ရေခဲမှတ် မီးလျှံများ

အအေးဓာတ်သည် ခါချဉ်ကောင်များ တဆစ်ဆစ် ကိုက်ခဲနေသလို ခံရခက်လှသည်။ ဤသို့ ဖြစ်သင့်သည်။ သို့သော် အမှန်တကယ်တွင် ထိုမျှလောက် မဆိုးရွားခဲ့။ လက်တွေ့ဘ၀သည် အမြဲတမ်း ဤသို့သာ ဖြစ်၏။  ဘ၀သရုပ်ဖော် ၀တ္ထုများထဲကလို ပိုပိုလိုလို ရေးဖွဲ့ခွင့် မရှိအောင် အမြဲအနိုင်ပိုင်းလေ့ ရှိသည်။ အေးခဲတုန်ရီပြီး နှုတ်ခမ်းတွင် ကပ်နေသည့် ရေခဲများကို သုံးမိနစ်တစ်ခါ ခွာချနေရသည့် အဖြစ်ဆိုလျှင်လည်း ကောင်းမည်။ နားအတွင်းမှ ကျောက်ခက် ပန်းဆွဲများကြောင့် သွေးထွက်သံယို မဖြစ်မီ ကျွန်တော် အဆင်ပြေစွာ သေဆုံးသွားနိုင်ပေလိမ့်မည်။ ယခုတော့ အပူချိန်သည် “ဆိုးတော့ဆိုးတယ်၊ နေလို့တော့ ဖြစ်သေးတယ်” ဆိုသည့် အနေအထားတွင် အမြဲတမ်း အစွန်းမရောက်အောင် ရပ်တည်နေသည်။ ရုတ်ချည်းသိသိသာသာ ဆိုးရွားသွားခြင်းမဟုတ်၊ မသိမသာ တစ်ရစ်ချင်း လျော့ကျလာသော အပူချိန်ကြောင့် ကျင့်သားရချင်ယောင် ဆောင်နိုင်ခဲ့လေပြီ။ အိမ်အပြင်မှ နှင်းဖွဲများကို ကျွန်တော် မလိုတမာ ငေးကြည့်နေမိသည်။

တကယ်တော့ ဆောင်းသည် စစ်အာဏာရှင်ဆန်ဆန် ကောက်ကျစ်နေခြင်းသာ ဖြစ်သည်။ သည်းခံနိုင်သည့် ဖိနှိပ်မှုများသည် သာ၍ဆိုးသည်ဟု ဆာ့ထ်က ဆို၏။ သည်းမခံနိုင်သည့် ဖိနှိပ်မှုသည် တန်ပြန်တွန်းအားကို ဖြစ်ပေါ်စေသည်။ ချောင်ထဲက ခွေးကလေးများလို အစွယ်တဖွေးဖွေး ထုတ်ပြနိုင်စေသည်။ အဆုံးစွန်ဆိုရလျှင် ဘ၀တဏှာကိုပင် အားပျော့သွားအောင် လုပ်ဆောင်နိုင်ပေသည်။ သည်းခံနိုင်သည့် ဖိနှိပ်မှုကျတော့ ထိုထက်ပို၍ ဆိုးပါသည်။ မသေသေးချင်အောင် သွေးဆောင် ဖျားယောင်းတတ်သည်။ ဖိနှိပ်မှုဒဏ်ကို ပျော်ရွှင်စွာခံနိုင်စွမ်း ရှိလာအောင် လေ့ကျင့်သင်ကြားပေးသည်။ ဆောင်းတွင်းသည် အဘယ်ကြောင့် အေးရသနည်းဆိုသည့် သမားရိုးကျမေးခွန်းကိုပင် ဟာသတစ်ပုဒ်လို ရယ်မောတတ်လာအောင် စနစ်တကျ လုပ်ဆောင်ပါလိမ့်မည်။ ဤသို့လျှင် ဆောင်းတွင်းသည် ကျွန်တော့်ကို စနစ်တကျအုပ်ချုပ်နေပြီး စစ်အာဏာရှင်သည် ယခုလို ခိုက်ခိုက်တုန်နေစေပါသည်။

မကြာခင် အေးစက်နေသည့် ဂွမ်းကပ်ကို ကိုယ်ငွေ့ဖြင့် ငါးမိနစ်ခန့် ဖိကပ်ထားပြီး အိပ်နိုင်ရုံခန့် ပူနွေးလာအောင်လုပ်ရန် ကြိုးစားရပေဦးမည်။ ဤ၀ါကျသည် အမှန်တကယ်မူ ရုန့်ရင်းကြမ်းတမ်းလှသည့် အရေးအသားသာ ဖြစ်ပါသည်။ မြန်မာနိုင်ငံမှ အကျဉ်းထောင်များတွင် ယုံကြည်ချက်အကျဉ်းစံများ ကျန်းမာရေး ချို့တဲ့နေကြောင်း ရေဒီယိုသတင်းတွင် ကြားလိုက်ရသည်။ ယခုလို မကောင်းဆိုးရွားညများတွင် ထိုသူများ သမံတလင်းပေါ် ၀ါးကပ်ခင်းပုဆိုးခြုံ အိပ်စက်ရခြင်းအပေါ် အကောင်းမြင်ဝါဒီများ မည်သို့တွေးခေါ်ကြမည်လဲ ကျွန်တော် သိချင်လှသည်။ မြန်မာနိုင်ငံမှ ထောင်များသည် လူကို တရားဝင်သည့်နည်းဖြင့် သတ်နေခြင်းသာ ဖြစ်သည်ဟု အဖေကဆိုသည်။ ဥပဒေ၏ အဆိုးဘက်မျက်နှာစာကို တွေးမိချိန်တွင် ဆော့ခရိတ္တိ၏ အဆိပ်သင့် မျက်နှာမှ ကိုဇာဂနာ၏ နဖူးပြောင်ပြောင်အထိ ဖျပ်ခနဲ အသိဝင်မိသည်။  အနုမြူဗုံး ထိန်းချုပ်ခန်းတွင်း မျောက်အုပ်ဝင်ရောက်ခြင်း သတင်းခေါင်းစဉ်ကို ကျွန်တော်အနေဖြင့် တည်တည်ငြိမ်ငြိမ် ဖတ်ရှုနိုင်လိမ့်မည် မဟုတ်ပါ။

ဟိမ၀န္တာအအေးလှိုင်းသည် မျက်နှာလိုက်စွာ အားနည်းသူအချို့ကို သွေးအေးအေးဖြင့် သတ်ဖြတ်ပစ်ပေ ဦးမည်။ နိမ့်ကျသည့် ဖြစ်တည်မှုအချို့ကို အမှိုက်လှည်းသည့်နှယ် ရှင်းလင်းခေါ်ဆောင် သွားပေလိမ့်ဦးမည်။ ပျော်ရွှင်မှုသည် ဘူဇွာဆန်သည်ဟူသည့် ဖြစ်တည်မှုဝါဒီတို့၏ စကားကို ကျွန်တော် ပြန်လှန်သုံးသပ် နေမိသည်။ လူအချို့ ခိုက်ခိုက်တုန်နေစဉ်ဝယ် အခြားလူအချို့က လိပ်ပြာသန့်သန့်နှင့် နွေးထွေးစွာ အိပ်စက်နေနိုင်ပါသလားဟု မေးခွန်းထုတ်မိသည်။ မိမိ၏ နွေးထွေးမှုအတွက်  တစ်ကိုယ်ကောင်းဆန်စွာ ဘုရားသခင်အား ကျေးဇူးတင်နေ သင့်ပါသလား။ မမျှတမှုအတွက်သာ ဘုရားသခင်ကို ကျွန်တော် ခါးခါးသီးသီး ရှုတ်ချပါမည်။ အမျက်တော်ရှခဲ့သော် ကျွန်တော်၏ ရှိပြီးသားနွေးထွေးမှုတချို့တလေကို ပြန်လည်ယူဆောင် သွားနိုင်ပါသည်။ လူသားဝါဒခေါင်းစဉ်အောက်မှ “ရှောင်လွဲမရသည့် သောက” ကို အဆိုးမြင်ဝါဒဟု တံဆိပ်ကပ်မည်ဆိုလျှင် မွေးရာပါအဆိုးမြင်ဝါဒီတစ်ဦးအဖြစ် မိမိကိုယ်ကို သတ်မှတ်ပါမည်။ ဆောင်းနှင့်စစ်ဝါဒီတို့နှင့် ပတ်သက်၍ ကျွန်တော်၏ သဘောထားအမြင်မှာ ရေခဲမှတ်အောက် ဖြစ်ပါသည်။

အနွေးထည်၊ ခေါင်းစွပ်နှင့် စောင်ထူထူနှစ်ထပ်တို့သည် ရင့်ရင့်သီးသီးဆောင်းကို အထိုက်အလျောက် ကာကွယ်နိုင်သော်လည်း ကျွန်တော့်နှလုံးသားသည် အေးစက်နေဆဲ ဖြစ်သည်။ ဤသို့သော ညများတွင် လူသားတစ်ယောက်အနေဖြင့် ၀င်ရိုးစွန်းအိပ်မက်များကိုသာ မက်နိုင်စရာရှိသည်။ ယခုသော် ဆောင်းသည် ခါချဉ်ကောင်များ တဆစ်ဆစ်ကိုက်ခဲသလို ကျွန်တော့်ကို အမှန်တကယ် ခံရခက်စေခဲ့ပြီ ဖြစ်သည်။

◄ တေဇာ ► ဇန်န၀ါရီ (၄) ၂၀၁၀