲပစ်တတ်လို့ ဟိုတယ် အမှုထမ်းတွေက သူ့ နောက်ကွယ်မှာ သူ့ကို ဂါဘိုလို့ နောက်ပြီးခေါ်ကြတယ်။ ဂါဘို Garbo ဆိုတာက အမှိုက်သိမ်းသမားကို ခေါ်တာ။ တို့ အိပ်ဇက်ကတဖ် ဖလော် Executive floor တစ်ခုကို ပြင်နေတယ်။ မင်းသိသလားလို့ မန်နေဂျာက မေးတယ်။ ကျုပ်က ဘယ်လိုလုပ် သိမှာတုန်းလို့ စိတ်ထဲက ပြန်ဖြေချင်ပေတဲ့ပါးစပ်ကတော့ မသိပါဘူး ခင်ဗျားလို့ပဲ ပြန်ဖြေလိုက်တယ်။ မန်နေဂျာချုပ်က သူ့ကိုယ်ရေးရာဇဝင်ကို အသာမျက်စေ့ကစားရင်း မင်းက အင်္ဂလိပ်ကိုး။ အော်…ဆွစ်ဇာလန်က ဟိုတယ်ကျောင်းထွက်ကိုးလို့ အခုမှ သတိထားလိုက်မိတဲ့ လေသံမျိုးနဲ့ ပြောတယ်။ ငါ့အကြောင်းတွေ အသေးစိတ်ဖတ်ပြီးသား။ ဘာဖြစ်လို့ ခုကာမှ ဟန်လုပ်နေရတာလဲလို့ ကဲင်က ပြောလိုက်ချင်တာ။ သူကိုယ်တိုင်ကလည်း ဟိုတယ်လုပ်ငန်းထဲရောက်တာ ဆယ့်ငါးနှစ်ကျော်ပြီ။ သိပ်တော့ မ အ လှဘူး။ တက္ကသိုလ်တုန်းက နိုင်ငံရေးတို့၊ ဥရောပယဉ်ကျေးမှုတို့ လေ့လာခဲ့တာပဲ။ ဟန်ကျတာပဲဟေ့လို့ မန်နေဂျာချုပ်က သူ့ဘာသာ ပြောသလိုလိုနဲ့ ပြောပြန်တယ်။ သူ့ဘေးနားဆီက မန်နေဂျာတွေကတော့ ဘာကိုမှ ဝင်မပြောဘဲ မန်နေဂျာချုပ်ပြောတိုင်း ပြုံးပြီး ခေါင်းညိမ့်နေတယ်။

မင်း လက်ထောက်ဘားမန်နေဂျာလုပ်လာတာ ငါးနှစ်ရှိပြီပဲ။ မန်နေဂျာဖြစ်ဖို့ အချိန်တန်နေပြီ။ ဒီတော့ ငါမင်းကို  ဘားမန်နေဂျာအဖြစ် ခန့်ထားချင်တယ်လို့ သူ့ကို စေ့စေ့ကြည့်ပြီးပြောတယ်။ ဘာမျှ ဆက်မပြောဘူး။ ကဲင် ဘာပြန်ပြောမလဲဆိုတာ စောင့်နေပုံရတယ်။ ကဲင်က ကျွန်တော် အတတ်နိုင်ဆုံး အကောင်းဆုံးဖြစ်အောင် လုပ်ပါ့မယ်လို့ ပြောလိုက်တယ်။ ငါ့အမြင်မှာတော့ အခု ငါပြောနေတဲ့ အလုပ်ဟာ မင်းနဲ့ အသင့်တော်ဆုံးပဲ။ မင်းက တစ်ယောက်တည်းသမား။ တာဝန်ဝတ္တရားဟာ တာဝန်ဝတ္တရားအတွက် ကျေပွန်ရမယ် ဆိုတဲ့ တွေးခေါ်ရှင် အီမယ်နွယ်ကန့်ရဲ့ လက်သုံးစကားနဲ့ နေတဲ့လူ မဟုတ်လားလို့ မန်နေဂျာချုပ်က ပြောရင်း သူ့ဘာသာပြုံးနေတယ်။ ကဲင်လည်း ရောရောယောင်ယောင်နဲ့ ပြုံးလိုက်မိတယ်။ မန်နေဂျာချုပ်က ဆက်ပြောပြန်တယ်။ အခုပြင်နေတဲ့ နှစ်ဆယ့်သုံးထပ်ပြီးရင် အဲဒီမှာ မင်း ဘားမန်နေဂျာလုပ်ရမယ်။ ဘားမန်နေဂျာဆိုပေတဲ့ အစစအရာရာ မင်းတာဝန်ယူရမှာ။ အဲဒီမှာနေမယ့် ဧည့်သည်တွေကို မဖြစ်နိုင်ဘူး၊ မတတ်နိုင်ဘူး၊ မဟုတ်ဘူးဆိုတာတွေ.. မပြောဖြစ်အောင် ကြိုးစားရမယ်။ သူတို့လိုအပ်တာကို မင်းက တတ်နိုင်သလောက် ဖြည့်စွမ်းပေးရမယ်။ မင်း သဘောပေါက်ရဲ့လား ကဲင်လို့ မေးပြန်တယ်။ ကျွန်တော် ကြိုးစားပါ့မယ်လို့ပဲ ကဲင်က ဖြေနိုင်တယ်။ သူတို့တွေက ဘယ်သူ ဘယ်ဝါဆိုတာ မင်းအတွက် အရေးမကြီးဘူး။ မင်း သိဖို့မလိုဘူး။ မင်းတွေ့နေကျ စီးပွားရေးသမားတွေ၊ ကြေးရည်တက်တွေ မဟုတ်ဘူး။ သူတို့က တစ်မျိုး။ မင်းအနေနဲ့ အတော်သတိထားပြီး ဆက်ဆံရမယ်.။ အကောင်းဆုံးဖြစ်အောင် ဆက်ဆံပါ။ ဒီလူတွေက ပင်လယ်ကွေ့ထိပ်က ဟိုတယ်မှာ အရင်က နေတယ်။ အခု သိပ်ဘဝင်မကျဘူးလို့ ကြားတာနဲ့ ဒီမှာ ပြောင်းနေကြအောင် အတော် ကြိုးစားပြီး ခေါ်ခဲ့ရတာ။ ပြောရရင်တော့ ဒီလူတွေဆီက ရတဲ့ ဟိုတယ်ခဟာ တို့လို ဟိုတယ်ကြီးအတွက် အကျိုးအမြတ်မဟုတ်ဘူး.။ သူတို့ရဲ့ အဆက်အသွယ်တွေ ပတ်သတ်ရာ ပတ်သတ်ကြောင်းတွေနဲ့ တို့လုပ်ငန်း ပိုမိုကျယ်ပြန့်အောင် ပိုအောင်မြင်အောင် လုပ်နိုင်တာတွေ ရှိတယ်။ ဒါကြောင့် တို့ရဲ့ ဆားဗစ်ဟာ တို့ရဲ့ ရင်းနှီးမြှုပ်နှံမှုပဲ။ မင်း သဘောပေါက်ရဲ့လား မန်နေဂျာချုပ်က အရှည်ကြီးရှင်းပြတယ်။ သဘောပေါက်ပါတယ်လို့ ကဲင်က ဖြေရုံပဲ။ သူက မန်နေဂျာတော့လည်း ဖြစ်ချင်သေးတာကိုး။ ဒီလိုနဲ့ပဲ ကဲင်တစ်ယောက် ဟိုတယ်ရဲ့ နှစ်ဆယ့်သုံးထပ်က တာဝန်အရှိဆုံး ဘားမန်နေဂျာ ဖြစ်သွားတော့တာပဲ။

ကဲင်နီ။ ငါ့ကို ရိုးရိုးရေတစ်ခွက်ပေးစမ်းပါလို့ လဇ်ဇီက ပြောရင်း နင် ဘာတွေ တွေးနေသလဲလို့ မေးလိုက်တယ်။ ကဲင်က ခေါင်းခါပြရင်း နင် ရေမသောက်နဲ့ လင်မနစ်သောက် ၊ အင်နာဂျီလိုတယ်၊ သကြားများများလိုတယ်လို့ ပြောတယ်။ သူ့နောက်နားက ရေခဲစက်ထဲက လင်မနစ် တစ်ပုလင်းထုတ်ပြီး ဖန်ခွက်ထဲထည့်ရင်း လဇ်ဇီရှေ့မှာ  ဖန်ခွက်အောက်ခံကလေးချပြီး ဖန်ခွက်ကို တင်လိုက်တယ်။ လဇ်ဇီက တစ်ငုံလောက် သောက်ပြီး ကားလို့(စ) ဖန်ခွက်တွေ လုံလုံလောက်လောက် မှာထားပြီးပြီလားလို့ မေးရင်း ရယ်တယ်။ ကဲင်က အားရပါးရ ရယ်လိုက်တယ်။ လဇ်ဇီလည်း ရယ်တယ်။ ကားလို့(စ)ကတော့ ပြုံးရုံပဲ ပြုံးပြီး အမှားတစ်မျိုးထဲကို ငါ နှစ်ခါပြန်မလုပ်ဘူး။ ငါ အလုံလောက်မှာထားလို့ ရောက်တောင်နေပြီလို့ ဖြေတယ်။ နင်က ဘာဖြစ်လို့ သွားငြင်းတာလဲလို့ လဇ်ဇီက ကားလို့(စ)ကို မေးတယ်။ ငါက ငြင်းတာ မဟုတ်ဘူး။ အဲဒီတုန်းက သူတို့တစ်တွေပထမဦးဆုံးအကြိမ် ဒီကိုရောက်လာတဲ့ အခေါက်ပေါ့လို့  ပြန်ပြောရင်း ဇာတ်စုံခင်းပြတယ်။ တစ်ညတော့ သူတို့ထဲက တစ်ယောက်က ဝီစကီထိုင်သောက်တယ်။ သူတို့ စက္ကထရီက ညွှန်ကြားထားတဲ့အတိုင်း ငါလည်း ပုလင်းလိုက်ချထားပေးပြီး မလှမ်းမကမ်းမှာ ဖန်ခွက်တင်ထားတဲ့ လှည်းကလေးနဲ့ ထိုင်စောင့်နေရတာပေါ့။ သူက သူ့ဖန်ခွက်ထဲက ဝီစကီကို နှစ်ခါသောက်တယ်။ နှစ်ခါဆိုကုန်တယ်။ ကုန်သွားရင် ဖန်ခွက်အသစ်ချပေးရတယ်။ ငါ့စိတ်ထဲမှာ ဝီစကီဆိုတော့ လေးငါးခွက်ပေါ့ဟာ ။ ဘယ်ဟုတ်မလဲ။ ညနှစ်နာရီကို ထိုးရော။ တစ်ပုလင်းလုံး ထိုင်သောက်တော့ ပုလင်းထဲမှာ လက်သုံးလုံးလောက် ကျန်တဲ့ အချိန်လောက်မှာ  ငါလဲပေးတဲ့ ဖန်ခွက်ကို ကိုင်ပြီး ခုနသောက်တဲ့ ဖန်ခွက်မျိုးနဲ့ လဲပေးပါလို့ အဲဒီလူက ပြောတယ်။ သူက ကောင်းကောင်းပြောတာပါ။ ဂျီကျတာမဟုတ်ဘူး။ နင်တို့လည်း သိသားပဲ။ ဒီမှာသုံးတာက ဘိုဟီမီယံလုပ်တဲ့ လက်လုပ်ဖန်ခွက်တွေ။  ငါကလည်း ခုနက ဖန်ခွက်တွေနဲ့ အတူတူပါပဲ။ ကုမ္ပဏီတစ်ခုတည်း လုပ်တာပါလို့ ပြောတော့ သူက အလေးချိန် မတူဘူးတဲ့။ ငါ့စိတ်ထဲမှာတော့ မဖြစ်နိုင်ဘူးလို့ ထင်တာကိုး။ ဖန်ခွက်ရဲ့ အလေးချိန်အကြောင်း စောဒကတက်တာလည်း ကြားမှ မကြားဖူးပဲ။ ငါက သူလည်း ခပ်ထွေထွေဖြစ်လို့ နေမှာလို့ ထင်ပြီး အတူတူပဲလို့ ထပ်ပြောလိုက်တော့ သူက ကဲင်ကို လှမ်းခေါ်လိုက်ပြီး ဒီလိုလုပ်။ ဒီဖန်ခွက်နှစ်ခွက်ကို မီးဖိုခန်းထဲမှာ အသေးစိတ်ချိန်တဲ့ အလေးချိန်စက်မှာ သွားချိန်ခိုင်း။ အလေးချိန်တူရင် မင်းတုိူ့နှစ်ယောက်ကို တစ်ယောက်ကို ဒေါ်လာတစ်ရာ စီ ပေးမယ်။ မတူရင် မနက်ကျ အဲဒီဖန်ခွက်နှစ်ခွက်ကို ယူပြီး မင်းတို့ မန်နေဂျာချုပ်ကို ဖန်ခွက်တွေ အလေးချိန်မတူဘူးလို့ သွားပြောရမယ်တဲ့။ အဲဒါနဲ့ပဲ မီးဖိုခန်းထဲ သွားပြီး ချိန်ခိုင်းတော့ အလေးချိန်က မတူဘူး။ ကားလို့(စ) အရှည်ကြီးပြောပြီး ခေါင်းခါလိုက်တယ်။

ဒီတော့ နောက်နေ့ကျတော့ မန်နေဂျာချုပ်ကို နင်တို့ သွားပြောရတာပေါ့ ဟုတ်လားလို့ လဇ်ဇီင်္က မေးတယ်။ တို့ စကားနဲ့ တို့ မိနေတာကိုး။ တို့နှစ်ယောက်သား သွားပြောရတာပေါ့။ မန်နေဂျာချုပ်ကတော့ ရယ်တာပေါ့။ ငါ့ကိုတော့ ပြောတယ်။ မင်းကို ငါပြောဖူးသားပဲ။ ဒီလူတွေက လူတစ်မျိုးဆိုတာလို့။ ကဲင်က ကြားဝင်ပြောတယ် ။ ဒီကိစ္စက ဘယ်မှာ ဒီလိုနဲ့ ပြီးမလဲလို့ ပြောရင်း ကားလို့(စ)က ဆက်ပြန်တယ်။ ပြန်မယ့်နေ့ ညဘက်ကျတော့ အဲဒီလူက ငါတို့နှစ်ယောက်ကို ခေါ်ပြီး ဒေါ်လာတစ်ရာစီပေးတယ်။ ပြီးတော့ မင်းတို့မှတ်ထား။ လက်နဲ့ လုပ်တဲ့ ဖင်ထူထူဝီစကီခွက်တွေဟာ အသေးစိပ် ချိန်တဲ့ အလေးချိန်စက်နဲ့ ချိန်ကြည့်ရင် တစ်လုံးနဲ့ တစ်လုံး အလေးချိန်တူတာ မရှိသလောက်ဘဲလို့ ပြောတယ်လို့ ပြောပြီး ကားလို့(စ)က ရယ်တယ်။ နောက်တော့ သုံးယောက်စလုံး အသံထွက်လောက်အောင် ရယ်နေမိတယ်။ ပြီးတော့မှ လဇ်ဇီက လင်မနစ်တစ်ငုံလောက် သောက်ပြီး အဲဒီအခေါက်တုန်းကပဲပေါ့။  နင် မှတ်မိသေးလားလို့ ကဲင်က ပြောရင်း မေးလိုက်တယ်။ အခန်းစီးကိစ္စလားလို့ ကဲင်က ပြန်မေးတယ်။ အခန်းစီးကိစ္စမဟုတ်ဘူး။ အလင်းရောင်ရဲ့ ကိစ္စ။ နင် မကြားဖူးသေးဘူးထင်တယ်၊ ကားလို့(စ)လို့ မေးလိုက်တယ်။ ကားလို့(စ)က ခေါင်းခါပြလိုက်တော့   လဇ်ဇီက ခုလိုပြောတယ်။.  သူတို့ထဲက တစ်ယောက်ပေါ့။ ဂါဘိုကြီးနဲ့ ရင်းတယ် ထင်တယ်။ စကားပြောရင် ဂါဘိုကြီးအသံထွက်မျိုး။ ဂျာမန်သံ၊ ဆွစ်သံ ဝဲတယ်။  သူတို့တွေ ရောက်လာတော့ အခန်းတွေကို ကဲင်နီနဲ့ ငါက လိုက်ပြရတယ်။ တို့မန်နေဂျာလည်း ပါတယ်။ အဲဒီလူကြတော့ သူကြိုက်တယ် နေမယ်ဆိုတဲ့ အခန်းမှာ အခန်းစီး မကြိုက်ဘူး ဖြစ်ရော။ အလင်းရောင် မကာဘူး။ သူ့အခန်းအတွက် အလင်းရောင်ကာတဲ့ ခန်းစီးတပ်ပေးပါတဲ့။ ဒီတော့ ကဲင်နီနဲ့ မန်နေဂျာက ငါ့ကို ရှေ့တွန်းပြီး လဇ်ဇီက စိတ်တိုင်းကျဖြစ်အောင် စီစဉ်ပေးပါ့မယ်လို့ ပြောတယ်။ ငါကလည်း  ရှာမိန်းတို့ အဖွဲ့ကို ခေါ်ပြီး  အခန်းစီးလဲခိုင်းရတာပေါ့။ လဲပြီးတိုင်း သူ့ကို ခေါ်ပြရတယ်။ သူက စားသောက်ခန်းထဲမှာ လက်ပတော့နဲ့ အလုပ်လုပ်ရင်း ထိုင်ပြီးစောင့်နေတယ်။ သူ့ကို ခေါ်ပြတော့ ဘာလုပ်တယ်ထင်သလဲလို့ ပြောပြီး လဇ်ဇီက ဆက်မပြောသေးဘဲ လင်မနစ်တငုံလောက် သောက်လိုက်တယ်။ ကားလို့(စ)ကတော့ စိတ်ဝင်တစားနဲ့ နားထောင်နေတယ်။ ကဲင်ကတော့ ပြုံးစိစိ လုပ်နေတယ်။

သူက အိပ်ယာပေါ်တက်လှဲရင်း မျက်လုံးမှိတ်ထားတယ်လို့ ပြောရင်း လဇ်ဇီက စကားဆက်ပြန်တယ်။ အခန်းစီးတစ်ခုက တို့ဆီမှာ ရှိတဲ့အထဲမှာ အထူဆုံး.။ အဲဒီအခန်းဆီးကို တပ်လိုက်တော့ တခန်းလုံးမှောင်သွားတယ်။ ရှာမိန်းနဲ့ ငါကတော့ သူ သဘောကျလောက်ပြီထင်တာပဲ။ သူက မကြိုက်ဘူးတဲ့။ ဘာပြောတယ် ထင်သလဲ။ အခန်းက မှောင်လွန်းသတဲ့။ အခန်းမှောင်သွားဖို့ မဟုတ်ဘူး။ အလင်းရောင်ရဲ့ ရှိနေခြင်းကို မလိုချင်တာတဲ့။ သူ မျက်လုံးပိတ်ပြီး လှဲနေတဲ့အခါ အလင်းရောင်ရဲ့ ရှိနေခြင်းကို သူ သိနေသတဲ့။ ကိုင်း၊ နင်စဉ်းစားကြည့်စမ်း။ မျက်လုံးပိတ်ထားတဲ့အခါ သိနေတဲ့ အလင်းရောင်ရဲ့ ရှိနေခြင်းကို သူက မလိုချင်တာတဲ့။ ငါလည်း ဘာလုပ်ရမယ်မှန်းကို မသိတော့ဘူး.။ အဲဒီတုန်းက ရှာမိန်းရဲ့ မျက်နှာကို နင်တို့ မြင်စေ့ချင်တယ်။ ငိုတော့ မလိုပဲ။ နောက်ဆုံးတော့ သူကပဲ ငါ့ကို ပြောတယ်။ ဒီမှာ တရုတ်ပြည်က သွင်းတဲ့ ခန်းစီးအရောင်းဆိုင်တွေမှာ ရောင်းတဲ့ ပိုးခန်းစီးစ တစ်မျိုး။ သူက နာမည်ရေးပေးတယ်။ အဲဒါကို သွားဝယ်ပြီး အရင်က တပ်ထားတဲ့ ခန်းစီးနှစ်ခုကြားမှာ တပ်လိုက်ပါတဲ့။ အဲဒါနဲ့ အဆင်ပြေသွားရော.။ ဒီလိုဖြင့် အစကတည်းက ပြောရောပေါ့ဟယ်။ အဲဒီနေ့က ရှာမိန်းနဲ့ ငါ နေ့ ခင်းစာတောင်လွတ်သွားတယ် လို့ လဇ်ဇီက ပြောတယ်။ အတော် စိတ်ပင်ပန်းသွားပုံတောင် ရတယ်။ အခုတော့ ဘယ့်နှယ်နေသလဲ လို့ ကားလို့(စ)က မေးတယ်။ သူ့အခန်းက မှောင်တော့ မနေဘူး။ မှုန်တုန်တုန်ကြီးပဲ။ ငါတော့ မကြိုက်ပေါင်လို့ ဖြေတယ်။ ကားလို့(စ)က ကဲင်ကို လှည့်ကြည့်ရင်း အဲဒါ တစ်ညနေ မင်းနဲ့ ငါ့ကို မိန်းမရှာခိုင်းတဲ့ ငနဲ မဟုတ်ဘူးလားလို့ မေးတယ်။ အဲဒါက တစ်ယောက်။ သူက  အစ်တာလျံ ဖြစ်မယ်လို့ ကဲင်က ပြန်ဖြေတယ်။ ဟဲ့ ဒီအပေါ်ကိုခေါ်လာရင် လုံခြုံရေးက ခွင့်ပြုဖို့ ဘာတို့ လိုတယ် မဟုတ်လားလို့ လဇ်ဇီက ကြားဖြတ်မေးတယ်။ အေး၊ အဲဒီအပြင် သူတို့ အတွင်းရေးမှူးအမျိုးသမီးကြီးနဲ့ သူတို့မှာ ပါတဲ့ လုံခြုံရေးက မသိဘဲ ဒီအပေါ်ကို ဘယ်သူကမှ မတက်ရဘူးဆိုတာက ရှိသေးတယ် လို့ကဲင်က ပြန်ဖြေနေတုန်း ကားလို့(စ)က ဟီဟီလို့ သူ့ဘာသာ ရယ်နေတယ်။ ကဲင်က မင်းပဲ ပြောပြလိုက်စမ်းပါလို့ ကားလို့(စ)ကို တံတောင်နဲ့ အသာတွက်ရင်း ပြောတယ်။ ဒီလိုလို့ ပြောရင်း ကားလို့(စ)က စကားစလိုက်တယ်။

တစ်ညနေတော့ကွာ၊ ဘားမှာ လူပါးတယ်။ အဲဒီလူသိုက်လည်း သူတို့ လုပ်စရာရှိတာတွေ ပြီးသွားပုံရတယ်။ အပြင်ထွက်တဲ့လူ ထွက်။ တစ်ယောက် နှစ်ယောက်တော့ စားသောက်ခန်းထဲမှာ သောက်နေကြတယ်။ အဲဒီတုန်း၊ သူပြောတဲ့ အစ်တာလျံရောက်လာပြီး ငါ့ဆီမှာ ဝိုင်စာရင်း တောင်ပြီးကြည့်တယ်။ ပြီးတော့ သူအပြင် ထမင်းထွက်စားမယ်။ ပြန်လာရင် စားသောက်ခန်းထဲမှာ ကာဗနေး ဆာဗစ်ညောန် သောက်မယ်။ သူသောက်ချင်တဲ့ ပုံစံနဲ့ အစားကို ပြောတယ်။ နင်သိတဲ့ အတိုင်းပဲ ဝိုင်သမားတွေဟာ ချေးများတယ်။ ပြီးတော့ သူက ငါ အဖော်လိုတယ်။ မိန်းမလိုချင်သတဲ့။ ဒီတော့ ငါက မသိမသာ ကဲင်နီကိုလှမ်းပြီး  မျက်ရိပ်ပြလိုက်လို့ ကဲင်နီရောက်လာပြီး  ဘာများလိုအပ်တာရှိသလဲလို့ မေးတော့တာပေါ့။ ကဲင်နီက  သူ့ကို မေးတယ်။ ဘယ်လိုမိန်းမမျိုး လိုချင်ပါသလဲလို့။ ကဲင်နီနဲ့ ငါ အောက်မှာ လုပ်တုန်းက အဲဒီလိုမျိုးနဲ့ တိုးဖူးတယ်။ သူတို့လိုချင်တာ သိရရင် အောက်က ကောန်ဆိ Concierge က ငနဲတွေကို ပြောလိုက်ရုံပဲ။ ဒါက သူတို့အလုပ်။ သူလိုချင်တာ အဖြူမလား၊ အမဲမလား စသဖြင့်ပေါ့ကွာ.။ သူကလည်း ရှင်းရှင်းပဲ ဖြေတယ်။ ဝိုင်အကြောင်း နားလည်တဲ့ မိန်းမတဲ့ ။ ကျွန်တော်လည်း ဝိုင်အကြောင်း နာလည်ပါတယ်လို့တော့  ငါက ပြောဦးမလို့ပဲ။ မပြောရဲဘူး။ ယောက်ျားချင်း သာယာတဲ့ အကောင်ပဲလို့ ငါ့ကိုမြင်ပြီး မတော်တရော ထင်သွားမှာ စိုးလို့။ သူက ပြောတယ်။ ဝိုင်သောက်ရင်း စကားပြောဖို့တဲ့။ မင်းတို့က ညစ်တီးညစ်ပတ်တွေ တွေးနေကြသလားလို့တောင် တို့ကို မေးသေးတယ်။ ဝိုင်သောက်ရင်း ဝိုင်အကြောင်း၊ စာပေအကြောင်း၊ ရုပ်ရှင်အကြောင်း စသဖြင့် စိတ်ဝင်စားစရာကလေးတွေ ပြောရသတဲ့။ သူမှာတဲ့ စကားတစ်ခုကတော့ အဲဒါတွေကို သိပေတဲ့လည်း စာကြည့်တိုက်မှူးတွေလို မျက်မှန်ထူထူ၊ အသက်ကြီးကြီး အပျိုဟောင်းကြီးတွေတော့လည်း ခေါ်မလာနဲ့တဲ့။ တို့လည်း ခေါင်းအတော်ခြောက်သွားတယ်။ ကဲင်နီကတော့ ဒုက္ခပဲ။  မန်နေဂျာချုပ်က ဒီလူတွေကို မရနိုင်ဘူး၊ မဖြစ်နိုင်ဘူး၊ မဟုတ်ဘူးဆိုတာတွေ မသုံးရဘူး။ ဘယ့်နှယ်လုပ်မလဲ ဖြစ်ရော။ ငါလည်း မကြံတတ်ဘူး။ ကံကောင်းချင်တော့၊ ဗကာ့(စ)က အနားရောက်လာပြီး ဘာများပြဿနာ ဖြစ်နေကြသလဲလို့ မေးလာတယ်။ ဗကာ့(စ)က၊ ဒီမှာ ခေါ်သုံးနေတဲ့ အကြီးတန်း စားပွဲထိုး။ သူက၊ ရူး(မ)ဆားဗစ် က။ ဘာသာစကား လေးမျိုးလောက် မွတ်နေအောင် ပြောနိုင်တဲ့ ငနဲ။  အင်္ဂလန်မှာ ကြီးတဲ့ ပါကီ။ သူက ပြောတယ်.။ ဟိုတယ်ရဲ့ ယမကာဝယ်ယူရေး ဋ္ဌာနမှာ  ပါရှင်မလေး တစ်ယောက် ရှိသတဲ့.။ သူ့လိုပဲ လန်ဒန်မှာ ကြီးတာ ဝိုင်လုပ်ငန်းနဲ့ ပတ်သတ်ပြီး အယ်ဒလိတ် တက္ကသိုလ်က မဟာဝိဇ္ဇာဘွဲ့ ရထားတာဆိုပဲ။   အဲဒါနဲ့ပဲ၊ ပြဿနာပြေလည်သွားတာ။ ကဲင်နီတစ်ယောက်လည်း အသက်ဖြောင့်ဖြောင့် ပြန်ရှူနိုင် သွားရရှာတာ။ ပါရှင်မလေး ရိုရှန်ရာနာကတော့ ပြောတယ်။ အဲဒီလူနဲ့ စကားပြောရတာဟာ သေသွားတဲ့ သူ့အဖေနဲ့ ပြောနေရသလိုပဲတဲ့။

ပြောလို့ ပြီးသွားတာနဲ့ ကားလို့(စ)က ကောင်တာ အောက်ဘက်က ရေခဲစက်ထဲက ရေပုလင်း တစ်လုံးထုတ်ယူပြီး သောက်လိုက်တယ်။ ကဲင်ကတော့ သက်ပြင်းတစ်ချက်ချပြီး သူ့ဘာသာ ခေါင်းခါလိုက်တယ်.။ လဇ်င်္ဇီက ဖန်ခွက်ထဲက လက်ကျန် လင်မနစ်ကို အကုန် သောက်ချလိုက်ပြီး ကဲင်နီ၊ နင် ဒီအလုပ်မှာ မပျော်ဘူးလား လို့ လှမ်းမေးလိုက်တယ်။ ကဲင်က ခေါင်းခါ ပြန်တယ်။ မပျော်ဘူး၊ ပျော်တယ်ရယ်လို့တော့ မဟုတ်ဘူးဟာ။ ငါ့အတွက်တော့ အလုပ်ဟာ အလုပ်ပဲ။  ခုတော့ သူတို့ အကြောကို နည်းနည်း ရိပ်မိလာလို့ သိပ်မဆိုးဘူး ထင်တယ်လို့ ကဲင်က ဖြေတယ်။ သူတို့က ရောက်လာကြပြီဆိုရင် ဘယ်သူမှ ယမကာကို မထိမတို့ကြဘူး။ မန်နေဂျာချုပ် ပြောတဲ့အတိုင်း ဘယ်သူ ဘယ်ဝါတွေဆိုတာက အရေးမကြီးရုံတင်မကဘူး။  ဘာတွေ လုပ်နေကြမှန်းလည်း ဘယ်သူမှ မသိဘူး။ ရက်အတော်ကြာတော့ တစ်ယောက်စ နှစ်ယောက်စ ဒါ့(ခ)ဆု ဝတ်လာပြီး ဝင်လိုက် ထွက်လိုက် ဖြစ်လာကြတယ်။ ဒါဆို အလုပ်စနေကြပြီ။ နောက်တော့ အားလုံးလိုလို ဒါ့(ခ)ဆုတွေနဲ့ ဖြစ်သွားပြီး ဝင်ချည် ထွက်ချည် များလာတ.်။ နေ့နေ့ညည သတ်မှတ်ချက် မရှိသလိုပဲ။ ဧည့်သည်တချို့လည်း လာတယ်။ ဒီမှာထက် သူတို့ရဲ့ အစည်းအဝေးခန်းမှာပဲ စားကြ သောက်ကြတော့တယ်။ အဲဒီကျရင် ကားလို့(စ)နဲ့ ငါပဲ ဝင်ရ ထွက်ရတော့တယ်။ နောက် ရက်အတော်ကြာတော့ ဘားမှာ တစ်ယောက်စ နှစ်ယောက်စ လာပြီး ဘီယာလေး ကောက်တေး(လ)လေး သောက်ကြတယ်။ အဲဒီအချိန်ဆို ငါက သိပြီ။ သူတို့ အလုပ်ပြီးစ ပြုပြီဆိုတာ။ နောက်တော့ တဖြည်းဖြည်းနဲ့ ဘားမှာ လူများလာတယ်။ စားသောက်ခန်းနဲ့ ဘားမှာပဲ အချိန်ဖြုန်းကြတယ်။ အဲဒီအချိန်ကျရင် အောက်ထပ်က ဘားမင်းတွေတောင် ခေါ်ရတယ်။ သူတို့က လုပ်စရာပြီးလည်း ချက်ချင်း ထမပြန်သေးဘူး။ ပြန်သွားကြရင်လည်း ဘယ်လို ပြန်သွားကြမှန်းမသိဘူး။ အောက်ဆင်း လမ်းလျှောက်သလိုနဲ့ ပြန်ပေါ်မလာတော့ဘူး။. ဟိုတစ်ခါကဆို ပြန်သွားကြလို့ လူကုန်ရုံ ရှိသေးတယ်။ ချက်ချင်းကြီး အကုန်ပြန်ရောက်လာတယ်။ ငါတို့ ကျွမ်းပစ်ကုန်တော့တာပဲ လို့ ကဲင်က သူ့အတွေ့အကြုံတွေ ပြောပြတယ်။  ပြောရမယ်ဆိုရင်တော့ အများကြီးပဲဟာလို့ စိတ်ပျက်တဲ့ အသံနဲ့ နိဂုံးချုပ်လိုက်တယ်။ လဇ်ဇီက ထိုင်ရာက ထပြီး သူ့ဖိုင်တွဲနဲ့ ဘော(လ)ပင်ကို ကောက်ကိုင်လိုက်ရင်း မန်နေဂျာချုပ်က နင့်ကို လခ ကောင်းကောင်း ပေးထားတာပဲ။ နင်နည်းနည်းတော့ ကြိုးစားရမှာပေါ့ လို့ ရယ်ရင်း နောက်လိုက်တယ်။ သူတို့တွေ မရောက်သေးခင် ငါတော့ ဈေးဝယ်သွားလိုက်ဦးမယ်။ လင်မနစ်အတွက် ကျေးဇူးပဲ လို့ ပြောပြီး ခြေလှမ်းပြင်လိုက်တယ်။ ကဲင်ကတော့ ဘာမှ ပြန်မပြောဘဲ ပြုံးနေတယ်။ ကားလို့(စ)က သူတို့ ရောက်လာတာနဲ့ မိုလ်ဘိုင်းကို ဆက်လိုက်မယ်လို့ လှမ်းပြောပြီး နောက်တယ်။

ဖန်ခွက်တွေကို သန့်စင်နေတဲ့ အဝတ်စအား အဝတ်ဟောင်းပုံထဲ ပစ်ထည့်လိုက်ရင်း ဘော့(စ)၊ ငါလည်း ကင်တင်း သွားပြီး နေ့လည်စာ စားလိုက်ဦးမယ်လို့ ကားလို့(စ)က ပြောတယ်။  ကဲင်က ခေါင်းအသာညိတ်ပြရင်း ငါ့အတွက် ကိုလံဘီယာ တစ်ခရားနဲ့ ဒိန်းနစ်(သျှ) နဲ့ ဘလူးဘယ်ရီ မတ်ဖင် ပို့ခိုင်းလိုက်စမ်းပါ လို့ မှာလိုက်တယ်။ ကားလို့(စ) ထွက်သွားတော့၊ ကဲင်ဟာ စောစောက နေရာချထားတဲ့ ပန်းအိုးရှိတဲ့ စားပွဲဆီ ပြန်လာပြီး  အပြင်ဘက်ကို မျက်နှာမူပြီး ကုလားထိုင်တစ်လုံးမှာ ထိုင်လိုက်တယ်။ ပန်းအိုးထဲက ပန်းကို နည်းနည်းပြင်လိုက်ပြန်တယ်။ နေ့ခင်းပိုင်းမို့ အပြင်ဘက်မှာ လင်းတောက်နေတယ်။ ခုနေများ ဒီကနေ ပျံထွက်ပြီး မိုးသား တိမ်တိုက်တွေထဲမှာ ဝဲနေရင် ကောင်းမှာပဲ ဆိုတဲ့ အတွေးဝင်လာတယ်။ သူ့အကြောင်းကို သူ့ဘာသာ တွေးကြည့်မိတယ်။ ငါ့အလုပ်က ဘာလဲဆိုတာ တွေးကြည့်မိတယ်။  အရင်ကတော့ ဘားမန်နေဂျာ ဆိုတော့ ဘာလုပ်ရမယ်ဆိုတာ သိတယ်။ ခုတော့ သူမသိဘူး။ မန်နေဂျာချုပ်ရဲ့ ညွှန်ကြားချက်မှာ မဟုတ်ဘူး၊ မသ်ိဘူး၊ လုပ်မပေးနိုင်ဘူးတာတွေ မပြောရဘူးဆိုတာက အဓိကကိုး။ ဒါပေတဲ့ ဘယ်ဟာက ဟုတ်တယ်ရယ်လို့ သူက ညွှန်ကြားမထားဘူး။ တကယ်တော့ ကဲင်နီက ဟိုတယ်က အမှုထမ်းတစ်ယောက်နဲ့တောင် သိပ်မတူဘူး။ သူကိုယ်တိုင် ရေရေရာရာ မသိတဲ့ လူတစ်သိုက်အတွက် အလုပ်လုပ်နေရသလိုပဲ။ အပြင်ဘက်ကို ကြည့်နေရင်း ကဲင်နီ စိတ်ထဲမှာ အတွေးတစ်ခု ဝင်လာတယ်။ တစ်နေ့နေ့၊ တစ်ချိန်ချိန်မှာ အခွင့်အရေးတစ်ခု ရခဲ့ရင်ဖြင့် အဲဒီလူတွေထဲက တစ်ယောက်ယောက်ကို ခင်ဗျားတို့ ဘာလုပ်ကြမှန်းတော့ မသိဘူးဗျာ။ ခင်ဗျားတို့ အလုပ်မျိုး ကျွန်တော် လုပ်ချင်လို့ ဘယ်မှာများ သွားရှာရမလဲလို့ မေးကြည့်ဦးမှပဲ ဆိုတဲ့ အတွေးပဲ။ တကယ်တော့ ကဲင်နီက လူတော် တစ်ယောက်ပါ။ သူ့မန်နေဂျာချုပ်က ကောက်ချက်ချသလို  တာဝန်ဝတ္တရားအတွက် တာဝန်ဝတ္တရားကို ကျေစေတယ်ဆိုတဲ့ လူမျိုးပေါ့။ ဒါပေတဲ့လည်း ဘာလုပ်လို့ လုပ်နေမှန်း မသိရတဲ့ လူတွေ။ ဘယ်တော့လာလို့ ဘယ်တော့ ပြန်မယ်ဆိုတာ မသိရတဲ့ လူတွေဆီက အဖြေတစ်ခုခု ရလေမလားဆိုပြီး  တစ်နေ့နေ့မှာ မေးကြည့်ဦးမယ်လို့ တွေးကြည့်ရင်း မျှော်လင့်ချက်တစ်ခုထားတာကဖြင့် အတော် တုံးတာပဲ လို့ မှတ်ချက်မချရဘူးဆိုရင် ခပ်ညံ့ညံ့ အတွေးဆိုတာ ဒါမျိုးပဲလို့ ပြောင်ပြောင် ပြောရရုံ ကျန်တော့တာပဲ မဟုတ်ပါလား။

မြင့်သန်း
ချင်းတွင်း ၊ အမှတ် (၃၅)၊ ဖေဖော်ဝါရီ၊ ၂၀၀၉