ရုပ်ချင်းဆင်တူတဲ့ သိုးတွေဟာ အချင်းချင်းရောနှောနေမှာပဲ
အေးအေးဆေးဆေး အိပ်မောကျနိုင်တဲ့ ကိစ္စတွေ တခြားမှာအများကြီးပဲ
ရေစပ်နားက တောအုပ်လေးထဲသွားကြမယ် လာခဲ့
အဲ့ဒီမှာ အရင်က လုံးဝသတိမထားမိတဲ့ သတ္တ၀ါကလေးတွေ အများကြီးရှိနေတယ်
လိပ်ပြာနောက်လိုက်ရင်း ပျောက်သွားတဲ့ ကလေးလေးတွေလောက်တောင်ပဲ
ပြီးအမည်မခေါ်တတ်တဲ့ ငှက်ကလေးတွေ ရှိတယ်
ရေထဲမှာကျနေတဲ့ ငါးတွေက စကားမပြောတတ်ကြဘူး
Orgasm ခံစားခွင့်မရှိတဲ့ ကိုယ်ခန္ဓာပိုင်ရှင်တွေကို
အကြောင်းမဲ့ အတူတူဝိုင်းသနားမယ်၊ လာခဲ့
တွေ့လား၊ ဟိုးရေထဲမှာ ကျူရိုးလေးတစ်ခု ပေါ်နေတာ
မြောက်ကိုရီးယားသူလျှိုတစ်ယောက် ပုန်းနေတာ မဟုတ်ဘူးလို့ ဘယ်သူပြောနိုင်မလဲ
ကိုယ်တို့ သူ အနေခက်အောင် အဲဒီနား ခဲလုံးလေးတွေ ပစ်ချကြမယ်
ဘယ်သူ ပိုနီးနီးပေါ့၊ ကိုယ်ကတော့ အလျှော့မပေးဘူး၊
အထူးလေ့ကျင့်ထားတဲ့ ကော်မန်ဒိုတစ်ယောက်ကို ကြောက်သွားအောင်စ,ရတာ ဘယ်လောက်ပျော်ဖို့ကောင်းလဲ
ပြီးရင် မီးပုံးပျံကြီးစီးပြီး ရောက်ရာပေါက်ရာ သွားကြမယ် လာခဲ့
မတော်တဆ ဆီးရီးယားလေပိုင်နက်ထဲရောက်သွားရင်
ဥက္ကာပျံကြီးတစ်ခု ကမ္ဘာဆီတည့်တည့်လာနေချိန်မှာ
အချင်းချင်းစစ်တိုက်နေကြတဲ့ အောက်က စစ်သားသေးသေးလေးတွေကိုကြည့်ပြီး ကိုယ်တို့ ရယ်ကြဦးမယ် ဘယ်လိုလဲ
အိပ်သွားပြီလား ပျော်သွားပြီလား၊ လာခဲ့ ကိုယ်နောက်မှ ဆက်ပြောပြမယ်
သိုးတွေကို မရေနဲ့ကွယ်
အေးအေးဆေးဆေး အိပ်မောကျနိုင်တဲ့ ကိစ္စတွေ တခြားမှာအများကြီးရှိပါတယ်။
တေဇာ (လရောင်လမ်း)
Image: quatchi-chen.deviantart.com
love this one
ReplyDelete