ပျက်စီးပြိုလဲ (The Fall)

ခပ်ရိုးရိုးပဲ ၀န်ခံရမယ်ဆိုရင်တော့၊ နောင်ကြီးရေ၊ ကျွန်တော်ဟာ ဂုဏ်သိက္ခာနဲ့ အမြဲတမ်းပြည့်လျှမ်းခဲ့တဲ့ သူပါပဲ။ ကျွန်တော့်ဘ၀တစ်လျှောက်လုံးမှာ ငါ၊ ငါ၊ ငါ ဆိုတဲ့ စကားလုံးတွေ ပဲ့တင်ထပ်ပြီး အဲဒီအသံကို ကျွန်တော်ပြောသမျှစကားသံတိုင်းမှာ ကြားနိုင်ခဲ့တာပေါ့။ ၀င့်ဝါတာလေးတစ်ခုခုမပါဘဲ ကျွန်တော့်မှာ စကားမပြောတတ်ခဲ့သလိုပါပဲ၊ အထူးသဖြင့် ကျွန်တော် ပိုင်စိုးတဲ့ ကိုယ့်ကိုယ်ကိုယ်အစိုးရစိတ်နဲ့အတူဝင့်ဝါဖို့ဆို ကျွန်တော့်မှာ ဘယ်တုန်းကမှ မနောင့်နှေးခဲ့ဘူး။ အမြဲတမ်းပဲလွတ်လွတ်လပ်လပ်နဲ့ သြဇာအာဏာပြည့်ဝစွာ ကျွန်တော် ရှင်သန်ခဲ့တာပါ။ ကျွန်တော် လုံးလုံးလျားလျား ယုံကြည်လက်ခံထားတဲ့ ထူးခြားပေါ်လွင်တဲ့ အကြောင်းရင်းတစ်ခုကြောင့်ပဲ ကျွန်တော်ဟာ ကျွန်တော်မှတစ်ပါး တခြားသောလူတွေနဲ့ ဘယ်လိုမှ သက်ဆိုင်မှုမရှိဘူးလို့ ရိုးရိုးသားသား ခံစားခဲ့ရပါတယ်။ နောင်ကြီးကို ကျွန်တော်ပြောခဲ့သလိုပေါ့၊ ဘယ်သူ့ထက်မဆို ကိုယ်ကပိုပြီး ဉာဏ်ရည်ထက်မြက်တယ်လို့ ကျွန်တော် အမြဲယူဆခဲ့တာပဲ၊ ဒါတင်ပဲလားဆိုတော့ ဘယ်ဟုတ်လိမ့်မလဲ။ ပိုပြီး ကျွမ်းကျင်တဲ့၊ ပိုပြီးလက်ဖြောင့်တဲ့၊ ပြိုင်ဘက်ကင်း ကားမောင်းကျွမ်းတဲ့၊ ပျိုတိုင်းကြိုက်ရတဲ့ လူအဖြစ်ကို ကိုယ့်ကိုယ်ကိုယ် ယူဆခဲ့တာပါ။ ကိုယ် အားနည်းမှန်း အလွယ်တကူ အကဲဖြတ်လို့ရတဲ့ နယ်ပယ်တွေမှာတောင်မှပဲ၊ ထားပါတော့ ကျွန်တော် ရိုက်တတ်ရုံပဲရှိတဲ့ တင်းနစ်ကစားနည်းပဲဆိုပါစို့၊ ငါသာ နည်းနည်းအချိန်ယူ လေ့ကျင့်လိုက်ရင် အကောင်းဆုံးဆိုတဲ့ ကစားသမားတွေထက် သာပြီးသားပဲလို့ မတွေးဘဲနေနိုင်ဖို့ ကျွန်တော့်အတွက်တော့ ခက်ခဲပါတယ်။ ကျွန်တော့်အတွင်းသားထဲမှာ ကိုယ့်ကိုယ်ကိုယ် ပြန်တွေ့ရတာက အများထက်သာလွန်ထူးကဲမှုကလွဲပြီး တခြားဘာမှမရှိသလို၊ ဒီအချက်ကပဲ ကျွန်တော့်ရဲ့ စိတ်ကောင်းစေတနာနဲ့ တည်ငြိမ်အေးချမ်းမှုတွေအတွက် အကြောင်းပြချက် ဖြစ်ခဲ့ပါတယ်။ အခြားလူတွေနဲ့ ကျွန်တော့်ရဲ့ ဆက်ဆံမှုဟာ၊ အလုံစုံ လွတ်လပ်စွာ၊ ကျွန်တော့်ရဲ့ အထက်စီးကကျလာတဲ့ ဂရုဏာစိတ်သက်သက်ကြောင့်ပဲ ဖြစ်ပါတယ်။ ဒီအတွက် အကျိုးခံစားခွင့် အကုန်လုံးဟာလည်း ကျွန်တော့်ဆီကိုပဲ စီးဆင်းခဲ့တယ်၊ ဆိုပါတော့ ကျွန်တော့်ရဲ့ ကိုယ့်ကိုယ်ကိုယ်လေးမြတ်စိတ်ဟာ အဆင့်တစ်ခုထိ မြင့်တက်သွားခဲ့ရတယ်ပေါ့။

အခြားသော အမှန်တရား အချို့နဲ့အတူ၊ ဒီအချက်တွေကိုလည်း နောင်ကြီးကို ကျွန်တော်ပြောခဲ့တဲ့ (လှောင်ရယ်သံကြီး ကြားခဲ့ရတဲ့) ညနေအပြီး အချိန်ကာလတွေမှာ တဖြည်းဖြည်း ကျွန်တော် သိရှိလာခဲ့ရပါတယ်။ ရှင်းရှင်းလင်းလင်းကြီး ရုတ်တရက် သိလာခဲ့ရတာမျိုးတော့ မဟုတ်ဘူးပေါ့။ ပထမအဆင့်အနေနဲ့ ကျွန်တော့်ရဲ့ မှတ်ဉာဏ်တွေကို ပြန်လည်ဖော်ထုတ်ရပါတယ်။ တစ်ဆင့်ချင်းတက်ပြီး ကျွန်တော် ပိုမိုရှင်းလင်းစွာ သိမြင်လာပါတယ်၊ ကျွန်တော်သိတာတွေထဲက အနည်းငယ်သောအစိတ်အပိုင်းကို ကျွန်တော်သင်ယူနိုင်ခဲ့တယ် ဆိုပါတော့။ အဲဒီမတိုင်ခင်အချိန်ကအထိတော့ မေ့ပစ်နိုင်စွမ်းဆိုတဲ့ တမူထူးခြားတဲ့စွမ်းရည်က ကျွန်တော့်ကို ကူညီကာကွယ်ပေးခဲ့ပါတယ်။ ကျွန်တော့်အတွက်တော့ အရာရာတိုင်းကို မေ့ပစ်နိုင်တဲ့ အလေ့အကျင့်ရှိခဲ့တာပါ၊ ကျွန်တော့် သန္နိဋ္ဌာန်တွေကိုတောင်မှပဲ ကျွန်တော် မေ့ပစ်နိုင်ခဲ့ပါတယ်။ အခြေခံအားဖြင့်တော့ ဘာမှ မထူးခြားပါဘူး။ စစ်၊ ကိုယ့်ကိုယ်ကိုယ်အဆုံးစီရင်ခြင်း၊ အချစ်၊ ဆင်းရဲမွဲတေမှု စတဲ့ အကြောင်းအရာတွေဟာ ကျွန်တော့်အာရုံကို ဖမ်းစားနိုင်ပါတယ်၊ မှန်ပါတယ် ဒါကလည်း အခြေအနေတွေက ကျွန်တော့်ကို တွန်းအားပေးတဲ့အခါမှာပေါ့။ တကယ်တော့ ဒါဟာ ယဉ်ကျေးပျူငှာတဲ့ အပေါ်ယံရွှေမှုန်ကြဲ အာရုံစူးစိုက်မှုပါ။ အကြိမ်များစွာမှာ ကျွန်တော်နေထိုင်ရာ နေ့စဉ်ဘ၀အတွက် အဆန်းတကြယ်ဖြစ်နေတဲ့ အကြောင်းအရာတွေနဲ့ပတ်သက်ပြီး ကျွန်တော်ဟာ စိတ်လှုပ်ရှားချင်ယောင် ဆောင်တတ်ခဲ့ပါတယ်။ ဒါပေမဲ့ အခြေခံအားဖြင့်တော့ ကျွန်တော်ဟာ အဲဒါတွေနဲ့ တကယ်တမ်း ပါဝင်ပတ်သက်မှုမရှိခဲ့ပါဘူး၊ ကျွန်တော့် လွတ်လပ်ခွင့်ကို အဲဒါက နှောင်ကြိုးမတည်းဘူး ဆိုရင်ပေါ့လေ။ ကျွန်တော် ဒါကို ဘယ်လိုရှင်းပြရမလဲ။ အရာအားလုံးဟာ အပေါ်ယံလွှာတွေချည်းပဲ၊ ကျွန်တော်က အဲဒီအပေါ်ယံလွှာပေါ်မှာ လှိမ့်နေခဲ့တယ်ပဲဆိုပါတော့။

ကျွန်တော့်ကိုယ်ကျွန်တော်လည်း မျှမျှတတ ပြောခွင့်လေးတော့ပြုပါ။ တချို့အခါတွေမှာတော့ ကျွန်တော့်ရဲ့ မေ့ပစ်နိုင်စွမ်းဟာ ချီးကျူးခံထိုက်ပါတယ်။ ကိုယ့်ကို ကျူးလွန်တဲ့ ပြစ်မှုအားလုံးကို ခွင့်လွှတ်ရမယ်လို့ သင်ကြားပေးတဲ့ ဘာသာတရားကို ကိုးကွယ်တဲ့လူတွေရှိတယ်ဆိုတာ နောင်ကြီးလည်း သတိပြုမိမှာပါ။ ဒါပေမဲ့ အဲဒီပြစ်မှုတွေကို မမေ့ဘဲနဲ့တော့ ဘယ်သူကများ တကယ်တမ်းမှာ ခွင့်လွှတ်နိုင်မတဲ့လဲ။ ကိုယ့်အပေါ်ကျူးလွန်တဲ့ ပြစ်မှုတွေကို ခွင့်လွှတ်နိုင်လောက်အောင် ကျွန်တော့် စိတ်ရင်းမကောင်းလှပေမယ့်၊ နောက်ဆုံးတော့လည်း အဲဒါတွေကို အမြဲတမ်း ကျွန်တော် မေ့သွားခဲ့တာပါပဲ။ ကျွန်တော်က သူ့ကို မုန်းနေတယ်လို့ ထင်တဲ့လူတစ်ဦးဟာ ကျွန်တော်က ခပ်ပြုံးပြုံးလေးလုပ်ပြီး ကျွန်တော့်ဦးထုပ်နဲ့ သူ့ကို တို့ထိလိုက်တဲ့ အပြုအမူကို တင်းခံနိုင်လောက်အောင် မမာကျောပါဘူး။ သူ့ဆီမှာရှိတဲ့ လူသားသဘာဝအရ အဲဒီနောက်မှာတော့ ကျွန်တော့်ရဲ့ သဘောထားကြီးရင့်မှုကို သူက အလေးအမြတ်ပြုပါလိမ့်မယ်၊ ဒါမှမဟုတ်လည်း ကျွန်တော့်ရဲ့ မဖွယ်မရာအပြုအမူအတွက် ငြူစူမိမယ်ပေါ့။ ဒါတွေအတွက် ကျွန်တော့်နောက်ကွယ်က တကယ့်အကြောင်းရင်းဟာ ဒီထက်ပိုမိုရိုးစင်းမှန်း သူမသိလို့ ဖြစ်မှာပါ။ ကျွန်တော့်အနေနဲ့က သူဘယ်သူလဲအသာထား သူ့ရဲ့ နာမည်ကိုတောင် မေ့သွားခဲ့ပြီကိုး။ ဒီလိုအဖြစ်အပျက်မျိုးတွေမှာတော့၊ ကျွန်တော့်ကို ခံစားချက်ကင်းမဲ့သူ၊ ဒါမှမဟုတ် ကျေးဇူးမသိတတ်သူဖြစ်အောင် မကြာခဏလုပ်တတ်တဲ့ အဲဒီ (မေ့ပစ်နိုင်စွမ်းဆိုတဲ့) နာတာရှည်အားနည်းချက်ကပဲ ရန်သူကိုတောင် မေတ္တာထားနိုင်တဲ့ ခန္ဓီပါရမီရှင်ကြီးတစ်ဦးဖြစ်အောင် ကျွန်တော့်ကို လုပ်ပေးခဲ့ပြန်တာပေါ့။

ဒါကြောင့်ပဲ ငါ၊ ငါ၊ ငါ ဆိုတာမှတစ်ပါး တခြားဘာကရိကထမှပါဘဲ ကျွန်တော်ဟာ တစ်နေ့ချင်းစီကို ရှင်သန်ဖြတ်သန်းခဲ့ပါတယ်။ အမျိုးသမီးတွေနဲ့ပတ်သက်ပြီး မနက်ဖြန်ဆိုတဲ့ အတွေးမရှိဘဲ၊ ကုသိုလ်အကုသိုလ်တွေနဲ့ပတ်သက်ပြီး မနက်ဖြန်ဆိုတဲ့အတွေးမရှိဘဲ တစ်နေ့ချင်းအတွက်စီပဲ ရှင်သန်နေထိုင်တဲ့၊ ဆိုပါစို့ ခွေးတွေလိုမျိုးပေါ့။ ဒါပေမဲ့ နေ့တွေတိုင်းကတော့ ကျွန်တော့်ကို ကျွန်တော်ရှိနေရမယ့် အဆင့်မှာပဲ သေချာခိုင်မြဲစေခဲ့ပါတယ်။ ဒီတော့လည်း ပြောရမယ်ဆိုရင် ဘ၀ရဲ့အပေါ်ယံမျက်နှာပြင်မှာ ကျွန်တော်ဟာ တိုးတက်ထွန်းကားနေခဲ့တယ်ပေါ့၊ ဒါဟာ ဝေါဟာရတွေရဲ့ နယ်နိမိတ်အတွင်းမှာပါပဲ၊ တကယ့်အစစ်အမှန်တော့ ဘယ်ဟုတ်လိမ့်မလဲ။ ကျွန်တော် အပေါ်ယံလေးရှပ်ဖတ်ခဲ့တဲ့ စာအုပ်တွေ၊ အပေါ်ယံလေးချစ်ခဲ့တဲ့ မိတ်ဆွေတွေ၊ အပေါ်ယံလေး လည်ပတ်ခဲ့တဲ့ မြို့တော်တွေ၊ အပေါ်ယံလေးပိုင်ဆိုင်ခဲ့တဲ့ အမျိုးသမီးတွေပေါ့။ မောဟနဲ့ ငြီးငွေ့ပျံလွင့်မှုတို့က ထွက်ပေါ်လာတဲ့ အပြုအမူနေတွေနဲ့ပဲ ကျွန်တော် ဆက်လက်ရှင်သန်နေခဲ့ပါတယ်။ အဲဒီထဲကို လူသားတွေဆိုက်ရောက်လာတော့ သူတို့ဟာ တစ်ခုခုကို တွယ်ကပ်ထားချင်ကြတယ်၊ ဒါပေမဲ့ တွယ်ကပ်ထားစရာက ဘာတစ်ခုမှမှ မရှိဘဲ၊ ဒါဟာ အကြောင်းမလှတဲ့ အဖြစ်ပါပဲ။ သူတို့အတွက်ပေါ့လေ။ ကျွန်တော့်အတွက်တော့ ကျွန်တော်က မေ့သွားရုံပဲ။ ကျွန်တော့်အကြောင်းသက်သက်ကလွဲလို့ တခြားဘာတစ်ခုကိုမှ ကျွန်တော် သတိမရခဲ့ပါဘူး။

ဒါပေမဲ့လည်း တဖြေးဖြေးနဲ့ ကျွန်တော့်မှတ်ဉာဏ်တွေဟာ ကျွန်တော့်ဆီပြန်ရောက်လာတယ်။ ဒါမှမဟုတ်လည်း ကျွန်တော်က သူတို့ဆီ ပြန်ရောက်သွားတာလည်း ဖြစ်နိုင်တယ်။ ပြီးတော့ သူတို့အထဲမှာ ကျွန်တော့်အတွက်စောင့်ကြိုနေတဲ့ ပြန်လည်အမှတ်ရခြင်းတွေကို ကျွန်တော် ပြန်တွေ့ရှိခဲ့ရတယ်ပေါ့။ ဒီအကြောင်းလေး မပြောပြခင်တော့၊ နောင်ကြီးရေ၊ သာဓကအဖြစ်အပျက်လေး တချို့လောက်တော့ မျှဝေခွင့်ပြုပါဦး။ (ဒါတွေက အသုံးတည့်မယ်လို့ ကျွန်တော် အာမခံပါရဲ့) ဒါတွေဟာ ကျွန်တော့် (မှတ်ဉာဏ်ထဲကို) စူးစမ်းရှာဖွေမှုလမ်းကြောင်းတစ်လျှောက် ကျွန်တော် ရှာတွေ့ခဲ့တဲ့ အကြောင်းအရာတွေပဲ။

တစ်နေ့မှာတော့ မီးပွိုင့်စိမ်းသွားတဲ့အချိန် ကျွန်တော့်ကားဟာ ထွက်ခွာဖို့ အနည်းငယ်နှေးကွေးသွားစဉ်မှာပဲ ကျွန်တော်တို့ရဲ့ စိတ်ရှည်သည်းခံတတ်တဲ့ မြို့ကြီးသားတွေဟာ ကျွန်တော့်နောက်ကနေ ကားဟွန်းတွေကို ဒေါသတကြီးတီးနေတာ ကြားလိုက်ရပါတော့တယ်။ အဲဒီအချိန်မှာပဲ မနှီးရိုးစွဲ အဖြစ်အပျက်တစ်ခု ကျွန်တော့်ခေါင်းထဲကို ဖျပ်ကနဲ ပြန်ဝင်ရောက်လာတယ်။ ဘောင်းဘီတိုဝတ်ပြီး၊ မျက်မှန်တပ်ထားတဲ့ လူဖလံလေးတစ်ဦး စီးလာတဲ့ ဆိုင်ကယ်တစ်စီးဟာ ကျွန်တော့်ကားနံဘေးက ပတ်ပြီး မီးနီနေတဲ့ မီးပွိုင့်မှာ ကျွန်တော့်ရှေ့က ပိတ်ရပ်သွားခဲ့တယ်။ ဆိုင်ကယ်ကိုရပ်လိုက်စဉ်မှာပဲ ငနဲလေးဟာ စက်ကိုပါသတ်လိုက်ပြီး တစ်ချောက်ချောက်နဲ့ ပြန်နှိုးလို့မရ ဖြစ်နေပါတော့တယ်။ မီးပွိုင့်အရောင်ပြောင်းသွားတဲ့အချိန်မှာ ကျွန်တော်ကတော့ ကျွန်တော့်ရဲ့ ရှိရင်းစွဲ ဖော်ရွေပျူငှာမှုနဲ့အတူ ကျွန်တော် ဖြတ်သွားလို့ရအောင် သူ့ရဲ့ မော်တော်ဆိုင်ကယ်ကို ဘေးနည်းနည်းကပ်ပေးနိုင်မလားလို့ ပြောလိုက်ပါတယ်။ ငနဲလေးဟာ သူ့ရဲ့ ဖွတ်ချက်ဖွတ်ချက် ဆိုင်ကယ်ကြောင့် အတော်လေး အစာမကြေဖြစ်နေတယ်။ ဒီတော့လည်း ပါရီသားတွေရဲ့ ယဉ်ကျေးမှုထုံးစံနဲ့အညီ၊ မိုးပျံဂီယာထိုးပြီး ကျော်သွားပါလားလို့ သူက ကျွန်တော့်ကို တုံ့ပြန်လေရဲ့။ ကျွန်တော်ကလည်း ဖယ်ပေးဖို့ကို ထပ်ပြောရပြန်တာပေါ့၊ ဒီတစ်ကြိမ်မှာလည်း ယဉ်ကျေးနေသေးတယ်ဆိုပေမယ့် စိတ်မရှည်တဲ့လေသံလေး အနည်းငယ်တော့ ပါသွားခဲ့ပါတယ်။ ချက်ချင်းဆိုသလိုပဲ၊ သွားသေလိုက်ပါလားလို့ ပြစ်ပြစ်နှစ်နှစ်ကြီး ကျွန်တော် အပြောခံလိုက်ရပါတယ်။ အဲဒီအချိန်တော့ ကျွန်တော့်နောက်က ကားဟွန်းသံတွေ အတော်လေး ဆူညံနေပါပြီ။ ကျွန်တော်ကတော့ သမာဓိတည်တည်နဲ့ပဲ၊ ယဉ်ယဉ်ကျေးကျေး ပြောဆိုဖို့နဲ့ သူ့ကြောင့် လမ်းပိတ်နေတယ်ဆိုတာ သတိပြုဖို့ ပြောပါတယ်။ သူ့ဆိုင်ကယ်ကို စိတ်မရှည်တာကြောင့် ယမ်းပုံမီးကျနေပြီဖြစ်တဲ့ ဒေါသအိုးက၊ သူ့အခေါ်အရတော့ ဆော်ပလော်အတီးခံချင်တယ်ဆိုရင် သူက ၀မ်းသာအားရ ကူညီပေးမယ်ဆို့ ဆိုလာပါတယ်။ ကျွန်တော့်ဆီမှာလည်း ဒေါသက အားကောင်းမောင်းသန် ထကြွလာပြီး ပါးရွဲ့မှတော့နားရွဲ့ရတော့မှာပဲ၊ ဒီလောက်အာချောင်တဲ့ကောင်ကို တီးပစ်ရမယ်ဆိုတဲ့ အတွေးနဲ့ ကားထဲက ထွက်လိုက်ပါတယ်။ ကျွန်တော်ဟာ ကျွန်တော်ရန်ဖြစ်ရမယ့်လူထက် ခေါင်းတစ်လုံးမြင့်ပြီး ကျွန်တော့်ကြွက်သားတွေကလည်း အကောင်းဆုံးအခြေအနေမှာ ရှိနေခဲ့တာဆိုပေမယ့် ကိုယ့်ကိုယ်ကိုယ် သူရဲဘောကြောင်တယ်လို့တော့ မထင်မိပါဘူး (ဒါပေမဲ့ အခြားတစ်ယောက်ကရော အဲဒီလို မထင်ဘူးတဲ့လား)။ သူများကို ဆော်ပလော်တီးလိုက်တာထက် ကိုယ်က ဆော်ပလော်တီးခံလိုက်ရတယ်လို့ ကျွန်တော် ယုံကြည်နေတုန်းပဲ။ ကျွန်တော် ခြေတစ်လှမ်းတောင် မလှမ်းလိုက်ရသေးဘူး၊ လူအုပ်ထဲက တစ်ယောက် ထွက်ချလာပြီး ကျွန်တော့်ဆီပြေးလာတယ်၊ ကျွန်တော်ဟာ အရှက်မရှိတဲ့ကောင်ပဲ၊ ဆိုင်ကယ်ကိုခွထားလို့ အဆင်သင့်မဖြစ်တဲ့လူတစ်ယောက်ကို ကျွန်တော် ထိုးခွင့်မရှိဘူးလို့ ပြောပါလေရော။ ကျွန်တော်လည်း အဲဒီစစ်သားလိုလိုလူဘက်ကို လှည့်လိုက်ပေမယ့် အမှန်တော့ သူ့ကို ကျွန်တော် မြင်တောင်မမြင်လိုက်ပါဘူး။ တကယ်ဖြစ်သွားခဲ့တာက၊ ဆိုင်ကယ်စက်နိုးသွားသံ ကျွန်တော့်နားထဲကို စူးစူးဝါးဝါးဝင်သွားတဲ့တစ်ချိန်တည်းမှာ ကျွန်တော့် ခေါင်းကိုလှည့်မပစ်နိုင်တော့ဘူး။ ဘာတွေဖြစ်ပျက်သွားလဲ ကျွန်တော် မဝေခွဲနိုင်ခင်မှာပဲ မော်တော်ဆိုင်ကယ်က မောင်းထွက်သွားခဲ့ပြီ။ စိတ်ထဲမှာနောက်ကျိကျိနဲ့ ကားဆီကို ကျွန်တော်စက်ရုပ်တစ်ရုပ်လို ပြန်လျှောက်လာတဲ့ တစ်ချိန်တည်းမှာ မော်တော်ယာဉ်တန်းရှည်ကြီးဆီက ကားဟွန်းသံတွေ ယမ်းပုံမီးကျ ပြိုကျလာခဲ့တယ်။ မီးက စိမ်းသွားပြီး။ အဲဒီနောက်မှာတော့ ဝေခွဲမရဖြစ်နေရင်းပဲ၊ ကျွန်တော့်ကို စော်ကားသွားတဲ့ ခပ်တိမ်တိမ်ကောင်ကို ပညာပေးရမယ့်အစား ကျွန်တော့်ကားဆီပဲ ရိုရိုကျိုးကျိုး ပြန်လာပြီး စက်ကိုနှိုး လိုက်မိပါတယ်။ အဲဒီ ခပ်တိမ်တိမ်ကောင်ကို ကျွန်တော်ဖြတ်မောင်းလာချိန်မှာပဲ သူက ကျွန်တော့်ကို လှမ်းပြောလိုက်သံကြားရတယ်၊ "စောက်ချိုးမပြေတဲ့ကောင်" တဲ့။ အဲဒီစကားသံကို ကျွန်တော် အမှတ်ရနေတုန်းပဲ။

ဘာမှ ထူးထူးခြားခြားမရှိလှတဲ့ဇာတ်လမ်းလို့ ခင်ဗျားထင်တယ်မဟုတ်လား။ ဖြစ်နိုင်ပါပေရဲ့။ ဒါနဲ့တောင် အဲဒီအဖြစ်ပျက် မေ့ပစ်ဖို့ ကျွန်တော့်မှာ အတော်အချိန်ယူခဲ့ရပါတယ်၊ အဲဒါ ကျွန်တော် ပြောချင်နေတဲ့ အချက်ပဲ။ ကျွန်တော် အယူခံဝင်နိုင်စရာစကားတွေ ရှိနေတုန်းပဲလေ။ ကျွန်တော်ဟာ ဘာမှပြန်မပြောဘဲ အထုအထောင်းခံရဖို့ ကိုယ့်ကိုယ်ကိုယ်ခွင့်ပြုခဲ့တယ်၊ ဒါပေမဲ့ သူရဲဘောကြောင်သူလို့တော့ ကျွန်တော် အစွပ်စွဲမခံနိုင်ဘူး။ နှစ်ဖက်စလုံးက ကျွန်တော့်ကို ၀ိုင်းပြောနေတာကို အံအားတကြီး ခံလိုက်ရတယ်၊ ကျွန်တော့်မှာ သူတို့ ဘယ်သူတွေမှန်းလဲ သေသေချာချာမသိဘဲ စိတ်ရှုပ်ထွေးနေခဲ့တဲ့အချိန်မှာ ကားဟွန်းသံတွေ ထွက်လာတော့ ကျွန်တော့်ရဲ့ ရှက်စိတ်ကို အဆုံးစွန်ထိ ရောက်သွားစေတော့တာပေါ့။ ဒါနဲ့တောင်၊ ဂုဏ်သိက္ခာအရ ထိန်းရမယ့်စံနှုန်းတွေကို ချိုးဖောက်မိတဲ့လူလို ကျွန်တော် စိတ်မသာမယာ ဖြစ်ရပါတယ်။ တုံ့ပြန်မှုတစ်စုံတစ်ရာ မပြုနိုင်ဘဲ ကားထဲပြန်ဝင်နေတဲ့ ကျွန်တော့်ကိုယ်ကျွန်တော် တွေ့နေရတယ်၊ လူအုပ်ကြီးဆီက မီးဝင်းဝင်းတောက်နေတဲ့ မျက်ဝန်းတွေအောက်မှာပေါ့။ အဲဒီမျက်ဝန်းတွေမှာလည်း ပျော်ရွှင်မစ္ဆရိယတွေ စွန်းထင်းနေပါသေးတယ်၊ ပြန်စဉ်းစားကြည့်တော့ ဒါဟာ ကျွန်တော်အဲဒီအချိန်က ၀တ်ထားခဲ့တဲ့ အပျံစား အပြာရောင်ဝတ်စုံကြောင့်ဖြစ်မှာပါ။ "စောက်ချိုးမပြေတဲ့ကောင်" ဆိုတာကို ကျွန်တော် ကြားရတယ်၊ အံ့သြစရာကောင်းတာက အဲဒီစကားလုံးဟာ ကျွန်တော့်ခေါင်းထဲမှာ ကျွန်တော့်အတွက်သင့်လျော်တဲ့စကားလုံးလို့ တွေးမိလိုက်တာပဲ။ ချုပ်ရရင်တော့ ကျွန်တော်ဟာ လူပုံအလယ်မှာ ပြိုလဲခဲ့ရတယ်ပေါ့။ သေချာအောင်ပြောရရင်တော့ (ကျွန်တော့်ရဲ့ ငွေကြေးအခြေအနေအပါအ၀င်) ၀န်းကျင်အနေအထားပေါင်းများစွာရဲ့ မီးခိုးကြွက်လျှောက် အကျိုးဆက်ပေါ့၊ ဒါပေမဲ့ ကိုယ်ကြုံတွေ့ရမယ့် ၀န်းကျင်အနေအထားတွေကတော့ ရှောင်လွှဲမရအောင် အမြဲတမ်းရှိနေတာပဲလေ။ အေးအေးဆေးဆေး ပြန်တွေးကြည့်တဲ့အခါမှာတော့ ကျွန်တော် ဘာလုပ်ခဲ့သင့်သလဲဆိုတာ ရှင်းရှင်းကြီး မြင်လာပါတယ်။ မေးရိုးပေါ် ချက်ကောင်းကောင်း တုတ်နဲ့အရိုက်ခံရပြီး ကျွန်တော် လဲကျသွားမယ်၊ ကျွန်တော့် ကားထဲ ပြန်သွားပြီး၊ ကျွန်တော့်ကို ဆော်သွားတဲ့ မျောက်နောက်ကို ထပ်ကြပ်မကွာလိုက်မယ်၊ သင်းရဲ့ ဆိုင်ကယ်အစုတ်ကို ပလက်ဖောင်းကြားထဲ ကျွန်တော့်ကားနဲ့ အမိအရညှပ်ပစ်မယ်၊ ပြီးတော့မှ ဂုတ်ကဆွဲယူပြီး သင်းနဲ့ ထိုက်တန်တဲ့ အပြစ်ဒဏ်ကို ပေးဖို့ပဲလေ၊ အဲဒီလိုလုပ်နေတဲ့ ကျွန်တော့်ကိုယ်ကိုယ် ပြန်မြင်နေရတယ်။ ဇာတ်လမ်းပုံစံလေးတွေ မဆိုသလောက် ကွဲနိုင်ပေမယ့် အဲဒီငနဲသားလေးကို ကျွန်တော့်စိတ်ကူးထဲမှာ ကားနဲ့ဖြတ်တိုက်ခဲ့တာ အကြိမ်တစ်ရာဘယ်ကလိမ့်မလဲ။ ဒါပေမဲ့ သိပ်နောက်ကျသွားပြီလေ၊ ကျွန်တော့်မှာ ဗျာပါဒဖိစီးပြီး အံတကြိတ်ကြိတ်နဲ့ နေ့ပေါင်းများစွာကြာခဲ့ရတယ်။

ဘာလို့လဲ၊ မိုးရွာနေပြန်ပြီလား။ ကျွန်တော်တို့ ခဏနားကြမလား၊ ဟိုက ဆင်ဝင်အောက်မှာလေ။ ကောင်းပါပြီ။ ဒါနဲ့ ကျွန်တော် ပြောနေတာ ဘယ်ရောက်သွားပြီလဲ။ သြော် ဟုတ်ပြီ၊ ဂုဏ်သိက္ခာ။ ဒီလိုနဲ့ အဲဒီဇာတ်ကွက်လေးကို ပြန်လည်အမှတ်ရမှုတွေ ကျွန်တော်ရှာတွေ့တဲ့အချိန်မှာ၊ ဒါ ဘာကိုဆိုလိုသလဲဆိုတာ ကျွန်တော် သိလာရပါတယ်။ တကယ်တော့လည်း ကျွန်တော့် အိပ်မက်ဟာ အချက်အလက်တွေလိုတော့ မခိုင်မာပေဘူးပေါ့။ အခုတော့ ရှင်းသွားပြီလေ၊ ကျွန်တော် အိပ်မက်မက်ခဲ့မိတယ်၊ ကိုယ်ကျွမ်းကျင်ရာ သက်မွေးမှုမှာရော၊ ပုဂ္ဂိုလ်ရေးမှာပါ လူအများလေးစားဦးညွတ်ရတဲ့ လုံးဝပြည့်စုံတဲ့ လူသားတစ်ဦးဖြစ်အောင် လုပ်ဆောင်ဖို့ ကျွန်တော် အိပ်မက်မက်ခဲ့မိတယ်လေ။ ဆာဒန်တစ်ဝက်၊ သမ္မတဒီဂေါ်လ်တစ်ဝက် လူသားလို့ ပြောပေါ့။ ချုပ်ရရင်တော့ ကျွန်တော်က အရာအားလုံးကို လွှမ်းမိုးချင်ခဲ့တာပဲ။ ဒါကြောင့်ပဲ ကျွန်တော် လေဖမ်းဒန်းစီးခဲ့တာပဲ၊ ကျွန်တော့်ရဲ့ ဉာဏ်ရည်ပါရမီအစား၊ ရုပ်ပိုင်းဆိုင်ရာစွမ်းရည်တွေကိုပဲ အများမြင်သာအောင်ပြသ၀င့်ဝါတဲ့ အလုပ်ကို အမှတ်တစ်ခုထိရောက်အောင် ပြုလုပ်ခဲ့ရင်းနဲ့ပေါ့။ အများသူငါမြင်ကွင်းမှာ ပြန်လည်ချေပနိုင်ခြင်းမရှိပဲ ပိတ်မိခံခဲ့ရပြီးတဲ့နောက်မှာ ကျွန်တော့်ရဲ့ အဲဒီ စံနမူနာကိုယ်ရေးရုပ်ပုံလွှာကို အပွန့်အပဲမခံဘဲ မြင်ကြည့်ဖို့ ဘယ်ဖြစ်နိုင်တော့ပါ့မလဲ။ ကျွန်တော် ကြွေးကြော်ခဲ့သလို၊ ကျွန်တော်ဟာ အမှန်တရားနဲ့ ဉာဏ်ပညာတို့ရဲ့ အသိမိတ်ဆွေသာဆို အဲဒီဇာတ်ကွက်လေးဟာ ကျွန်တော့်အတွက် ဘာများအရေးကြီးပါ့မလဲ။ အဲဒီအဖြစ်အပျက်ကို မျက်မြင်ကိုယ်တွေ့ ရှိခဲ့သူတွေတောင် မေ့သွားလောက်ကြပြီပဲ။ ဘာမဟုတ်တာလေးတစ်ခုကို ဒေါသထွက်မိပြီး၊ အဲဒီ ဘာမဟုတ်တာလေးကြောင့်ပဲ ဒေါသထွက်ခံခဲ့ရပြီး၊ ကျွန်တော့်ဒေါသရဲ့ နောက်ဆက်တွဲအကျိုးဆက်တွေကို ထိန်းချုပ်နိုင်စွမ်းကင်းမဲ့ပြီး၊ တည်ငြိမ်အေးချမ်းသူတစ်ဦးလည်း ဖြစ်ချင်နေသေးတဲ့ ကျွန်တော့်ကိုယ်ကျွန်တော် အပြစ်တင်နေရုံပဲ။ ဒီလိုဖြစ်ရမယ့်အစား၊ ကျွန်တော်ကတော့ လက်စားချေဖို့ပဲ စိတ်အားထက်သန်နေပြီး၊ ထိုးမယ်နှက်မယ် အောင်ပွဲခံမယ်လို့ချည်း တွေးနေခဲ့မိတာ။ ကျွန်တော့်ရဲ့ စစ်မှန်တဲ့ဆန္ဒဟာ ကမ္ဘာပေါ်မှာ သဘောအကောင်းဆုံး၊ ဉာဏ်ရည်အမြင့်ဆုံးသတ္တ၀ါတစ်ကောင်ဖြစ်ဖို့ မဟုတ်တော့ဘဲ၊ ကျွန်တော်စိတ်မထင်တဲ့လူကို အနိုင်ယူပြီး၊ ကျောက်ခေတ်ကလူပြိန်းတွေရဲ့နည်းနဲ့ ပိုမိုသန်မာသူတစ်ဦးဖြစ်လာအောင် လုပ်ဖို့လို ဖြစ်နေပါတော့တယ်။

အမှန်တော့၊ နောင်ကြီး သိတဲ့အတိုင်းပါပဲ၊ ဉာဏ်ရည်ရှိတဲ့လူသားတိုင်းဟာ ဂိုဏ်းစတားတစ်ယောက်ဖြစ်အောင်လုပ်ပြီး လူ့အဖွဲ့အစည်းကို အင်အားချည်းသက်သက် ကြီးစိုးဖို့ အိပ်မက်မက်တတ်ကြတာပဲ။ ဒါပေမဲ့လည်း ဒီလိုလုပ်ဖို့က စုံထောက်ဝတ္ထုတွေထဲမှာလို မလွယ်တော့၊ လူတစ်ယောက်ဟာ ယေဘုယျအားဖြင့် နိုင်ငံရေးကိုပဲ အားကိုးပြီး အရက်စက်ဆုံးပါတီတစ်ခုကို အပြေးအလွှားဝင်ရောက်တော့တာပဲ။ ဒါတွေအားလုံးဟာ တကယ်တော့ ဘာများအရေးပါလို့လဲ၊ ထားပါတော့ လူတစ်ယောက်ရဲ့ စိတ်သန္တာန်ကို အရှက်ခွဲလိုက်ရုံနဲ့ လူတိုင်းကို လွှမ်းမိုးချုပ်ကိုင်ဖို့ရာ အောင်မြင်သွားပြီလား။ ဖိနှိပ်ချုပ်ချယ်မှုဆိုတဲ့ ပျားရည်ဆမ်းအိပ်မက်တွေပဲ ကျွန်တော့်အတွင်းသားထဲမှာ ကျွန်တော် ရှာဖွေတွေ့ရှိခဲ့ရပါတယ်။

တေဇာ (လရောင်လမ်း)

The Fall by Albert Camus, page 37-42 ကို ထုတ်နုတ်ပြီး ဆီလျော်သလို ဘာသာပြန်ဆိုပါသည်။

Image: www.inlog.org