“အဲဒီတော့ ငါစဉ်းစားတယ်”

ကဗျာဆရာ မောင်ယုပိုင်ရဲ့ ကဗျာလေးတစ်ပုဒ် အရမ်းအရမ်းနှစ်သက်မိလို့ ပြန်လည်ဖော်ပြပေးလိုက်ပါတယ်။

အဲဒီတော့ ငါစဉ်းစားတယ်

ဒီအတိုင်းဆို စဉ်းစားစရာပဲ
ဟိုအတိုင်းဆို စဉ်းစားစရာပဲ
ဒီလို တစ်သက်လုံး ငါစဉ်းစားနေတုန်း
အိမ်ထောင်ကျသူက ကျသွားပြီ၊ ဘွဲ့ဂုဏ်ထူး
ရသူက ရသွားပြီ၊ စီးပွားဖြစ်သူဖြစ်၊
ရောဂါရသူရ၊ ကပ်ဆိုက်သူဆိုက်၊ သေသူသေ
“ဘ၀ကိုနားလည်သွားပြီ” တဲ့
“ဘာအရေးအကြီးဆုံးလဲ သိသွားပြီ” တဲ့
“ဒီလိုမှပေါ့” တဲ့
အားလည်းအားကျစရာ
စဉ်းလည်းစဉ်းစားစရာ
ကဲ။
ဘာကြောင့် ဒီလိုဖြစ် ဒီလိုကြောင့် ဘာဖြစ်
စဉ်းစားသူငါလည်း စဉ်းစားဆဲပေါ့
ထို့ကြောင့် ငါစဉ်းစားတယ်
ငါဘာလို့စဉ်းစားနေတာလဲ
ငါဘာတွေစဉ်းစားနေတာလဲ
ငါစဉ်းစားတာကို ငါပြန်စဉ်းစားကြည့်တော့
ငါ့စဉ်းစားခန်းက စဉ်းစားစရာဖြစ်လာတယ်
စဉ်းစားစရာကောင်းလာတယ်
အဲဒီတော့ ငါစဉ်းစားတယ်
…………..

◄ မောင်ယုပိုင် ►
ဇန်န၀ါရီ (၂၀၀၉) မြန်မာသစ်မဂ္ဂဇင်း