လရောင်ဖြန့်ကြက်ထားသော လမ်းထက်က ခြေလှမ်းငယ်များ။

ကြမ္မာငင်ခြင်း

[ ၁ ]

East of the Web
နေ့က ပူစပ်ပူလောင်နေ့။ ပြီးတော့ ကျွန်တော့်မိန်းမကို ကျွန်တော် မုန်းတယ်။ နေဦး… ပြောပြမယ်။

ကျွန်တော်တို့ Scrabble (အင်္ဂလိပ်စာကားလုံးစပ် ကစားနည်း) ကစားနေကြတယ်။ ဘယ်လောက် ဆိုးသလဲ စဉ်းစားကြည့်လေ။ ကျွန်တော့်အသက်က ၄၂ နှစ်။ မဟားတရားပူနေတဲ့ တနင်္ဂနွေနေ့လယ်။ ဒီလိုအချိန်မှာ ကျွန်တော့်ဘ၀မှာ အများဆုံးမျှော်လင့်နိုင်တာက Scrabble ကစားဖို့တဲ့လား။ တကယ်ဆိုရင် ကျွန်တော် အပြင်ထွက်သင့်တယ်။ ကိုယ်လက်လှုပ်ရှား လေ့ကျင့်ခန်းလေး လုပ်မယ်။ ပိုက်ဆံလေးဘာလေး သုံးမယ်။ အပေါင်းအသင်းတွေနဲ့ တွေ့မယ်။ ကြာသပတေးနေ့ကတည်းက မိန်းမကလွဲလို့ တခြားလူတစ်ယောက်နဲ့မှ ကျွန်တော် စကားမပြောရသေးဘူး။ ကြာသပတေးနေ့တုန်းကလည်း နွားနို့လာပို့တဲ့လူနဲ့ စကားပြောခဲ့ရတာပါလေ။ ကဲ စဉ်းစားကြည့်၊ ကျွန်တော့်ဘ၀ကို။


ကျွန်တော့် စာလုံးတွေက မကောင်းဘူး။ BEGIN ဆိုပြီး အဆင်ပြေသလို စပ်လိုက်တယ်။ N က ပန်းရောင်ကြယ် အသေးပေါ်မှာဆိုတော့ ၂၂ မှတ်။ ကိုယ့်ကိုယ်ကိုယ် ဟုတ်လှပြီဆိုတဲ့ မျက်နှာပေးနဲ့ သူ့စာလုံးတွေကို ပြန်စီနေတဲ့ မိန်းမရဲ့မျက်နှာကို ကျွန်တော် ကြည့်နေမိတယ်။ သူ့စာလုံးတွေက အသံ တတောက်တောက်မြည်နေတယ်။ ကျွန်တော် သူ့ကို မုန်းတယ်။ သူသာ မရှိဘူးဆိုရင် အခုချိန်လောက်ဆို ကျွန်တော် စိတ်ဝင်စားစရာ တစ်ခုခုကို လုပ်နေလောက်ပြီ။ ကျွန်တော် တောင်ပေါ်တက်ချင် တက်နေမှာ။ ဟောလီးဝုဒ် ရုပ်ရှင်ကားတွေထဲမှာ သရုပ်ဆောင်ဖြစ်ချင်လည်း ဖြစ်နေမှာ။ အတ္တလန်တိတ်ကိုဖြတ်ပြီး ရွက်လွှင့်နေချင်လည်း နေမှာ။ မပြောတတ်ဘူး။ တစ်ခုခုတော့ တစ်ခုခုပဲ၊ လုပ်ဖြစ်နေမှာတော့ သေချာတယ်။

သူက JINXED [ကြမ္မာငင်ခြင်း] ဆိုတဲ့ စာလုံးကို J အက္ခရာကို နှစ်ဆရမယ့်အကွက်မှာ ထားပြီး စပ်လိုက်တယ်။ အမှတ် ၃၀ ။ သူ ကျွန်တော့်ထက် အမှတ် ကျောနေပြီ။ သူ့ကို သတ်ပစ်လိုက်ရင် အေးမလားပဲ။ ကျွန်တော့်မှာသာ D စာလုံးရှိရင် MURDER [လူသတ်မှု] ဆိုတဲ့ စကားလုံးကို စပ်လို့ရတယ်။  ဒါဆိုရင် အချက်ပြလိုက်တာပဲ။ ခွင့်ပြုချက်တောင်းတဲ့ သဘောမျိုးပေါ့။

U စာလုံးကို ကျွန်တော် သွားနဲ့ကိုက်နေမိတယ်။ ဟုတ်ပါတယ်။ ဒီသောက်ကျင့်လည်း မကောင်းဘူး။ ကျွန်တော်သိတယ်။ စာလုံးတွေအားလုံးလည်း ကျွန်တော်ကိုက်ထားတာ ကြေမွနေပြီ။ WARMER [ပို၍ပူနွေးသော] ဆိုတဲ့ စကားလုံးကို စပ်ပြီး ၂၂ မှတ်ရအောင် ယူလိုက်တယ်။ တကယ်တော့ ကျွန်တော် U စာလုံးကို ဆက်ကိုက်နေလို့ရအောင် စပ်လိုက်တာ။ အိတ်ထဲကနေ စာလုံးအသစ်တွေကို ထပ်နှိုက်နေတုန်း၊ အဲဒီစာလုံးတွေဟာ ကျွန်တော်ဘာလုပ်သင့်တယ်ဆိုတာ ပြောပြလိမ့်မလားလို့ တွေးနေမိတယ်။ ဆိုကြပါစို့ KILL [သတ်သည်] ဆိုတဲ့စကားလုံးတို့၊ ဒါမှမဟုတ် STAB [ထိုးသည်] တို့၊ ဒါမှမဟုတ် သူ့နာမည်ပဲဖြစ်ဖြစ် တစ်ခုခုဗျာ။ ကျွန်တော် ချက်ချင်းကို လုပ်ပစ်လိုက်တော့မှာ။ သူ့ကို ကျွန်တော် ကိစ္စတုံးပစ်လိုက်တော့မှာ။

ကျွန်တော် ရလာတဲ့ စာလုံးတွေကို ကြည့်လိုက်တော့ MIHZPA တဲ့။ ပြီးတော့ ကျွန်တော် ကိုက်နေတဲ့ U ပေါ့။ ဆိုးပါ့။

နေအပူရှိန်က ကျွန်တော့်ကို ပြတင်းတံခါးနားရောက်အောင် တွန်းပို့နေတယ်။ အပြင်ဘက်ဆီက ပိုးကောင်တွေရဲ့ တ၀ီဝီအသံကို ကျွန်တော် ကြားနေရတယ်။ ပျားတွေမဖြစ်ပါစေနဲ့ပဲ ဆုတောင်းရတော့မယ်။ ကျွန်တော့် ညီဝမ်းကွဲတစ်ယောက်ဆို ကိုးနှစ်သားမှာ ပျားကို မျိုချမိလို့ လည်ခေါင်းကြီးယောင်ပြီး သေပါရောလား။ တကယ်လို့ အခုကြားနေရတာ ပျားတွေသာဆိုရင်တော့ ကျွန်တော့်မိန်းမ လည်ချောင်းထဲကို ပျံဝင်သွားပါစေလို့သာ ဆုတောင်းမိတော့တယ်။

[ ၂ ]

သူက SWEATIER [ပို၍ချွေးပျံသော] ဆိုတဲ့ စကားလုံးကို သူ့စာလုံးတွေ အကုန်သုံးပြီး စပ်လိုက်တယ်။ ၂၄ မှတ်၊ ဘောနပ်စ်က ၅၀၊ အမလေး။ ဒီလောက်ပူမနေဘူးဆိုရင် သူ့ကို ကျွန်တော် အခုချက်ချင်း လည်ပင်းထညှစ်လိုက်တော့မှာ။

ကျွန်တော်လည်း ချွေးတွေပျံလာပြီ။ အပူသက်သာသွားအောင် မိုးရွာလိုက်ရင်ကောင်းမယ်လို့ တွေးနေတုန်းပဲ ကျွန်တော့် ခေါင်းထဲကို စကားလုံးတစ်လုံး ၀င်လာတယ်။ HUMID [စိုထိုင်းသော] ဆိုတာကို စကားလုံးရဲ့ အမှတ် နှစ်ဆ။ သူစပ်ထားတဲ့ JINXED က D ကို အပိတ်မှာ ထားစပ်လိုက်တယ်။ U စာလုံးကို ဘုတ်ပြားပေါ် ချလိုက်တော့ ကျွန်တော့် သွားရည်တွေ နည်းနည်းပေနေတယ်။ ၂၂ မှတ်။ သူ့ဆီမှာ စာလုံးတွေ မကောင်းဘူးထင်တာပဲ။

သူ့စာလုံးတွေ မကောင်းဘူးလို့ သူပဲ ပြောတာ။ ဘာပဲဖြစ်ဖြစ် သူ့ကို ကျွန်တော် ပိုမုန်းလာတယ်။ သူက FAN [ပျော်ရွှင်မှု] ဆိုတဲ့ စကားလုံးကို F ကို နှစ်ဆရမယ့်အကွက်ပေါ်မှာ တင်ပြီးစပ်လိုက်တယ်။ ပြီးတော့ ရေနွေးခရားဖြည့်ဖို့နဲ့ လေအေးစက်ဖွင့်ဖို့ ထသွားတယ်။ အဲဒါသာ ကြည့်တော့၊ လွန်ခဲ့တဲ့ ဆယ်နှစ်အတွင်း အပူဆုံးနေ့မှာ ကျွန်တော့် မိန်းမက ရေနွေးကျိုနေတယ်။ ဒါကြောင့် သူ့ကို ကျွန်တော် မုန်းတာ။ ZAPS [ပစ်ခတ်သည်] ဆိုတဲ့စကားလုံးကို Z ကို နှစ်ဆအကွက်မှာထားပြီး ကျွန်တော် စပ်လိုက်တယ်။ လေအေးစက်ကို ပလက်ထိုးရင်း သူ ဓာတ်လိုက်သွားတာကို တွေ့လိုက်ရလို့ ကျွန်တော် အတော်လေး ကျေနပ်သွားမိတယ်။

သက်ပြင်းလေးကြီးချပြီး သူက ပြန်ထိုင်ချလိုက်တယ်။ ပြီးတော့ တတောက်တောက်နဲ့ သူ့စာလုံးတွေကို ပြန်စီပြန်တယ်။ ကျွန်တော့်ဒေါသဟာ အတွင်းထဲမှာ အစိုင်အခဲဖြစ်လာသလို ခံစားရတယ်။ အတွင်းက အဆိပ်ရည်အချို့ဟာ ကျွန်တော့် ခြေတွေလက်တွေဆီ စီးလာပြီး လက်ချောင်းလေးတွေအထိ ရောက်လာချိန်မှာ ထိုင်ခုံပေါ်ကနေ သူ့ကို ခုန်အုပ်မိတော့မလို ခံစားရတယ်။ Scrabble စာလုံးတွေက ကြမ်းပြင်ပေါ် ပြန့်ကျဲသွားတဲ့အထိ…။ ပြီးတော့ သူ့ကို မသေမချင်း ရိုက်၊ ရိုက်၊ ရိုက်…။

ကျွန်တော့်ဒေါသတွေဟာ လက်ဖျားဆီကို ဖြတ်သန်းသွားတယ်။ ကျွန်တော့် နှလုံးက ခုန်နေတယ်။ ချွေးပျံတာပဲ။ ကျွန်တော့်မျက်နှာဟာ တဆတ်ဆတ်တုန်နေမယ် ထင်တယ်။ အဲဒီနောက်မှာ ကျွန်တော် သက်ပြင်း လေးလေးပင်ပင် ချပြီး ထိုင်ခုံပေါ် ပြန်ထိုင်ချလိုက်တော့တယ်။ ရေနွေးအိုးဆူနေပြီ။ ရေနွေးအိုးဆူသံက ကျွန်တော့်ကို ပိုပြီး ပူလာသလို ခံစားရစေတယ်။ သူက READY [အဆင်သင့်] ဆိုတဲ့စကားလုံးကို နှစ်ဆအကွက်မှာ တင်လိုက်ပြီး ၁၈ မှတ် ရသွားတယ်။ ပြီးတော့ သူ့အတွက် လက်ဖက်ရည်တစ်ခွက်ဖျော်ဖို့ ထသွားပြန်တယ်။ ဟင့်အင်း။ ကျွန်တော်တော့ မသောက်ချင်ဘူး။

စာလုံးအိတ်ထဲက ဗလာဂျိုကာတစ်ခုကို သူမမြင်တုန်း ကျွန်တော် ခိုးယူလိုက်တယ်။ ပြီးတော့ ကျွန်တော့်ဆီမှာရှိတဲ့ V စာလုံးကို ပြန်ထည့်ထားလိုက်တယ်။ သူက ကျွန်တော့်ကို မသင်္ကာသလို ကြည့်နေတယ်။ လက်ဖက်ရည်ခွက်ကို စားပွဲပေါ်တင်ရင်း ထိုင်ချလိုက်တယ်။ ကျွန်တော်က CHEATING [လှည့်စားခြင်း] ဆိုတဲ့ စကားလုံးကို စာလုံး (၈) လုံး အကုန်သုံးပြီး စပ်လိုက်တယ်။ ခုန စပ်ထားတဲ့ READY က A ကိုပါ သုံးလိုက်တယ်။ ဘောနပ်စ်အမှတ် ၅၀ အပါအ၀င်၊ ၆၄ မှတ်။ … ဆိုတော့ အခု သူ့ထက်ကျွန်တော် အမှတ်သာသွားပြီ။

[ ၃ ]

အံမာ..၊ ကလိမ်ကျစ်လုပ်ထားသလားလို့ သူက ကျွန်တော့်ကိုမေးသေးတယ်။ တကယ့်ကို တကယ့်ကို ကျွန်တော် သူ့ကို မုန်းတယ်။ သူက IGNORE [လျစ်လျူရှု] ဆိုတဲ့စကားလုံးကို သုံးဆအကွက်မှာ စပ်ပြီး ၂၁ မှတ်ရသွားတယ်။ သူက ၁၅၃ မှတ်၊ ကျွန်တော်က ၁၅၅ မှတ်။ သူ့လက်ဖက်ရည်ခွက်က အငွေ့တွေက ကျွန်တော့်ကို ပိုပူလာအောင်လုပ်နေတယ်။ ကျွန်တော့်မှာရှိတဲ့ အက္ခရာတွေနဲ့ သတ်ဖြတ်တာနဲ့ဆိုင်တဲ့ စကားလုံးတစ်လုံး စပ်နိုင်ဖို့ ကြိုးစားလိုက်တယ်။ အလကားပဲ။ ကျွန်တော် အကောင်းဆုံးစပ်နိုင်တာဆိုလို့ SLEEP [အိပ်သည်] ပဲ ရှိတယ်။

ကျွန်တော့် မိန်းမ အိပ်ပုံကတော့ ပြောမနေနဲ့တော့။ အိမ်ရှေ့အိမ်မှာ ရန်ဖြစ်တဲ့နေ့တုန်းက တံခါးတွေကျိုးပြီး ရုပ်မြင်သံကြားစက်ကြီး အပြင်လွင့်ထွက်လာတာ ငနဲမက သိတောင်မသိဘူး။ နောက်တစ်နေ့ကျတော့ သူကပဲ ကျွန်တော့်ကို အိပ်ရေးပျက်တယ်ဆိုပြီး ကဂျီကဂျောင်လုပ်သေးတယ်။ သင်းကို ရှင်းပစ်ဖို့ နည်းတစ်နည်းလောက် ရှိရင်တော့လား…။

ကျွန်တော့် စာလုံးတွေကို အကုန်သုံးဖို့ အခွင့်အရေးတစ်ခု ရတယ်။ JINXED က X ကို သုံးပြီး EXPLODES [ပေါက်ကွဲသည်] လို့စပ်ပြီး ၇၂ မှတ် ရလိုက်တယ်။ ဒါမှ သူ သိမှာ။ ကျွန်တော် စာလုံးတွေကို ချစပ်လိုက်ချိန်မှာပဲ နားကွဲမတတ် ပေါက်ကွဲသံကြီးထွက်ပေါ်လာပြီး လေအေးစက်လည်း ရပ်သွားတော့တယ်။ ကျွန်တော့် နှလုံးတွေ တဒိတ်ဒိတ်ခုန်နေတယ်။ ဟင့်အင်း၊ ပေါက်ကွဲသံကြောင့် မဟုတ်ပါဘူး။ ကျွန်တော် မယုံနိုင်ဘူး။ ဒါဟာ တိုက်ဆိုင်မှုသက်သက်တော့ မဖြစ်နိုင်ဘူး။ စကားလုံးတွေကြောင့် ဖြစ်သွားတာပဲ။ ကျွန်တော် EXPLODES လို့စပ်လိုက်ချိန်မှာပဲ လေအေးစက်က ပေါက်ကွဲသွားတယ်။ ပြီးတော့ ကျွန်တော် ဂျိုကာကို ခိုးပြီး သူ့ကို လူလည်ကျလိုက်တုန်းကလည်း CHEATING ဆိုတဲ့ စကားလုံးကို စပ်မိခဲ့တယ်။ ပြီးတော့ ZAP ကို စပ်တုန်းကလည်း ကျွန်တော့်မိန်းမ ဓာတ်လိုက်သွားတယ်။ စကားလုံးတွေက တကယ်ဖြစ်လာနေတာကိုး။ အက္ခရာတွေဟာ အနာဂတ်ကို ဟောနေပြီ။ ဒီကစားပွဲကြီးတစ်ခုလုံးဟာ ကြမ္မာငင် [JINXED] တာပဲ။

မိန်းမက SIGN [သင်္ကေတ] ကို သုံးဆအကွက်မှာ ထားစပ်လိုက်တယ်။ ၁၀ မှတ်။ ကျွန်တော် စမ်းသပ်ရမယ်။ မှန်သလား မမှန်ဘူးလား သေချာဖို့ ကျွန်တော်တစ်ခုခု စမ်းကြည့်ရမယ်။ စကားလုံးတွေအတိုင်း လိုက်ဖြစ်နေတယ်ဆိုတာကို သက်သေပြဖို့၊ ….မဖြစ်နိုင်တဲ့ အရာတစ်ခုခု။ ကျွန်တော့်ဆီမှာ ရှိတဲ့ စာလုံးတွေက ABQYFWE ။ ကျွန်တော့်အဖို့ ရွေးချယ်စရာ သိပ်များများစားစား မရှိဘူး။ B စာလုံးကို ကျွန်တော်က ထုံးစံအတိုင်း သွားနဲ့ကိုက်နေမိတယ်။

[ ၄ ]

EXPLODES က L ကိုယူပြီး FLY [ပျံသန်းသည်] လို့ ကျွန်တော်စပ်လိုက်တယ်။ ခုံပေါ်မှာထိုင်၊ မျက်စိအသာမှိတ်ပြီး ခုံပေါ်က ပျံတက်သွားတဲ့ အသိကို ရမလားလို့ စောင့်နေမိတယ်။ ပျံဖို့ စောင့်နေတယ်။ သေရော..။ ကျွန်တော် မျက်လုံးဖွင့်လိုက်တဲ့အချိန်မှာ ယင်ကောင်တစ်ကောင်။ တ၀ီဝီမြည်နေတဲ့ ပိုးကောင်က Scrabble ဘုတ်ပေါ်မှာ ခပ်နွေးနွေး လက်ဖက်ရည်ခွက်က အငွေ့တွေဆီ ပျံဝဲနေတယ်။ ဒါဘာဆိုင်လို့လဲ။ ယင်ကောင်တစ်ကောင်ဟာ ဘယ်လိုမဆို ရောက်လာနိုင်တာပဲ။ အဓိပ္ပာယ်နှစ်ခွ မထွက်တဲ့ စကားလုံးတစ်ခုခု စပ်ဖို့လိုနေတယ်။ အဓိပ္ပာယ်ကောက် မမှားနိုင်တဲ့အရာ တစ်ခုခု။ ပွဲသိမ်းရိုက်ချက်။ လမ်းဆုံး။ အသေသတ်မယ့် စကားလုံး။

ကျွန်တော့် မိန်းမက CAUTION [သတိ] ကို ကျွန်တော်စပ်ထားတဲ့ N ကို မှီပြီး စပ်လိုက်တယ်။ ၁၈ မှတ်။ ကျွန်တော့်စာလုံးတွေက AQWEUK ။ ပြီးတော့ ပါးစပ်ထဲမှာ B ။ စကားလုံးတွေရဲ့ အစွမ်းမှာ ကျွန်တော် မှင်သက်နေတယ်။ ပြီးတော့ ဒီအစွမ်းကို ကောင်းကောင်းအသုံးမချနိုင်လို့လည်း စိတ်တိုနေမိတယ်။ စာလုံးတစ်လုံးထပ်ပြီး ခိုးရမလို ဖြစ်နေတယ်။ ကျွန်တော့်ဆီမှာ I အက္ခရာသာရှိရင် SLASH [ခုတ်ဖြတ်သည်]၊ ဒါမှမဟုတ် SLAY [ရက်ရက်စက်စက်သတ်ဖြတ်သည်] ကို စပ်ပြီး ပွဲသိမ်းပစ်လိုက်တော့မှာ။

အဲဒီအချိန်မှာပဲ ကျွန်တော် တစ်ခု သတိရသွားတယ်။ ပြီးပြည့်စုံတဲ့ စကားလုံး။ အင်းအားကြီးတယ်၊ အန္တရာယ်များတယ်၊ ကြောက်စရာကောင်းတဲ့ စကားလုံး။ QUAKE [ငလျင်] ဆိုတဲ့စကားလုံးကို စပ်ပြီး ကျွန်တော် ၁၉ မှတ်ယူလိုက်တယ်။

ငလျင်ရဲ့ ပြင်းအားဟာ ရတဲ့အမှတ်နဲ့ အချိုးကျနေမလားလို့ ကျွန်တော် တွေးမိလိုက်သေးတယ်။ ကျွန်တော့်သွေးကြောတွေထဲမှာ လှုပ်ခါနေတဲ့ ဖြစ်တန်စွမ်းအင်တစ်မျိုးကို ကျွန်တော် ခံစားနေရတယ်။ ကျွန်တော်ဟာ ကံကြမ္မာကို အမိန့်ပေးနေပြီ။ ကျွန်တော်ဟာ အနာဂတ်ကို ချုပ်ကိုင်ထားပြီ။

ကျွန်တော့်မိန်းမက DEATH [သေခြင်း] ကိုစပ်ပြီး ၃၄ မှတ် ယူလိုက်ချိန်မှာပဲ အခန်းဟာ စတင်လှုပ်ခါလာတယ်။ အံ့အားသင့်မှု မယုံကြည်နိုင်မှုတွေနဲ့ ကျွန်တော် အသက်ကို ပြင်းပြင်းရှူနေမိတယ်။ ပြီးတော့ ကျွန်တော် ကိုက်နေတဲ့ B အက္ခရာကလည်း ကျွန်တော့်လည်ချောင်းထဲ ရောက်သွားခဲ့ပြီ။ ချောင်းဆိုးပြီး ဟပ်ထုတ်ပစ်ဖို့ ကျွန်တော် အသည်းအသန် ကြိုးစားနေမိတယ်။ ကျွန်တော့်မျက်နှာဟာ နီရာက ပြာလာတယ်။ လည်ချောင်းအတွင်းက မီးစနဲ့အထိုးခံရသလို ထူပူလာတယ်။ လည်မျိုမှာ သွေးတွေ စီးကျလာတဲ့အထိ ကျွန်တော် လက်သည်းနဲ့ ကုပ်ခြစ်နေမိတယ်။ ဟုတ်ပါတယ်၊ ငလျင်က အဆုံးအဖြတ် ပေးလိုက်ပြီ။

ကျွန်တော် ကြမ်းပြင်ပေါ်ကို လဲကျသွားတယ်။ ကျွန်တော့်မိန်းမကတော့ သူ့နေရာမှာပဲ မလှုပ်မရှား ထိုင်နေတုန်းပဲ။ ကျွန်တော့်ကို ကြည့်လို့။

တေဇာ (လရောင်လမ်း)
စက်တင်ဘာ (၂၁) ၂၀၁၀
Charlie Fish ၏ Death by Scrabble ကို ဆီလျော်သလို ဘာသာပြန်ဆိုသည်။

4 comments:

မိုးယံ said...

သူကသတ်ဖို့ ကြိုးစားနေတုန်း သူမ က သတ်လိုက်တာ များလား။

မြသွေးနီ said...

ဇာတ်ကောင်နဲ့အတူ Scrabble လိုက်ဆက်နေမိတယ်။ စကားလုံးတွေ ရွေးပေးနေမိတယ်။ အထူးသဖြင့် မိန်းမဖြစ်သူအတွက်ပေါ့။

july-nyanlin said...

cheating !!

တီချမ်း said...

ကြိုက်တယ် ဒီတပုဒ် ကို တော်တော်ကိုကြိုက်တယ်

အထူးသဖြင့် သူ့မိန်းမ ကို သတ်ဖို့ ကြိုးစားတာကိုပေ့ါ steeldrivers's if it hadn't been for love သီချင်းကိုတောင် သတိရနေမိတယ်

Post a Comment