ကျောက်တုံး၊ သတ္တုအတုနှင့် ကော်ပီသီချင်းများအား တူးဆွခြင်း

သို့ လူလေးရွှေသွေး မောင်ဖိုးသား

မောင်ရင်လေးက ဟိုနေ့က ကိုယ့်ကို မက်တယ်အတု နားမထောင်ဘူးလို့ ပြောပြီး အနောက်တိုင်းက မက်တယ်အစစ်ဆိုတာကြီးကို နားထောင်ခိုင်းခဲ့တယ်။ အဲဒီအကြောင်းလေးကို သေးသေးလေး ပြောပါရစေ။ အရှင်းဆုံးတစ်ချက်ကို ထောက်ရရင်တော့ မောင်ရင်လေးပြောတဲ့အထဲမှာ `မက်တယ်´ လို့ သုံးသွားတယ်။ ဘာကြောင့် `သတ္တု´ လို့ မသုံးရသလဲ။ ဒါကို စမေးရမယ်။ အကြောင်းကတော့ `မက်တယ်´ (Rock, Metal, Heavy Metal, Dead Metal etc.,) ဆိုတဲ့ ဂီတအမျိုးအစားနာမည်အတွက် မြန်မာစကားလုံး လစ်ဟနေလို့ပဲ။ သတ္တုလို့သုံးရင် ဘယ်သူမှ နားမလည်ဘဲ ရယ်စရာ ဖြစ်နေလိမ့်မယ်။ ကဲ.. အဲဒီလိုပဲ `ကော်ပီသီချင်းမဆိုဘူး၊ ကော်ပီသီချင်း မကြိုက်ဘူး´ အော်နေကြတဲ့ လူတွေဟာလည်း ဘာကြောင့် `ကူးချသီချင်းမဆိုဘူး၊ ကူးယူသီချင်း မကြိုက်ဘူး´ လို့ မသုံးဘဲ ဘာလို့ `ကော်ပီ´ (Copy) နေကြသလဲ။ ဒါဟာ မြန်မာစကားလုံး မရှိလို့ပဲ။

ဟုတ်ပြီ။ ကော်ပီသီချင်း၊ မက်တယ်သီချင်းစတဲ့ အနောက်တိုင်းဂီတအမျိုးအစားတွေကို ဂစ်တာ (Guitar) နဲ့ တီးရတယ်။ ဂစ်တာဟာ နန်းတော်ရှေ့ဆရာတင်က တီထွင်ခဲ့တဲ့ တူရိယာမဟုတ်ဘူး။ ဒီတော့ မူလဖခင်တွေကိုပဲ ကိုယ်တို့က ဆရာတင်ကြ`ရ´တယ်။ (`ရ´ တယ် ဆိုတာ Have to ကို ဆိုလိုတာ၊ သိပ်ပြီး ဘိုလမ်းနီးလို့မဟုတ်ဘူး။ မဖြစ်မနေ၊ သဘာဝကျကျ အနောက်တိုင်းဂီတဂိုဏ်းချုပ်တွေကို ဆရာတင်ကြရတယ်) ဘာဖြစ်လို့ဆို ကိုယ်တို့က သူတို့ဂီတကို ၀ါးလက်ခုပ်တွေ၊ ပုလွေတွေ၊ အုန်းမုန့်ခွက်တွေနဲ့ တီးခတ်နေကြတာ မဟုတ်လို့ပဲ။ ဂစ်တာကို အသုံးပြုတီးခတ်တဲ့အတွက် ဂစ်တာသံပဲထွက်မယ်။ အနောက်တိုင်း ဂီတသင်္ကေတ၊ နုတ်စ် (Notes) တွေကို သုံးရတယ်။ ဒိုရေမီဖှာကို ကိုင်ရတယ်။ ဒီတော့ သူတို့ဂီတရဲ့ အရံသင့်ရှိပြီးသား ပုံစံခွက် (Frame) တွေထဲ ကိုယ့် မြန်မာစာသားတွေ ထည့်ကြည့်ရတယ်။ ဆိုကြည့်ရတယ်။

လွယ်လွယ်ပြောရရင် `စုတုပြု´ အဆင့်မှာ `တုပ´ တဲ့အဆင့်ကို ဖြတ်သန်းခြင်းပဲ ဖြစ်တယ်။ ဘာဖြစ်လို့ဆို မိုးကျရွှေကိုယ်လို `ပြု´ တဲ့အဆင့်ကို တိုက်ရိုက် လှမ်းတက်လို့ မရလို့ပဲ။ တုပတဲ့အဆင့်၊ သို့မဟုတ် ကော်ပီအဆင့်ကို အချိန်ကာလတစ်ခု မလွှဲမရှောင်သာ ဖြတ်သန်းရတယ်။ ကိုလေးဖြူရဲ့ဖြတ်သန်းမှုကို ကြည့်ရင် ကော်ပီတွေနဲ့ နာမည်နဲ့ အရှိန်အ၀ါ ရလာခဲ့ပြီး၊ အခုနောက်ပိုင်းမှာ ကိုယ်ပိုင်သံစဉ်တွေ လုပ်လာတယ်။ ပိုပြီးတိတိကျကျ ပြောရရင် အိုင်စီ (Iron Cross) နဲ့ တေးရေးသူတွေဟာ မြန်မာကိုယ်ပိုင်သံစဉ် Rock သီချင်းတွေကို ဖန်တီးလာနိုင်တယ်။ ကိုလေးဖြူက ဒါတွေကို ဆိုလာနိုင်တယ်။ ကော်ပီအယ်လ်ဘမ် (Copy Album) တွေဖြစ်တဲ့ ပင်လယ်အော်သံ၊ ကန္တာရလမင်း၊ သားကောင်၊ ကျိန်စာ၊ ပါဝါ၊ အိပ်မက်ကဗျာ.. စသည်၊ ဒီဖြတ်သန်းမှုအပြီးမှာ ကမ္ဘာသစ်တေး၊ လိပ်ပြာ၊ ခဏလေးများ၊ ဘင်္ဂလားပင်လယ်အော် စတဲ့ ကိုယ်ပိုင်သံစဉ်တွေ လုပ်နိုင်လာခဲ့တယ်။ လုပ်ပြခဲ့တယ်။ `မဉ္ဇူရီ´ ဟာ ဗွန်ဂျိုဗှီဆိုတဲ့  Father Time ဖြစ်ပေမဲ့ `အမဲလိုက်အက´ ဟာ တေးရေးဆရာ မြင့်မိုးအောင်ရဲ့ ကိုယ်ပိုင်သံစဉ် မြန်မာရော့ခ် သီချင်းတစ်ပုဒ်ပဲ ဖြစ်တယ်။ ကိုအငဲရဲ့ `ဆာဟာရ´ (ထင်တယ်)၊ သီချင်းစာအုပ်အမှာစာမှာ `ကျွန်တော်တို့ လုပ်ချင်ရာ လျှောက်လုပ်ထားတာကို သိခွင့်တောင်မရကြတဲ့ မူရင်းအဆိုရှင်များ´ ဆိုပြီး ကျေးဇူးတင်လွှာမှာ ထည့်ရေးထားတာ ဖတ်ခဲ့ဖူးတယ်။ ဒီကိစ္စကို ကျင့်ဝတ်အမြင် သီးသန့်နဲ့ ကြည့်လို့မရဘူး။ အခြေအနေတွေ၊ နောက်ခံကားတွေကို ထည့်တွက်ဖို့လိုတယ်။ နားလည်ပေးဖို့ လိုတယ်။ ဖြစ်နိုင်ရင် လူတိုင်း ကိုယ်ပိုင်သံစဉ်ပဲလုပ်ချင်တယ်၊ နားထောင်ချင်တယ်။ ဒါပေမဲ့ တောင်ဒဂုံထန်းတောထဲက ယဉ်ကျေးမှု တက္ကသိုလ်လောက်နဲ့ မလွယ်သေးဘူး။ ပညာရပ်ပိုင်းဆိုင်ရာတွေကို အားလုံး ကိုယ့်အားကိုယ်ကိုး လေ့လာနေကြရတယ်။ လမ်းဘေးအုတ်ခုံက တက်လာတဲ့ လူငယ်တွေအများစုပဲ။ နိုင်ငံတကာနဲ့ တန်းသွားညှိလို့ မဖြစ်ဘူး။ ဂျန်းထဲလ်မန်းဆန်ဖို့ အခွင့်အရေးမရသေးဘူး။ (ကော်ပီလုပ်လို့ တရားစွဲခံရမယ်ဆိုရင် တစ်မျိုး)

ကိုလေးဖြူနဲ့ အိုင်စီအဖွဲ့ရဲ့ ပြည်ပဖျော်ဖြေမှုပွဲတွေမှာ ကိုယ်ပိုင်သံစဉ်သီချင်းမရှိလို့ ဂုဏ်ငယ်တယ်ဆိုတဲ့ ပြည်ပရောက်မြန်မာတွေကို ကိုယ်နားလည်တယ်။ ကိုယ်လည်း ပြည်ပရောက်မြန်မာတစ်ယောက်ပဲ။ ဖြစ်နိုင်ရင် ကိုယ်ပိုင်သံစဉ်ကိုပဲ အားပေးချင်တယ်။ မဖြစ်နိုင်သေးဘူးဆိုရင်လည်း ကော်ပီလည်း လက်ခံတယ်။ စာသား (Lyrics) လေးတွေ ကောင်းနေရင်၊ သူများ ကောင်းပြီးသား ပုံစံခွက်ထဲ အစာသွပ်လိုက်လည်း နားထောင်လို့ ဖြစ်တာပဲ။ ဒါပေမဲ့ ကော်ပီဆန့်ကျင်ရေးသမားတွေက ဒီလိုမထင်ဘူး။ သူတို့က နေ့ချင်းညချင်း တန်းဝင်တဲ့မြန်မာကိုယ်ပိုင်သံစဉ် ရော့ခ်သီချင်းတွေ ရေးစပ်နိုင်လိမ့်မယ် ယူဆကြသလား မသိဘူး။ အဲလိုဆိုရင်တော့ ကိုယ်တိုင်ပဲ ကြိုးစားကြည့်ကြစေချင်တယ်။ (`ကျားပေါက်´ကို လက်ညှိုးထိုးပြမယ်ဆိုရင် ကျားပေါက်ငယ်ငယ်က ဘာသီချင်းတွေ နားထောင်သလဲ ပြန်မေးချင်တယ်။ အနည်းဆုံး ဖေကြီး `ရင်ဂို´ ကတော့ `ဆန္ဒနေ့ရက်´ လို သီချင်းမျိုးနဲ့ ချော့သိပ်ခဲ့ဖူးမှာပေါ့) ကိုယ့်အထင်တော့ အဲဒီအယူအဆဟာ `မျက်ကန်းမျိုးချစ်စိတ်´ ကြောင့်ရင်လည်း ဖြစ်ရမယ်။ (မျက်ပြူးမျိုးချစ်၊ တစ်နည်း အမြင်ကျယ်တဲ့ မျိုးချစ်ရှားတယ်။ အဖြူရောင်ဆေးဆိုးထားတဲ့ Dogma တစ်မျိုးပဲလို့ ကိုယ်ထင်တယ်၊ ဒီလိုပြောတာ အန္တရာယ်များမှန်းလည်း သိတယ်၊ နောက်မှ ဆွေးနွေးကြတာပေါ့။ ထားပါတော့။) ကိုယ့်ကိုယ်ကိုယ် မျိုးချစ်စိတ်ရှိကြောင်း သိပ်ပြချင်လို့လည်းဖြစ်ရမယ်။ ဒါမှမဟုတ် ကိုယ်တိုင်လည်း ကော်ပီသီချင်း မဆို၊ ဆိုတဲ့လူတွေရဲ့ အောင်မြင်မှုကိုလည်း မရှုစိမ့်နိုင်တဲ့ ကိုယ်ပိုင်သံစဉ်သမားတွေကို သံယောင်လိုက်တာရင်လည်း ဖြစ်ရမယ်။ မနာလိုစိတ်မှာ အခြေခံတယ်။ အဲဒီသဘောထားဟာ မကောင်းဘူး။ နယ်ပယ်အသီးသီးမှာ နောက်ကျနေပြီးမှတော့ ဒီတစ်ခုကိုသာ ဖိနင်းပြောပြီး `မျိုးချစ်ပြ´ တာဟာ ရယ်စရာကောင်းတယ်။ ဂုဏ်ငယ်တယ် ခံစားရအောင် ကိုယ်တို့မှာ ဘာများ ဂုဏ်ယူစရာ ရှိလို့လဲကွဲ့။ ကိုနင်ဒွိုင်းရဲ့ဝတ္ထုတွေကို မြန်မာမှုပြုထားဖို့ လိုလို့ ဆရာကြီးရွှေဥဒေါင်းက ဦးစံရှားခဲ့တာပဲ။ တိုက်ရိုက်မြန်မာပြန်တဲ့ ဆရာမြသန်းတင့်ထက် မြန်မာပရိသတ်အတွက် ပိုပြီးအဆင်ချောတယ်။ ဆရာကြီးရွှေဥဒေါင်းကို ကျေးဇူးတင်ရမယ်။ Plagiarism ဆိုပြီး အပြစ်ဖို့ဖို့ မသင့်ဘူး။ `မောင်ဖေသိန်း၊ မောင်ရင် ၀င်ကစွပ်လေးပဲ´ သွားလုပ်လို့မဖြစ်ဘူး။ (ဒီအကြောင်းကို ဆရာကြီးကိုယ်တိုင်လည်း ရေးဖူးတယ်၊ ကိုယ်အမှတ်မမှားရင် `အတွေးအမြင်နဲ့ ရှုထောင့်´ စာအုပ်မှာ ပါတယ်ထင်တယ်။ အွန်လိုင်းမှာ ရနိုင်ပါတယ်)

ကိုယ့်သူငယ်ချင်း တချို့ရှိတယ်။ သူတို့လည်း ကော်ပီကို အလိုမကျ၊ မာရဇ္ဇလောက်ကိုလည်း နားမ၀င်၊ Metal မှ Metal သဘောထားကလည်း ရှိသေးတယ်။ ဒီတော့မူရင်း အင်္ဂလိပ်သီချင်းခွေတွေကို နားထောင်တယ်။ ခက်တာက သူတို့ အဲဒါတွေကို သိပ်ကြိုက်တယ်သာပြောတယ်၊ တစ်ခါမှ အစအဆုံးပြီးအောင် ညည်းတာ၊ ဆိုတာ ကိုယ် မကြားဖူးဘူး။ ဘာဖြစ်လို့ဆို တီဗီကြည့်နေတဲ့ ကြောင်လို ဖြစ်နေတာကိုး။ မြင်တော့မြင်တယ် နားမလည်။ ကြားတော့ကြားတယ် ဘာမှန်းမသိ။ သံစဉ် (Melody) ကိုသာ ခံစားနိုင်ပြီး စာသား (Lyrics) ကို လိုက်မမီ၊ သို့မဟုတ် အပြည့်အ၀ မရတော့ဘူး။ သီချင်းစာရွက်ကြည့်ပြီး နားထောင်တာမှလည်း မဟုတ်ဘဲ။ ကိုယ့်ဘာသာစကားမှ မဟုတ်ဘဲ။ သီချင်းတစ်ပုဒ်မှာ သံစဉ်နဲ့ စာသား အရေးပါမှု ပူးတွဲနေတယ်ဆိုပေမဲ့ ကိုယ့်တစ်ဦးထဲ အမြင်အရတော့ စာသားကို ပိုအားပြုမိတယ်။ စာသားတွေ အဓိပ္ပာယ်ပြည့်ဝနေရင် ခပ်ချာချာသံစဉ်ကို ထေသွားနိုင်တယ်။ ရေလှောင်တမံကြီးနဲ့ စစ်အစိုးရဲ့စေတနာကို ဂုဏ်ပြုထားတဲ့ စာသားဆိုရင်တော့ ဘီတဲလ်သံစဉ် ယူသုံးလည်း ပြည်သူကတော့ ချဉ်မှာပဲ။  ကိုမျိုးကြီးရဲ့ `ငှက်တစ်ကောင်ရဲ့ အိပ်မက်´ ဟာ မူရင်းက တော်ရိလျော်ရိ Dance သံစဉ်တစ်ပုဒ်ပဲ။ ဒါပေမဲ့ ကိုယ့်အတွက်တော့ စိတ်ဓာတ်ကျနေရင်၊ အဲဒီသီချင်းနားထောင်လိုက်ရင် အဆင်ပြေသွားတတ်တာ များတယ်။ တစ်ပုဒ်လုံး နိမိပုံအထူ (Solid Metaphor) ကြီးတွေချည်းပဲ။

ကဲ.. မက်တယ်အတု မကြိုက်တဲ့ မောင်ငယ်လေး ဖိုးသားရေ။ ကိုယ်လည်း လက်ညောင်းနေပြီ။ ဒီတော့ မောင်ရင်လေး `သတ္တုအတု´ လို့ ပြောင်းပြောတဲ့နေ့မှာ၊ ဒါမှမဟုတ် `ကူးချ နားမထောင်ဘူး´ လို့ မာမာထန်ထန် ကြွေးကျော်နိုင်တဲ့တစ်နေ့မှာ၊ Rocker တွေကို ကျောက်တုံးကြီးတွေလို့ ပြောင်းခေါ်တဲ့တစ်နေ့မှာ၊ ကိုယ့်စက်ထဲက ကိုလေးဖြူ၊ ကိုကြီးငဲတွေ အကုန် `၀ဲ´ ပစ်လိုက်မယ်။ ကိုယ်ဆိုလိုတာက ကိုယ့် Computer ထဲက ကိုလေးဖြူ၊ ကိုကြီးငဲတို့ရဲ့ Music File တွေ အကုန် Delete လုပ်ပစ်လိုက်မယ်လို့ ဆိုလိုတာကွဲ့။ ဒီစာကို မင်းလေး ကိုယ့်ဘေးနားမှာ ရှိနေသလို စကားပြောလေးနဲ့ ကိုယ် အပျင်းပြေရေးပါတယ်။ အခုတော့ အိပ်ချင်လာပြီကွယ်။ ကိုယ် `တိုးကြီး´ (ခင်မောင်တိုး) နဲ့ ငြိမ့်နေတာ.. အဟက်။ အခုလာနေတဲ့ သီချင်းက ကိုယ်ပိုင်သံစဉ်သမား၊ မြန်မာဂီတသူရဲကောင်း `ကိုငှက်´ (ထူးအိမ်သင်) ရဲ့ ကော်ပီသီချင်းတစ်ပုဒ်ပေါ့။ `ဗင်းဆင့်ဗှန်ဂိုးတမ်းချင်း´ တဲ့။ အဲဒီသီချင်းဟာ `မူရင်းထက်ကောင်းတဲ့ ကော်ပီ´ လို့ ကိုယ်တော့ ထင်တယ်။ တော်ပြီကွယ်။ အခုထိ မောင်ရင်လေး ဘူးလုံးနားမထွင်းဖြစ်နေသေးတယ်ဆိုရင် လမ်းကြုံရင် ကိုယ့်အိမ်ကို ၀င်လာခဲ့ကွယ်။ ၀ီစကီတိုက်ပြီး အဲဒီအကြောင်း မင်းလေးနားလည်တဲ့အထိ၊ စိတ်ရှည်ရှည်ထားပြီး အသေးစိတ်ကိုယ်ရှင်းပြပါ့မယ်။ ဒါဟာ လေးဖြူနဲ့ ခင်မောင်တိုး၊ ဘယ်သူ့ကြိုက်သလဲ ရွေးချယ်ရတဲ့ကိစ္စ (Option) မျိုးမဟုတ်ဘူး။ ကော်ပီနဲ့ ကိုယ်ပိုင်သံစဉ်ဟာ ဆန့်ကျင်ဘက် ရန်သူတွေမဟုတ်ဘူး။ ငါနဲ့မတူလို့ အလကားဟာပါလို့ ကိလေသာဓာတ်ခံနဲ့ သွားပြောလို့မရဘူး။ ဒီသီချင်းကြီးက မူရင်းက Guns and Roses ပါ၊ Cold Play ပါ ဆိုပြီး နှုတ်ခမ်းကြီးရွဲ့ပြပြီး ဆရာကြီးလေသံနဲ့ ငါသိငါတတ်လုပ်နေဖို့ မသင့်ဘူး။ နားလည်ပေးတတ်ရမယ်။ Guitar ဆိုတဲ့ စကားလုံးအတွက် မြန်မာစကားလုံးရှာမရတဲ့ သူတွေက အုန်းကျွန်းမှ ဂုဏ်ရှိတယ် ထင်ရင်တော့ အုန်းပင်တစ်ပင် အိမ်မှာစိုက်ထားလိုက်ပေါ့.. အဟက်။ ကျွန်းပင်တော့ သွားမလုပ်နဲ့၊ မင်းဘဏ္ဍာ။ ဒါတွေဟာ ရှင်းရှင်းလင်းလင်း နားလည်ထားရမယ့် သဘောတရားရေးရာ (Ideology) ကိစ္စတွေသာ ဖြစ်ပါတယ်။ အထူးသဖြင့် မောင်ရင်တို့လို ဒဿနိကဗေဒ ကျောင်းသားတွေအနေနဲ့ ဆင်ခြင် (စဉ်းစားခြင်းကို ဆိုလိုပါတယ်) သင့်တဲ့ကိစ္စပဲ။ လူလေးတို့ ကျောင်းတော်ကြီးက ဒဿနိကသင်ရိုးမှာ မြန်မာလူမျိုး တစ်ကောင်တစ်မြီးမှမပါတဲ့အတွက် ကိုယ်တို့က ၂၁ ရာစုမှာ ရတတ်သလောက်လေး ကိုယ်တိုင်စဉ်းစားကြည့် ကြရမယ်။ ဒဿနအတုတွေချည်း သင်နေရရင်လည်း မနိပ်သေးဘူးမဟုတ်လား။ မောင်ရင်လေးဆီက ပြန်စာမျှော်နေမယ်။ ကိုယ်ပိုင်သံစဉ် အတွေးအခေါ်လေးတွေ ကြားရလိမ့်မယ် မျှော်လင့်ပါတယ်။ တော်သေးပြီကွယ်။ ၀ါးးးးးးး။

အိပ်ငိုက်စွာဖြင့်

ဦးဦးတေဇာ

တေဇာ (လရောင်လမ်း)