သားကောင်

ချောင်ပိတ်မိနေတဲ့ သားကောင်လို့
ကိုယ့်ကိုယ်ကိုယ် သတိပြုမိစဉ်မှာ
ခြောက်ခြားတုန်လှုပ်မှုက သူ့ကိုယ်
တစ်ဆစ်ဆစ်နှိပ်စက်လာတယ်...။

အသက်ရှူသံပြင်းပြင်း
ဒဏ်ရာအဆင်းအခြစ်ဗရပွနဲ့…။

စူးနစ်သော အဆိပ်လူးမြား
သွေးဆာတောခွေးများရဲ့ ခြေသံ
ပရိဒေ၀တောမီး
ရှောင်ကွင်းပြီး ခြေကုန်ထုတ်ပြေးလိုပြေးရ
ဝါရင့်မုဆိုးတို့လက်မှ
ပညာသားပါပါ ကိုယ်လွတ်ရုန်းလိုရုန်းရ…။

မရှုမလှ
အကြိမ်ကြိမ်လဲကျခဲ့ပေါ့
သူမွေးဖွားခဲ့ရာ ဟောဒီတောနက်ထဲမှာပဲ…။

သူ့နှလုံးသွေး ရပ်တန့်ချိန်အား
စိတ်အားထက်သန်စွာစောင့်ကြည့်နေတဲ့
အပင်ကိုင်းဖျားက လဒသုံးကောင်က
သူ့ကို
မခံချင်စိတ်ကြီးစွာ
နာကျည်းစိတ်ကြီးစွာ
အင်အားပြည့်ဝလာစေခဲ့
တဖန်ပြန်လည် ရှင်သန်လာစေခဲ့…။

ဒါနဲ့…
နောက်ဆုံး ခွန်အားတစ်စက်လက်ကျန်ထိ
နောက်ဆုံး ထွက်သက်ထိ
သူ ဆက်လက်ပြေးလွှားနေခဲ့မိဆဲပေါ့
အန္တရာယ်အပေါင်းကင်းရှင်းရာ
သူ့ဌာနေကျောက်ဂူဆီ…။

ဒါပေမဲ့ သူဟာ
သိုးကလေးဒရယ်ကလေးတစ်ကောင်မဟုတ်
အင်ဒီယန်းမုဆိုးသားအဖလက်မှ
အသက်လုပြေးခဲ့ရတဲ့
ဘီချူးဆိုသော ကျားသစ်မလေးသာဖြစ်တယ်…။

မတ်စောက်စောက်ကျောက်ဆောင်ဆီ
ကုပ်တွယ်တက်နေတဲ့
သူ့ ရွှေဝါရောင်အကွက်ရဲ့
အလှတရားနဲ့ အားမာန်အား
ဂုဏ်ယူဝင့်ကြွားစွာ…
ညနေခင်းနေရောင်ခြည်အောက်မှာ လှစ်ပြလို့
အင်ဒီယန်းတို့ရဲ့ သက်ပြင်းချသံများ
တောနက်ကြီးထဲ ပဲ့တင်သွားခဲ့တဲ့အထိ…။

<<<တေဇာ>>>

မေ (၂၇) ၂၀၀၉